Matthew 12
12
Jisü ye Sabbath Mipeu ke
1Tipau dolo Sabbath tsalà lakhi lo Jisü ye aghiluqo vechesü wuche. Ikelo pa khopemiqo ye müzüthive kehu aghipe lothi muxu pe a-u lono munu püzü chu thuve. 2Kughou Phariseemiqo no ti ithulu keno panongu no Jisü vilo pi, “Julo! Okhopemiqo ye Sabbath tsalà yeza hexa ghi shimo kepu shi anie.”
3Pa no khochile, “Nongu ye Kuchoyesü lo David eno pa küsàmiqo no müzüthive kelo kiu shi keno philu miphi keshea? 4Pa no Alhou ki lo ilo, eno pa ngò pa küsàmiqo no kishekimtheve keu sho chuke. Ayeza kiqi lo panongu ye tishi küzü kumoe, kughengu kishekimtheve keu sho ye achinemiqo ghengu likhi ke. 5Momu nongu ye Moses yeza lo philumo keshea? Tiye achinemi no Sabbath tsalà lo achineki lo mülà keu ye Sabbath shipixive ani, tishiaghimu akipimí tsüchemoe. 6Ino nongu vilo pìní keu ye achineki nguno akijeu kiukela hilehi ani. 7Tsalá nongu no atsa hipaqo kiqi ye, ‘Ni ye kimiyekini lunishi cheni ke thono aghakishi kumoe,’#12:7 Hosea 6:6 ipikeu ithi aghí ke aye nongu ye akipimí küha kemi shou küghathabeni chemo ke. 8Kughengu timi Nu ye Sabbath tsalà shou Ampeu ke.”
9Pa no a-a tile no chesü panoqow synagog lo iloe, 10ikelo a-u ithamlave kemi lakhi tilehi ngo ae. Panongu no akipimí Jisü tsü niye ajeku phuju ghi pa vilo ishi iniju, “Ayeza kiqi lo Sabbath tsalà lo shipivi nikeu ye achipi keshea?”
11Pa no panoqo vilo pi, “Tsalá nongu khukhumu ambe lakhi akeu Sabbath tsalà lono aqò lo ikiqi ilove aye, nongu ye tipau sünhepheluve eno khapeluvemo nani keshea? 12Timi küxü lakhi ye ambe nguno alau amekushou ke! Tighenguno Sabbath tsalà lo akivi kümlà shini keu ye ayeza lo achipi ke.”
13Tisheno pa no a-u ithamlave keu vilo pi, “O-u xachholo.” Ikelo pa no pa u xachho kelo pa u tüxau toi kupukülai athoputholuve. 14Ikemu Phariseemiqo ye khalau ipeve püzü kíshi no Jisü pìthíve nike no kuchughu thuve.
Alhou no Kìshelu keu Qeu
15Hipau vehu ithi akehu, Jisü no tile no wuve. Timi kutomo no pa pape che, eno pa no küsükinimi kümtsü shipivitsü. 16Pa no panoqo pelo pa ghili pesü kütamiqo vilo pipemo nike ghenguno pikichive. 17Hipau shikeu ye Isaiah tungkupu vechewo kiu pipüa keno shikupu niye ke:
18“Hiye khuu ino kìshelu keno iqeu ke,
ino kimiye chekeu, pa shou imlokiqi acheni;
ino ighungú pa shou puku nani,
eno pa no achipiu xakütha pesü shiyeqo lau asheshu nani.
19Pa ye kiyi-muto momu ighamuku keu shimo nani;
khunomu alaghilaqo lo pa sütsa chilumo nani.
20Pa ye ayeghü küsǘ sükuho püakeu süchhemo nani,
inhemimi keu kulu pinheve tsükeu shimo nani,
tiye pa no achipiu xakütha süghi no tokulu shiluve moke kutólo.
21Pa je lo shiyeqo no panonguw lajupu bepe anani.”#12:21 Isa 42:1‑4
Jisü eno Beelzebul
22Tile panongu no tüghaküsa no tsüghape akeu timi khuu anhethi iche eno atsa pimla keno pa lau saighi, eno Jisü no pa shipivive püzü pa ye atsa piluve eno ithuluve. 23Timi kümtsü no akümzave no pi, “Hiye David nu shi aghí nani keshea?”
24Ikemu kughou Phariseemiqo no hipau chilu keno, panongu no pi, “Timi hipau ye Beelzebul kükapuu tüghaküsaqo küká vechewo tüghaküsaqo haphe anie.”
25Jisü no panoqo kükümsü ithive no panongu vilo pi, “Akükaphu lakhi lono kijetha keu ipeghive aye akükaqha kümtsü kütsave cheni, eno aphughi momu akibo lo kijetha keu ipeghive aye ipove nani. 26Tsalá Satan no Satan haphe aye, pa ye pa likhi pa kijethave anie. Tishiaye pa kükaqha ye kíshi püzü puthugholu nani kea? 27Eno tsalá ino Beelzebul vechewo tüghaküsaqo haphelu cheghí aye, now timiqo ye khuu vechewo tüghaküsaqo haphelu cheni kea? Tishiaye, nongu papemiqo kümlà huno nongu shou küghathabe nani. 28Ikemu ino Alhou Ghungú küká vechewo tüghaküsaqo haphe aye, tiye Alhou kükaqha nongu shou ikughi anike.
29“Momu kümsüju kelo, timi lakhi ye akumtomi lakhi kilo püka nike ghenguno atüghishi timi akumtomi hu tsüghape qhive paghimo ke thaqhülo pa ye kishi no pa ki lo pighi akeu tinhemüghaqo pewuluni kea? Pa tsüghape qhive paghi anguno pa ki lono lepusü wuluve nani ke.
30“Khunoqo no igholo chemo keno imujochile ani, eno khunoqo no igholo hekütsümoni keno panapaghaive nani. 31Ikehu ino nongu vilo pìní, axiné eno pipütha keu jeli kümtsü akipimí qhivetsü nani, ikemu Aghungú Kimthe pipütha keu kipimí ye qhitsümo nani. 32Khukhumu Timi Nu lachile keu tsà pikeu ye akipimí qhivetsü nani, ikemu khuu no Aghungú Kimthe pipüthani keno pa ye itehi na ighi nikeu ghuloki lo namu akipimí qhitsümo nani.
33“Asübo kivi pighiphelo eno tipau xathi ye alo nani, momu asübo lhoküsa pighiphelo eno tipau xathi ye alomo nani, kughengu asübo ye tipau xathi lono kimchilu cheni. 34Nongu pighizü tiqo, kíshi püzü nongu küsaküghami no kiu akivi tsà pìní kea? Kughengu amlo lo kiu pekütsüpüani keno akichi lono piphe cheni. 35Timi kivimi no pa mulo lo akivi pekütsüpüa keu lono akivi pephe cheni, eno küsaküghami no pa mulo lo küsakügha pekütsüpüa keu lono küsakügha pephe cheni. 36Ikemu ino nongu vilo pìní keu ye kümtsü no küghakütha tsalà lo pütüta no kutokupuimo no piqhive keu tsà kihikülai tsü moayesa nani. 37Kughengu otsa vechewo no ye achipiu ipive kepu shi nani, eno otsa vechewo no ye küghathabe kepu shive nani.”
Jonah Michipu
38Ikelo Phariseemiqo eno ayeza kütsüchekemi khami no pa vilo pi, “Akükütsüu, ningu ye olau no amichipu ithulu nishi anie.”
39Jisü no khochile, “Küsakügha eno amikucho kumo tiqhelimi no amichipu khu cheni! Ikemu Alhou no tungkupu Jonah lau amichipu tsükeu nguno alau kütau ye tsümo nani. 40Kughengu Jonah no pucho tsalà küthü eno putho tsalà küthü akha kuloghi kive lo ngove ketoi, Timi Nu ghí pucho tsalà küthü eno putho tsalà küthü ayeghi pola lo ngo nani. 41Küghakütha tsalà lo Nineveh lo timiqo no puthugho no tiqheli hipau lau akipimi tsü nani; kughengu panongu ye Jonah no kütsü keu lono amlo pebideve ke, eno itehi ye kiukela Jonah nguno akijeu hilehi anie. 42Küghakütha tsalà lo Apéu Kükaliu no hipau tiqheli gholo no ithughi no hipau tiqhelimi akipimi tsü nani; kughengu li no ayeghi shekha küdau no Solomon lokütsü iní nike ighie, ikelo itehi ye kiukela Solomon nguno akijeu hilehi anie.
43“Kughou mithekumo ghungú no timi lau no ipeghiveni keno, azü küküha-a lo akulhokiqhi-a phuju eno phumlave kelo, 44ishi pi cheni, ‘Ni ye ino qhive keu ki lo idewoni.’ Kughou pa no ighi keno, aki khukimtheve no kithikiyi shi khumu aghimo aye, 45pa no wu no pa nguno alau küsakügha ghungú kütami tsünì sasü pa gholo ighino panongu tile ilo ngove cheni. Tithiu timi tipau ye atüghi lo nguno alau alhoküsa shive cheni. Küsakügha tiqheli hipau lau hikithipu shi nani.”
Jisü Pazá eno Athiküzümiqo
46Jisü no aqokitikhi pütsa aphi lono, pazá eno athiküzümiqo ye pa pütsa nishiqhiyi khalacheu puthugho ae. 47Timi khami no pa vilo pi, “Ozá ngò othiküzümiqo ye opütsa nishiqhiyi khalau puthugho anie.”
48Pa no pa khochile, “Khuu no izá eno ithiküzümiqo kea?” 49Pa khopemiqo lau kiche no pa no pi, “Hipaqo no izá eno ithiküzümiqo ke. 50Kughengu khunoqo no I Pù kungugha lo akeu pulou shi cheni keno tipaqo no ithiküzüu, ichepu eno izá ke.”
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
