Di Mulakata 3
3
Anak mantuariin akat malawanna parintana Alatala
1Jaji andian urar. Uraren dinen labi pande. Labi bayu’ akala lo’a ambata gulungan inatang yang batiin bokanen, yang dapolaan kole’a Alatala Yahuwe. Jaji barik manjarum uraren#3:1 I Pangabo manyaru’ balu’ uraren. lo’a babainyeen dinen, “Ai de’i jaruma Alatala lo’in lo’a soal jalu kaannin? Tapataka dapase’ang ikaan lo’in samuana ambata bua’en yang jalu datanamen indi’angen?” ingka kenang dinen uraren matoanina lo’a babainyeen.
2“O na’an. Pandekam angkaan. Daparuarang kausana. 3Suma sera poang yang dapase’angen ikaan ikam, yang itanga’ tanamanen dinen. Ada’kam to’ angkaan, sedangkan manjaput, matekam. Awan dinen paba’ina Alatala lo’am,” ingka kenang manyautina babainyeen dinen lo’a uraren.
4Jaji barik manjarum uraren, “A, kosan jalu mai. Na’ankin mate. Kaan poang ikin. 5Kenanga Alatala dinen lo’in mainto’ na’annin angkaan. Alibak. Kole’a datamu mamin. Ti’ ikaan ikin bua’ dinen, itamu ikin ratina basa ajau’en nanna basa maamen awan bua ia. Dinen lalo dakalibakangen,” ingka kenang dinen jaruma uraren lo’a babainyeen dinen.
6Jaji barik maminna kenanga dinen jaruma uraren, andian atena babainye dinen. Bua’ dinen dabele, kadaka. Maam di matana maam bea ikaan. Kenang bea bua’ dinen baguna pan. Pande manyuro’ manamu pasitimbangang jalu ajau’en nanna jalu maamen. Jaji barik bua’ dinen dala barik kole’a babainye dinen de’i, dakaan. Laloang daunjukang dinen barik sapa dua lo’a lakina. 7Barik maminna dakaan bua’ dinen kole’da’ duaan na’an lagi’ maam ka’ada’anda’. Datamu barik ratina kajau’anen, datamu tulendanga. Jaji mamin dinen dala daun araan barik. Dasusuk datiang kainda’.
8Jaji barik pamamalamen dinen di alowe’a matasoon, dadalinga barik lamba’a Alatala Yahuwe minjawe di tanamanen. Jaji barik dinen ira dua lakunyeen arari malamun di antarana akat kayuun. Alibak dakita kole’a Alatala Yahuwe. 9Jaji barik Alatala Yahuwe dinen mangalong lo’a babakaan, “Isako?” ingka kenang mangalonga.
10Jaji barik dasauti, “Indi’angak. Malamunak di antarana akat kayuun kole’a kudalingana lamba’u. Atakutak kole’a tulendangku’. Kosan kainku’,” ingka kenang manyautina babakaan.
11Jaji barik manjarum i Yahuwe lo’a, “Intain panamuangen lo’u, manyuro’ itamuna iko tulendangu?” ingka kenang. “Bua’ kupase’angen lo’u, ikaan iko de’i?” ingka kenang jaruma i Yahuwe.
12Jaji dasauti kole’a babaka dinen, “Kole’a babainyeen dinen yang imeangen iko di biringku’,” ingka kenang. “Dinen lalo de’i yang maunjukangen lo’ku’. Kukaan barik,” ingka kenang manjaruma babaka dinen lo’a i Yahuwe.
13Jaji manjarum barik Alatala Yahuwe lo’a babainye dinen, “Ai ipolana iko yang kenangen?” ingka kenang dinen i Yahuwe lo’a babainye dinen. “Kenangak lalo. Urar dinen yang makalen lo’ku’ manyuro’ angkaan bua’ dinen,” ingka kenang manjaruma babainyeen lo’a i Yahuwe.
14Jaji barik manjarum Alatala Yahuwe lo’a uraren dinen, “Di antarana inatang batiin nanna inatang bajinaken, iko poang yang kusumpataan kole’a karajanu dinen,” ingka kenang. “Daiko di’en saumur-umur tio’u meletu nanna batangu. Inang lapoang di tana’en marikar-ikara ulunu nanna baba’u,” ingka kenang. 15“Kusuro’kin sipangayoanen turun-manurun, ikin nanna babainyeen. Andian ona’ anak kanturunanna yang manimbaten lo’a ulunu. Daikopi ona’ to’ manotok timbatako,” ingka kenang manjaruma i Yahuwe lo’a uraren dinen.
16Maminna dinen lo’a babainyeen manjaruma, “Na, daiko barik di’en di arauntingu ona’, di aranaku, kusuro’ insang kaya apadisu. Poangsi, kapi awan dinen, na’anko to’ alibak lo’a lakinu. Mainya’ko bua. To’ daangkamko barik kole’a lakinu,” ingka kenang manjaruma i Yahuwe lo’a babainyeen dinen.
17Jaji manjarum bapi barik i Yahuwe lo’a babakaan, “Daiko di’en bua’ jalu kupase’angen, ikaan bua iko. Inang lalo dadua’u. Jarumku’ na’an ipaduli iko.#3:17 Nanga jaruma Alatala na’an ipaduli iki’ dinen lalo yang iasanen dosa. Laan alit ipaduliin iko jaruma bainyenu,” ingka kenang. “Kukutuki iak tana’en barik kole’a basanu dinen. Apadisko barik manyari gulungan jalu kaanen salangke-langke tio’u. 18Angkaannu barik okan lagi’ di tanaman di’en. Insaluanko manyariin jalu kaannu. Aparukko barik, umanu danu gulungan pati’en. Datio’i rimput. 19Apalo’ko aparuken, baru’ andian jalu ikaan iko. Kenang katio’annu sampai mondok di matenu, sampai mole’ko lo’a asal diri’u. Kole’a dinen asalu dari tana’en,” ingka kenang dinen i Yahuwe lo’a babakaan dinen.
20Jaji barik mulakata anak mantuariin dinen ialalo i Adam asanna. Jaji baki’ Adam dinen mameang asan lo’a bainyena, i Hawa asanna kole’a. Ratina daasan i Hawa kole’a gulungan anak mantuariin, piang Hawa kausa yang mangaturunangen. Ialalo iasanna i Hawa.#3:20 Ratina hawa, asal katio’anen.
21Jaji barik dinen Alatala Yahuwe mamola barik kain. Kain dinen dari kulit inatangen, dala parakaini lo’a baki’ Adam nanna piang Hawa.
22-23Jaji barik manjarum Alatala Yahuwe sama diri’a, “Na mantuariin di’en mamin padari sabalu’ nanka’. Datamu mamin ratina basa ajau’en nanna basa maamen,” ingka kenang manjarumina kalena. Barik anak mantuariin dinen daruru dari tanaman Eden, kole’a ingka jaruma, “Ada’ sampai dinen anak mantuariin manjaput bua’ pangatio’en, manyuro’ tio’ salaun-launna,” ingka kenang jaruma i Yahuwe sama diri’a. Ialalo daburona dari tanaman Eden. Arung aparuk barik. Dari tana’en asala, di tana’en bua barik aparuka.
24Mamin barik daburo mantuariin, andian suro’anna Alatala yang dasuro’ manyagai baba’ tanaman dinen bagian timur. Andian bea dinen pedang yang adale’en. Manyala-nyala pedanga urait kalaut mainto’ na’anna dapat tauen malaloi inang. Na’an dapat mondok lo’a bua’ pangatio’en.
Attualmente Selezionati:
Di Mulakata 3: EBE
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Copyright New Tribes Mission 1997
