Di Mulakata 4
4
Tutulanna baki’ Kain nanna baki’ Habel
1Jaji barik sarilao’a baki’ Adam nanna piang Hawa, araunting barik piang Hawa laloang aranak. Jaji anaka dinen babaka. Daasan barik anaka dinen i Kain. Kole’a ingka manjaruma piang Hawa, “Mamin kudua’ang anak kole’a panggulungina Alatala lo’ku’,” ingka kenang. Ialalo daasan barik i Kain.#4:1 Dalam jarum Ibraniin, kain dinen mainso’ unyina nanna jarum yang berartiin mandua’ang. 2Jaji barik mamin dinen araunting bapi. Daparanakang barik, babaka bapi. Anaka dinen daasan i Habel.
Jaji ira dua pariin dinen baraa. Mamin baraa, baki’ Kain dinen aruma. Jaji baki’ Habel dinen manuntuani dombaan. 3Jaji insa’-insa’ launna rabarik dakapulungang daia asela umana baki’ Kainen, sapa dua dameang lo’a i Yahuwe. 4Baki’ Habel dinen mameang bea lo’a i Yahuwe. Dauno’ dombana yang mulakataan daparanakangen kole’a induna. Ambata gulungan isina dinen yang bainyaken, dinen daunjukang lo’a i Yahuwe. Jaji barik baki’ Habel nanna pameanga dinen dasialoi kole’a i Yahuwe. 5Poangsi baki’ Kain dinen nanna pameanga, na’an dasialoi. Jaji barik arasi baki’ Kain, ajau’ lindo’a.
6Jaji barik manjarum i Yahuwe lo’a baki’ Kain, “Asi ajau’a lindo’u? Arasiko? Ada’ arasiin. 7Ati’enko malola’ani jalu yang maamen, kusialoiko. Ati’enko alibak malola’ani, mainso’ dosaan lo’u. Awan lalo dinen singaan maimpa’en di baba’ mambanganen lo’u, to’ angkaan lo’u,” ingka kenang. “Arungko manalo lo’a dosaan, ada’ko ataloon kole’a dosaan,” ingka kenang dinen i Yahuwe lo’a baki’ Kain.
8Jaji barik baki’ Kain dinen sijaruman nanna arina. Dawa di kosan ateengen. Maminna mondok di kosan ateengen, damansangi dinen arina. Dauno’ kole’a dinen ajau’a nyawana.
9Jaji barik maminna mate arina, manjarum barik i Yahuwe, “Disa arinu?” ingka kenang manjaruma lo’a baki’ Kain.
Jaji barik dasauti kole’a baki’ Kain, “Taua, na’an kutamu. Okan iak maruangiin lo’a,” ingka kenang.
10“Asi lo’a na’annu manamu? Ajau’ jaji basanu dinen. Dara’a arinu yang bairisen di tana’en kutamu. Balu’ jalu mangalongen lo’ku’ mamita idurusi,” ingka kenang. 11“Na, daiko di’en barik kusumpatako kole’a tana’en dinen yang maminen manyialoi lo’a dara’a arinu yang iduno’en iko. 12Tana’en dinen na’an mainya’ barasel lo’u barik. Kosan katio’annu dari tana’en. Tio’u lalo nyin-nyinggolong lo’a din lo’a din,” ingka kenang dinen i Yahuwe manjaruma lo’a baki’ Kain.
13Jaji manjarum bapi baki’ Kain manyauti lo’a i Yahuwe, “Ado, aborat tapat dinen ukumanku’. Baraa to,” ingka kenang. 14“Iruruak barik aso di’en dari tana’en. Na’anak dapat lagi’ aruma, na’anak lagi’ sidua’ nannu. Kenang bapi kosan barik kosanku’. Lamba’ak poang sasara banuaan. Intain ona’ sidua’en nanku’ tentu to’ mauno’ lo’ku’,” ingka kenang jaruma baki’ Kain lo’a i Yahuwe.
15Jaji barik dasauti dinen jaruma baki’ Kain kole’a i Yahuwe, “O na’an kenang. Kukamuroangko. Intain mauno’en lo’u, kubalas tuju kali lipat,” ingka kenang jaruma i Yahuwe. Jaji datandai barik dinen baki’ Kain mainto’ kosan tau barani mauno’ lo’a. 16Jaji baki’ Kain maminna maroi lo’a i Yahuwe, lamba’ barik lo’a daerah Nod. Nod dinen maro timur lo’a tanaman Eden.#4:16 Ratina Nod ilalam jarum Ibraniin, nyin-nyinggolong.
17Jaji sarilao’ baki’ Kain dinen nanna bainyena, barik araunting. Laloang aranak bainyena. Anaka dinen babaka. Daasan barik anaka dinen i Henok. Jaji barik baki’ Kain dinen mamola banua. Asanna banuaan dinen banua Henok malola’i lo’a asanna anaka. 18Baraa barik baki’ Henok, andian barik anaka babakaan, i Irad asanna. Mamin dinen andian bapi anaka i Irad, i Mehuyael asanna. I Mehuyaelpi dinen andian barik anaka, i Matusael asanna. Mamin dinen, andian anaka i Metusael, i Lamek asanna.
19Jaji i Lamek di baraana, dua bainyena. Yang seraan, i Ada asanna. Yang kaduaan, i Sila asanna. 20Jaji aranak dinen i Ada, babakaan, i Yabal asanna. I Yabal dinen yang manurunang ambata tau lalako’en di kakalang palamba’en, yang tau manuntuani inatangen. 21Mamin dinen andian bapi arina i Yabal, i Yubal asanna. Babaka bapi. I Yubal lalojo yang manurunangen tau manaba’ kecapiin nanna sulingen. 22I Sila dinen, aranak, babakaan, i Tubal Kain asanna. Karajana i Tubal Kain dinen, manampa ambata pakakas dari basi nanna tamagaan. Andian bapi arina i Tubal Kain babainyeen, i Naama asanna.
23Jaji dinen i Lamek banyanyi bagap lo’a arabainyena.
“O Ada, O Sila, taan talinganin, tanami nyawaan jalu idalingaan arabainyeku’e. Tau papadisiin lo’ku’, kuduno’ iak. Tau mabalen lo’ku’, kubalas. 24Ti’ awan baki’ Kain, tau mauno’en lo’a to’ dabalas kole’a Alatala tuju kali lipat. Daiakpi ti’ tau papadisiin lo’ku’, tuju pulo’ tuju kali lipat balasa,” ingka kenang gapa ilalam nyanyina.
25Jaji barik maminna matena i Habel, araunting bapi piang Hawa kole’a baki’ Adam. Jaji aranak barik dinen babakaan, i Set asanna.#4:25 Dalam jarum Ibraniin ratina set dinen daparuarang. Kole’a ingka jaruma piang Hawa, “Dameangak anak bapi kole’a Alatala itiang panyurang lo’a i Habel kole’a i Habel dinen dauno’ kole’a i Kain,” ingka kenang jaruma. Ialalo dasan i Set.
26Jaji barik dinen baki’ Set di baraana andian bapi anaka, i Enos asanna. Inang di tatakda’ lalo dinen mulakata tauen mangalonga lo’a Alatala masan i Yahuwe asanna.
Attualmente Selezionati:
Di Mulakata 4: EBE
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Copyright New Tribes Mission 1997
