Sak 2
2
Diyavage buraandu
1Baane ba Tayi, yenu badine gitu mu Fumwetu yibaase ne bunduumbe, Sesu Wusoolu, diyabile ne buraandu ve pwaase batu. 2Noonge ne wuyelige, dibagele didwaare bidwaari bivyogilile wunyi, ne mooru wu lor are nyingene gu dibuundu dyenu, disaandi ne dyo direnyingene ne maseengi. 3Yenu dikamonigi ke dibagele dine bidwaari bivyogilile wunyi nuyambile re: «Yivuunde, tsitsageli ve yitsige gi digobe!» Ne yenu direyambile disaandi re: «Yu, bile vave mutele» konane re: «Tsagele ve tsi, ve byoru byami». 4Vekavagi yenu nane, dikavagi buraandu ve ganegarenu ne dyo dikaritsigi re, yenu dikatsuundi maambu ke ne mataase mabive.
5Yulwanu baane ba Tayi badiroonde, Nzambi asesoole batu ba masaandi gu buloongu bubu mure bakebile bikiti mu gitu ne wudile bufumu bu Nzambi bugane yandi gu batu bakaroondi yandya? 6Te yenu, dikaleenzi disaandi. Nane bikiti re bibikakaambisi yenu ne bikayenzi yenu ve wusu misaambu, sare nana? 7Yawu sare babakaseengi dine didinyi dilugu yenwa?
8Nungyenze yenu digonevage bweedi ga digobise mugage wu bufumu bu Nzambi, nateendu dyo re: «Yiguroonde mbaatsyagu ga nakaroondi yu yibene#2.8 Mugaande wu Mugage 19.18..» 9Te yenu ga divage maambu ne buraandu, yenu dikavagi dibi, vavene yenu diguveegu mbele ne mugage mumbare yenu disegonegobise wo. 10Mumbare wukavoonguli irumu gimoosi gi mugage, nugobise mine myootsu, yandi ane mbele mu mugage wootsu. 11Yandi wuyambile re: «Yiyavage butswari», ayambile gaandi ne re: «Yiyaboke mutu». Ga yisavage butswari te yireboke mutu, yimavoongule mugage. 12Yambilanu ne vaganu maambu ga batu babaketsuundusu ne mugage wukayobuli. 13Mumbare Nzambi asakebile ne dingyebe vaketsuundise yandi mutu wuselabe bambaatsi dingyebe; te mutu ga alabe bambaatsi dingyebe, Nzambi ne yandi agulabe yandi dingyebe wisu wu mutsuundu.
Gitu giga ne biliimbe gikegifu
14Baane ba Tayi, tsoongu nde gi gu mutu mu wuyambile re ane gitu ga asaritsige gyo ne biliimbe? Gitu gyene girungule muyobula? 15Noonge ne wuyelige, mwaane tayi wu dibagele konane wu mugyetu asaandi ne bidwaari, nisi kure tsufu tsyootsu. 16Kere wumoosi ve pwaasenu areyambile yandi re: «Yende ne polu, yende gudwaare, ne munyamu wumunyi». Ga yenu disaveege yandi binandi ne nzale mu wudile monyu, tsoongu mabigu mene nde gi? 17Nane gaandi re na gitu: ga gibile ke gyo piinze guga biliimbe, gyo gikegifu gyo bene.
18Te gotsu mutu arungule wuyambile re: «Yu, yine gitu te me mane biliimbe!» Ritsige me gitu gyagu giga biliimbe, ne me maguritsige yu gitu gyami ne biliimbe byaami. 19Yine gitu re guke Nzambi moosya? Yine miluunge. Te manyunyi mabive ne mo, mane gitu gyene, makaregimi ne wome. 20Idungi gi! Yiroonde wuyabe nungyenze re gitu giga ne biliimbe gisaandi ne tsoongwa? 21Abaraam mukoku wetu aveege mwaanandi Isaak ve yivagulu gi malagu.#2.21 Mugaande wu Dibaandu 22.9. Kagu avagu re, ayi wusuungeme mu maambu mavage yandi, sare nana? 22Yigonelabe dyo: gitu gyandi ne biliimbe byandi biyendenge ke yiloonge, ne mu biliimbe byene, gitu gyandi gibile giga togu. 23Vane re ve supugu magoneyambile Mireendu mu yandi re: «Abaraam avage gitu mu Nzambi, ne Nzambi atube mu yandi re wusuungeme#2.23 Mugaande wu Dibaandu 15.6.» ne atsitse Abaraam re mbaatsyandi#2.23 Isayi 41.8.. 24Kagu yenu dimeyulusu re mutu akavagu re ayi wusuungeme mu biliimbe byandi, sake mu gitu piinze.
25Dyo dibile munoogu wumoosi ne Raabe, mugyetu nge yilaambe, Nzambi atube mu yandi re ayi wusuungeme mu dyaambu divage yandi, mumbare ayake bakime ba bisi Israel, ne ayamune yawu mu wurine mu nzile yimosi#2.25 Sosuwe 2.1-21.. 26Kagu nave nyuru yiga dinyunyi yifu, gitu giga ne biliimbe gikegifu.
Attualmente Selezionati:
Sak 2: SNQ
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES