1 યોહાન 3
3
1ભાળો, બા પરમેશ્વરેં આપં ઇપેર કેંવો પ્રેમ કર્યો હે, કે આપું હેંનં બેંટા-બીટી કેંવાજ્યે, અનેં ખરેખર આપું હેંનસ બેંટા-બીટી હે. એંતરે હારુ દુન્ય ન મનખં આપનેં પરમેશ્વર ન બેંટા-બીટી હે એંમ નહેં જાણતં, કેંમકે હેંનવેં પરમેશ્વર નેં નહેં જાણ્યો. 2હે વાલોં, હાવુ આપું પરમેશ્વર ન બેંટા-બીટી હે, અનેં હઝુ તક ઇયુ નહેં ખબર કે આપું કેંવં વેંહે. બસ આપું એંતરું જાણન્યે હે કે ઝર ઇસુ મસીહ ભાળવા જડહે તે આપું હુંદં હેંનેં જુંગેંસ વેંહે, કેંમકે આપું હેંનેં વેવોસ ભાળહું ઝેંવો વેયો હે. 3અનેં ઝી કુઇ મસીહ ઇપેર એંમ આહ રાખે હે, વેયો પુંતાનેં હેંનેં જેંમેંસ પવિત્ર કરે હે, ઝેંવો વેયો પવિત્ર હે.
4ઝી કુઇ પાપ કરે હે, વેયુ પરમેશ્વર ના નિયમ નો વિરોધ કરે હે, અનેં નિયમ નેં પાળવું ઇયોસ પાપ હે. 5તમું જાણો હે કે ઇસુ મસીહ મ કઇસ પાપ નહેં, અનેં વેયો દુન્ય મ એંતરે હારુ આયો કે પાપં નેં મટાડ દે. 6ઝી કુઇ મસીહ ની સંગતિ મ રે હે, વેયુ પાપ નહેં કરતું રેંતું. પુંણ ઝી કુઇ પાપ કરતુંસ રે હે, હેંને નહેં તે હેંનેં ભાળ્યો, અનેં નહેં હેંનેં જાણતું. 7હે સુંરોં, કુઇ બી તમનેં ભરમાવેં નેં સકે, ઝી ધાર્મિક કામં કરે હે, વેયુ મસીહ જુંગેંસ ધર્મી હે. 8ઝી કુઇ પાપ કરતુંસ રે હે વેયુ શેતાન ના કાબુ મ હે, કેંમકે શેતાન સરુવાત થીસ પાપ કરતો આયો હે. પરમેશ્વર નો બેંટો, શેતાન ન કામં નેં નાશ કરવા હારુ દુન્ય મ આયો. 9ઝી કુઇ પરમેશ્વર નું બેંટા-બીટી હે વેયુ પાપ નહેં કરતું, કેંમકે હેંનેં મ પરમેશ્વર નો સોભાવ હે. અનેં પરમેશ્વર હેંનો બા હે એંતરે હારુ વેયુ પાપ કરેંસ નહેં સક્તું. 10એંનેં થીસ પરમેશ્વર ન બેંટા-બીટી અનેં શેતાન ન બેંટા-બીટી વળખાએ હે, ઝી કુઇ ધાર્મિક કામં કરે હે અનેં વિશ્વાસી ભાઈ-બુંનં નેં હાતેં પ્રેમ રાખે હે વેય પરમેશ્વર ની તરફ થી હે.
એક-બીજા હાતેં પ્રેમ રાખો
11ઝી હમિસાર તમવેં સરુવાત થી હામળ્યો, વેયો આ હે કે આપું એક-બીજા હાતેં પ્રેમ રાખજ્યે. 12અનેં આદમ ના સુંરા કૈન નેં જેંમ નહેં બણો ઝી શેતાન ની તરફ થી હેંતો, ઝેંને પુંતાનાસ ભાઈ હાબિલ નેં માર દડ્યો. હેંને એંતરે હારુ માર દડ્યો કે હેંનં કામં ભુંડં હેંતં અનેં હેંના ભાઈ ન કામં ધાર્મિક હેંતં.
13હે વાલોં, અગર દુન્ય ન મનખં તમારી હાતેં નફરત કરે હે તે નવાઈ નેં કરતં વેહ. 14આપું જાણન્યે હે કે આપું મોત ની શક્તિ થી સુટેંજ્ય હે અનેં હાવુ આપડી કન અમર જીવન હે. કેંમકે આપું વિશ્વાસી ભાઈ-બુંન હાતેં પ્રેમ રાખજ્યે હે, ઝી પ્રેમ નહેં રાખતું વેયુ હઝુ તક મોત ના બંધણ મ હે. 15ઝી કુઇ વિશ્વાસી ભાઈ-બુંન હાતેં વેર રાખે હે, વેયો હત્યારો હે. અનેં તમું જાણો હે કે કઇના યે હત્યારા નેં અમર જીવન નહેં મળતું. 16ઇસુ મસીહવેં આપડી હારુ પુંતાનો જીવ આલ દેંદો, હેંનેં થીસ આપું પ્રેમ કરવો જાણન્યે હે, એંતરે હારુ આપડે હુંદું વિશ્વાસી ભાઈ-બુંન હારુ જીવ આલવો જુગે. 17અગર કુઇ ધનવાન વેહ અનેં વેયુ કઇનાક મનખ નેં જરુરત મ ભાળેંનેં, હેંનેં ઇપેર દયા નેં કરે તે પરમેશ્વર નો પ્રેમ હેંનેં મ રેં નહેં સક્તો.
18હે મારં વાલં બાળકોં, આપું વસન અનેં વાતં થકીસ નેં, પુંણ હાસ થી કામ કરેંનેં પ્રેમ કરજ્યે.
પરમેશ્વર નેં હામેં હિમ્મત
19હેંમ કરવા થી આપું જાણહું કે આપું હાસ ન હે, ઇવીસ રિતી પરમેશ્વર ની હામેં આપું આપડા મન મ ખાતરી મેંળવેં સકહું. 20અગર આપડું મન આપનેં દોષી ઠરાવે તે આપું જાણન્યે હે કે પરમેશ્વર આપડા મન કરતં મુંટો હે, અનેં વેયો ઝી આપું કરજ્યે હે વેયુ બદ્દુંસ જાણે હે.
21હે વાલોં, અગર આપડું મન આપનેં દોષી નેં ઠરાવે, તે આપનેં પરમેશ્વર નેં હામેં હિમ્મત થાએ હે. 22અનેં ઝી કઇ આપું પરમેશ્વર કન માંગજ્યે હે, વેયુ આપનેં આલે હે. કેંમકે આપું હીની આજ્ઞા માન્યે હે, અનેં ઝી હેંનેં અસલ લાગે હે વેયુસ આપું કરજ્યે હે. 23અનેં હીની આજ્ઞા આ હે કે આપું હેંના બેંટા ઇસુ મસીહ ના નામ ઇપેર વિશ્વાસ કરજ્યે, અનેં ઝેંવું હેંને આપનેં આજ્ઞા આલી હે હેંનેં પરમણે એક-બીજા હાતેં પ્રેમ રાખજ્યે. 24ઝી પરમેશ્વર ની આજ્ઞાવં નેં માને હે, વેયુ પરમેશ્વર મ અનેં પરમેશ્વર હેંનેં મ બણેં રે હે. અનેં હેંનેં થીસ એંતરે ઝી પવિત્ર આત્મા હેંને આપનેં આલ્યો હે, આપું જાણન્યે હે કે વેયો આપડી મ બણેંલો રે હે.
Attualmente Selezionati:
1 યોહાન 3: GASNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.