1 યોહાન 2
2
મસીહ આપડો મદદ કરવા વાળો
1હે મારં વાલં સુંરોં, હૂં આ વાતેં તમનેં એંતરે હારુ લખું હે કે તમું પાપ નેં કરો, અનેં અગર કુઇ પાપ કરે, તે આપડં પાપં ની માફી અલાડવા હારુ પરમેશ્વર બા કન આપડું વકીલપણું કરવા વાળો એક હે, એંતરે ધર્મી ઇસુ મસીહ. 2અનેં વેયોસ આપડં પાપં ને બદલે ભુંગ થાએંનેં આપનેં પાપં ની માફી આલી, અનેં ખાલી આપડી હારુસ નેં પુંણ આખી દુન્ય ન મનખં ન પાપં હારુ હુંદો ભુંગ થાયો. 3અગર આપું પરમેશ્વર ની આજ્ઞાવં નેં માનહું, તે હેંનેં થી આપનેં ખબર પડહે કે આપું હેંનેં સોક્કસ જાણન્યે હે. 4ઝી કુઇ એંમ કે હે, “હૂં પરમેશ્વર નેં જાણું હે,” અનેં હીની આજ્ઞાવં નેં નહેં માનતું, તે વેયુ ઝૂઠુ હે અનેં વેયુ પરમેશ્વર ની હાસ પરમણે નહેં સાલતું. 5પુંણ ઝી કુઇ હેંના વસન ઇપેર સાલે, હેંનેં મ ખરેખર પરમેશ્વર નો પ્રેમ પૂરો થાયો હે. એંનેં થીસ સોક્કસ આપું જાણન્યે હે કે આપું હેંનેં મ હે. 6અગર કુઇ એંમ કે હે કે હૂં પરમેશ્વર હાતેં જુંડાએંલો રું હે, તે હેંનેં હુંદું પુંતે ઝેંમ ઇસુ મસીહ રેંતો હેંતો હેંમેંસ રેંવું જુગે.
નવી આજ્ઞા
7હે વાલોં, હૂં તમનેં જૂનીસ આજ્ઞા લખું હે ઝી સરુવાત થી તમનેં મળી હે, આ જૂની આજ્ઞા વેયુસ વસન હે ઝેંનેં તમવેં હામળ્યુ હે કે એક-બીજા હાતેં પ્રેમ રાખો. 8તે હુંદો હાવુ હૂં તમનેં નવી આજ્ઞા લખું હે, કેંમકે ઇની હાસ મસીહ મ અનેં તમં મ હુદી ભાળવા જડે હે. કેંમકે ઇન્દારું મટતું જાએ રિયુ હે અનેં હાસ નું ઇજવાળું હાવુ ભભળવા મંડ્યુ હે. 9ઝી કુઇ એંમ કે હે કે હૂં ઇજવાળા મ હે પુંણ કઇનાક વિશ્વાસી ભાઈ ઇપેર વેર રાખે હે, વેયુ હઝુ તક ઇન્દારા મસ હે. 10ઝી કુઇ કઇનાક વિશ્વાસી ભાઈ ઇપેર પ્રેમ રાખે હે વેયુ ઇજવાળા મ રે હે, અનેં હેંનેં મ એંવું કઇ બી નહેં ઝેંનેં મ વેયુ ઠોકર ખાએ. 11પુંણ ઝી કુઇ કઇનાક વિશ્વાસી ભાઈ ઇપેર વેર રાખે વેયુ ઇન્દારા મ હે અનેં ઇન્દારા મ સાલે હે, અનેં વેયુ નહેં જાણતું કે કાં જું હે, કેંમકે ઇન્દારે હીની આંખેં આંદળી કરેં રાખી હે.
12હે સુંરોં, હૂં તમનેં આ એંતરે હારુ લખેં રિયો હે, કે ઇસુ મસીહ ના નામ થકી તમારા પાપ માફ થાયા હે.
13અનેં ઝેંતરા બા બણેં જાએંલા હે, હૂં તમનેં એંતરે હારુ લખેં રિયો હે, કે ઝી દુન્ય બણવા ની સરુવાત થી હે, તમું હેંનેં જાણો હે.
હે જુંવન્યોં, હૂં તમનેં એંતરે હારુ લખેં રિયો હે, કે તમવેં હેંના શેતાન ઇપેર જીત મિળવી હે,
હે સુંરોં, હૂં તમનેં એંતરે હારુ લખું હે, કે તમવેં બા પરમેશ્વર નેં જાણેં લેંદો હે.
14હે ઝેંતરા બા બણેં જાએંલા હે, હૂં તમનેં એંતરે હારુ લખું હે, કે ઝી દુન્ય બણવા ની સરુવાત થી હે, તમું હેંનેં જાણેંજ્યા હે.
હે જુંવન્યોં, હૂં તમનેં એંતરે હારુ લખેં રિયો હે, કે તમું મજબૂત થો, અનેં પરમેશ્વર નું વસન તમારી મ બણેં રે હે, તમવેં શેતાન ઇપેર જીત મિળવી હે.
દુન્ય નેં પ્રેમ નહેં કરો
15તમું નહેં તે દુન્ય ઇપેર અનેં નહેં દુન્ય ની વસ્તુવં ઇપેર પ્રેમ રાખો, અગર કુઇ દુન્ય ઇપેર પ્રેમ રાખે હે, તે હેંના મ બા પરમેશ્વર નો પ્રેમ નહેં. 16કેંમકે ઝી કઇ દુન્ય મ હે, એંતરે શરીર ની લાલસા અનેં આંખ ની લાલસા અનેં મિલકત નો ઘમંડ, વેયુ બા પરમેશ્વર ની તરફ થી નહેં પુંણ દુન્ય ની તરફ થીસ હે. 17દુન્ય અનેં હીની લાલસા બે યે મટેં રિયુ હે, પુંણ ઝી પરમેશ્વર ની મરજી પરમણે સાલે હે, વેયુ હમેશા જીવતું રેંહે.
મસીહ વિરુદી
18હે બાળકોં, આ સેંલ્લો ટાએંમ હે, અનેં ઝેંવું તમવેં હામળ્યુ હે, કે મસીહ નો વિરોધ કરવા વાળો આવવા નો હે, હેંને પરમણે હમણં હુંદા ઘણાસ મસીહ નો વિરોધ કરવા વાળા નકળેં આયા હે, એંનેં થી આપું જાણન્યે હે, કે ઇયો સેંલ્લો ટાએંમ હે. 19મસીહ નો વિરોધ કરવા વાળા આપડા ટુંળા મહાસ નકળ્યા હે, પુંણ વેયા આપડી સંગતિ મ નેં હેંતા, કેંમકે અગર વેયા આપડી સંગતિ મ હેંતા, તે આપડી હાતેં રેંતા. પુંણ વેયા એંતરે હારુ નકળેં જ્યા હે કે ઇયુ સાફ થાએં જાએ કે વેયા આપડી સંગતિ મના નહેં. 20પુંણ તમનેં મસીહ દુવારા પવિત્ર આત્મા આલવા મ આયો હે, અનેં હાસ નેં તમું બદ્દ જાણો હે. 21મેંહ તમનેં એંતરે હારુ લખ્યુ કે તમું હાસ નેં જાણો હે, અનેં ઇયુ હુંદું જાણો હે કે ઝી કઇ ઝૂઠ હે વેયુ હાસ ની તરફ થી નહેં. 22ઝૂઠુ કુંણ હે? ખાલી વેયુ ઝી ઇસુ નેં મસીહ હે, એંમ કરેંનેં નહેં માનતું. અનેં મસીહ નો વિરોધ કરવા વાળું વેયુસ હે, ઝી બા પરમેશ્વર અનેં હેંના સુંરા ઇસુ નો નકાર કરે હે. 23ઝી કુઇ પરમેશ્વર ના સુંરા ઇસુ નો નકાર કરે હે, હેંનેં કન બા પરમેશ્વર હુંદો નહેં, ઝી કુઇ પરમેશ્વર ના સુંરા ઇસુ નેં માન લે હે, હેંનેં કન બા પરમેશ્વર હુંદો હે. 24ઝર તમવેં ઇસુ મસીહ ઇપેર વિશ્વાસ કર્યો, તર ઝી હાસો હમિસાર તમવેં હામળ્યો, વેયોસ તમારી મ બણેં રે, અગર વેયો હમિસાર તમારી મ બણેંલો રે, તે તમું હુંદં બા પરમેશ્વર અનેં હેંના સુંરા મ બણેંલં રેંહો. 25અનેં મસીહવેં આપડી હાતેં વાએંદો કર્યો કે વેયો આપનેં અમર જીવન આલહે.
26મેંહ તમનેં ઇયે વાતેં હેંનં મનખં ના બારા મ લખી હે, ઝી તમનેં ઝૂઠુ શિક્ષણ આલેંનેં ભરમાવા ની કોશિશ કરે હે. 27પુંણ તમનેં મસીહવેં પવિત્ર આત્મા આલ્યો હે, વેયો તમારી મ બણેં રે હે, એંતરે હારુ તમનેં કેંનેં યે હાસ ના બારા મ હિકાડવાની જરુરત નહેં. પુંણ પવિત્ર આત્મા ઝી મસીહવેં તમનેં આલ્યો હે, વેયો તમનેં બદ્દી વાતેં હિકાડે હે, અનેં ઝી કઇ વેયો હિકાડે હે વેયુ પૂરી રિતી થી હાસું હે, અનેં ઝૂઠુ નહેં, એંતરે હારુ મસીહ નેં હાતેં સંગતિ મ બણેં રો, ઝેંવું કે પવિત્ર આત્માવેં તમનેં હિકાડ્ય હે.
પરમેશ્વર ન બેંટા-બીટી
28હાં, હે બાળકોં, મસીહ ની સંગતિ મ લગધર્ય બણેં રો, કે ઝર વેયો પાસો દુન્ય મ આવે તે હમનેં હિમ્મત થાએ, અનેં આપું હેંનેં આવવા થી હેંનેં હામેં લાજેં નેં મરજ્યે. 29અગર તમું જાણો હે કે વેયો ધર્મી હે, તે ઇયુ હુંદું જાણો હે કે ઝી કુઇ ધરમ નું કામ કરે હે વેયુ પરમેશ્વર નું બેંટા-બીટી હે.
Attualmente Selezionati:
1 યોહાન 2: GASNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.