MAWUTO HA WASU 17
17
Muongoye fo Paulo foamtsa shida Tesalonyikye
1Wekimaa ikuidya ipfo Amfipoli na Apolonyia wakashika Tesalonyikye, napfo kuweipfo sinagoge lya Wayuda. 2Nao Paulo kawuta chando aichiwie kahenda kowo ipfo mba kechideda nawo Sabato tsiṟaṟu kya shilya shii shiṟehye mṟehonyi fulya. 3Kawa mowatambaṟuya na iwadambuya ke nyi kiwewaṟi Kristo nahende iwawiṟo na iṟuka ko wapfu kaweṟingishya kehamba, “Yesu chu njimuongoya mbonyi tsake nyo nyio Kristo.” 4Maata-ho wakaidikya wakasanzya ora lo Paulo na Sila na Wagriki wahendeli sa wafoi na waka wa wanene chi weikenapfo. 5Na Wayuda walya wakalang'aa mnu wakahuṟa wambafu maata weketsinda ipfo tumo wakasanza mamwingi fo wandu wakaamtsa kitohyo kulya mṟinyi wakaringitia mba ya Yason wechiwapfula-ho wahende iwaduo oshangunyi lo wandu wa mṟi. 6Wamda walawakoya-pfo wakakuruo-pfo Yason kimu na wanawawama maata wakawaduo oshangunyi lo waitoṟi wa mṟi wakafihiṟa wakahamba, “Wandu wa wapfuluye wuyana wameshika na kunu. 7Na Yason kawaambya koke. Na iwa wose nyi wewuta shikapanyi na njowawaso tsa Kaisari wehamba ke nyi kwipfo mangi ingi elaho nyi Yesu.” 8Wakapfulutsapfulutsa mamwingi fulya fo wandu na waitoṟi wa mṟi ili waleicho isho. 9Wekimaa yambia fesa ya mriteke Yason na waodoe waleiwika yeritekya wuhendeli wowo wakawalekia.
Mbonyi tsa Berea
10Oweṟe cha ili na kio kilya wanawawama wakaduo Paulo na Sila kulya Beroya. Wekishika-pfo wakahenda sinagogeny lya Wayuda. 11Nawo wandu wa nyi wawei na sonu kota walya wa Tesalonyikye, nyi waleambya idedo na wulalutsu wose wakawa wesumasuma ipfo mṟehonyi mfiri yose kundu wawone koka shindo sho nyi wudo shii lohi. 12Nahonu wawo wafoi wakaidikya, na waka wa Wagriki wasuṟi na wasoṟo chi waangupfo. 13Kya indi Wayuda wa kulya Tesalonyikye wekishikio nyi mbonyi ke idedo lya Ruwa liongoyo nyi Paulo kulya Beroya wakahenda-pfo wechipfulutsa wandu na iwadosya nyashi. 14Oweṟe naalo wanawawama walya wakaduo Paulo kyaṟo kyemshitsa ohambeny lo ipalyipalyi, kya indi Sila na Timoteo wo wakatsinda-pfo. 15Nawo waleimya Paulo wakamshitsa Atene. Wekiidima yambya iwawaso lyedaya Sila na Timoteo ke ma walakeleo-pfo walamwosha owinyi wakakuwuya na kowo.
Paulo adeda na Waatene
16Paulo aipfo adi kechiwawedya kulya Atene kawona chando mṟi fulya fuichwo njofano, mumuyo foke fukapfuluko mnu. 17Naho kawa modeda na Wayuda na iwo waowoye Ruwa ipfo sinagogenyi, na wudo mfiri yose ipfo tumo orio sa wamekumbuhanana nao. 18Nahong'u wandu wa wulanyi wo Epikuro maata-ho na wa wulanyi wo Stoa wakasumbuhanana nao. Kuwepfo wehamba, “A mndu chu o Makideda nkyo iki akundi hamba?” Wengi wakahamba, “Nyi ai cha nyi moongwo mbonyi tsa waṟufu wahenu.” Nyi kipfa aweionguo ndumi ya sia ya Yesu na ya maṟukyonyi. 19Kyasia wakambada wakamduo kitoṟohu kya Aresi hando hededya chila wakahamba, “A ngesa lochiidima kumanyawo mloshye fu mhya nyi fo iki ifu ochekyelosha? 20Kyamba oendye madu hadu kindo kihenu, kyasia lukakundang'u imanya kindo ki nyi kyo iki uiluwia.” 21Nyi ilindi Waatene na wahenu waipfo walawode kyama kya kindo ma kimu shile nyi ilekya mbonyi na yadanya mbonyi tsa kindo kihya. 22Kyasia Paulo kahoṟoka alya kitoṟohu kya Aresi makiidi hawi kahamba, “Lanye womi wa Atene, njiwonyi nyo muwodo mnu nyi macha hewikya maruwa wuindi kya shindo shose. 23Lyandi mbeidaida kunu konu njechiambuya hando hanu hewikaho wuindi ndekoya rasyonyi lii liṟehyeho ke Ili lii lya Ruwa lilaichio. Kyasiang'u ichu nyo mokembikya wuindi ma mulamwichi rina nyio ichu njimwongoya. 24 Ruwa chu awikye wuyana wu na shindo shose shikeri-ho o ili ai Mndumii menyi ruwehu na wanda ii nechekeku kaya mahekalunyi haa mawike na mawokopfo. 25Ma echiwa ipfuṟukanyo nyi mawoko ha wandupfo cha ili awewuṟye kindo ma kimu. Cha kipfa nyio ainenga wose moo na yomuo mumuyo na shindo shose pyu. 26Nao nyio awikye ichu umu mopaṟa mkambo ya wandu yose wakahenda ilaa masangeny ha wanda ii hose, kekimaa iwateṟya maheri na mṟasa ya mkae yawo. 27Kundu wahende ipfula Ruwa na kikawa nyi kui iwadawada watane wamkoya. Nao kyake orio mndu chando lukeri aa nyi akeri ma kuleshe naopfo. 28Kyamba nyio ailuwawa ili lukukerye luwei na moo na ikupaya-paya-ho na ikukaya-ho luweiho. Na chando wateṟi wa shiimbo wa kikonu walewehamba ke, O naso luwei wa mbaṟi yake. 29Kyasiang'u kokoya so lui wa mbaṟi ya Ruwa ma lulakae lokusaṟa ke Ruwa afananyi na sahabu ang'u fesa ang'u iho nyisho shindo shii shisungusie kui wuarya na wuṟango wo wandu. 30Kyasiang'u Ruwa nyi awetsirilye matika halya kuiho wutondotondo. Kya indi komshika iya mandi ha wulalu nao awang'u motutuma wandu kudo kose ke wailachike mrima yawo. 31Nyi ili indi akuteṟye na mkonu foke msa arie icha idumbo nafo mondu fo wuyana wose kya wuhoṟotsu nafudumbuo na msoṟo ulya akumbikye-ho kechiitsya wandu wose mweke fomwidikya ili alemṟutsa wapfunyi.” 32Kyasia wekiicho kilya kya maṟukyenyi ha wapfu walya maata-ho wakakihalwo seko. Wengi-ho wakahamba, “Kyakyo lukundi icha ikuadanya lingi.” 33Kikasia Paulo kakure-ho kasamana nawo. 34Na wandumii maata-ho wo wakawadana nao wakashika iidikya. Ipfo kiidi kyawo kuwepfo meku o menge ya kitoṟo kya Aresi umu-ho rina lyake nyi Dionyiso na mka umu rina lyake nyi Damari na wandu wengi kimu nawo.
Paulo ai kulya Korinto
Attualmente Selezionati:
MAWUTO HA WASU 17: KIM2
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Kimochi Bible © Bible Society of Tanzania, 2016.
