MAWUTO HA WASU 16
16
1Kyasia Paulo kashika Deribe na Lisitra. Na ipfo koipfo o kiloshyonyi umu ewio rina lyake Timoteo ai mana o mka Myuda mwidiki na ndee nyi wei Mgriki. 2Timoteo cho awei mṟingishye mhendeli nyi wanawawama wai kulya Lisitra na Ikonio. 3Paulo kakunda ichu nahende imwimya kambada kamdina kimaduma nyi kya Wayuda walya wekeri mṟinyi iya, kyamba wose weichi ke ndee nyi Mgriki. 4Kikasia wechiida kulya mṟinyi iya wakawawawasya mdumbuye iya ya wasu na wameku wasongoru wa kulya Yerusalemu wairinge necha. 5Nahong'u siṟi tsilya tsikahenda kuwangya mwidikyenyi tsikaweengeṟa ing'ana mtalie fowo orio mkonu.
Paulo awonekio nyi Malaika kulya Troa
6Wakakyamya Furigia na Galatia wakaimo nyi Mumuyo Mwele ke walaongwo idedo ipfo Asia. 7Wekishika yafukya Misia wakahesha ke wahende Bitinia na Mumuyo o Yesu nalawawikye momu. 8Kyasia wakaida Misia wakasokya Troa. 9Nahong'u ili kio Paulo kawonesyo kiwonesyo kya mndu o kulya Makedonyia ahoṟoki-ho kamterewa kahamba, “Keambadyawo kya kunu Makedonyia uluikanyewo so!” 10Kikasia kekimaaa iwona kiwonesyo kilya oweṟe nalo lukakunda ikure luhende Makedonyia lutawukye imanya ke nyi Ruwa alulahye napfo kundu luhende iwaongoya ndumi ya sia ya okiio.
Ihaluka lya Lidia
11Nahong'u lukaira kyaṟo kya ngalawenyi luwuka Troa lukashika Samotrake na mteṟa fumu, ili lya ngama lukashika Neapoli. 12Na wuka ipfo lukashika Filipi nyifo mṟi mnene fo kihongo kilya kya Makedonyia fuu mlaṟe nyi Waroma. Lukaakaa mṟinyi ifu mkonu maata. 13Koikishika mkonu fo Sabato lukawuka na nja ya kichumi kya mṟi lukahenda wamba ya meda lukusaṟye ke hando ho nyi kuiho hando ha shiterewyo. Lukaadamia lukadeda na waka wawesanzi-ho. 14Mka umu ewio rina lyake nyi Lidia ai mka mokumba nguo tsa king'aring'ari ai o kikunyi kya Tiatira aowoye Ruwa kaluadanya. Nao Mndumii kamtambaṟwo ngoo naringe necha madedo halya hechidedo nyi Paulo. 15Kekiidima ipatiso o na wa kany koke kaluterewa kahamba, “Kokoya momenjikooya ke nawo njii mwidiki o Mndumii kekuidyenyi na kunu kanyi koko mukae-pfo.” Kaluitikaitika.
Paulo na Sila wawado
16Kikashika mandi lochihenda handu halya ha shiterewyo kisinga kika kikalukumbuhana kiwodo nyi mumuyo fo wulasha msa awembonya wenyi wake mbucha sa ing'anyi kui wulashi woke. 17O awekeoshana na Paulo naso numa kefihiṟa mnu kechihamba, “Aiwa wasoṟo wai masinga ha Ruwa chu o huye wai wemuongoya njia ya okiio!” 18Kawa mowuta ado mfiri ifoi. Na Paulo kapfuluko kainduka kawia mumuyo ulya, “Ngakuwawasa kui rina lya Yesu Kristo, wuka ko mndu chu!” Kambuka saa na iya. 19Kikasia wenyi wake wekiwona ke kikusiryo kya mbucha yawo kyamewadekya wakawada Paulo na Sila wakawakuruo wakawashitsa mengenyi ya mṟi oshangunyi lo wanene. 20Wakawadaya wachili wakahamba, “Wandu wa wawa mopfuluopfuluo mṟi fodu, nawo nyi Wayuda. 21Na yonguo wekeonguo mbonyi tsa shido sa shilawaṟi kodu ke lushiambye na ishiwuta lui Waroma.” 22Mamwingi fo wandu nafo fukawashimbya na wachili wakawaatuo nguo tsawo kui pfinya wakawawasa wakapo na shiteecho. 23Nawo wekiidima iwakapa ngapo sa tsifoi wakawashingya mba ya wapfungo wakawawasa mringi o mba ya wapfungo nawaringe na riso lya kyambuṟe. 24Nao kekiwawaso adi kawakumba kulya kiṟihenyi kya kiidi kawapfunga madende ho na matima. 25Kya indi kio aa madumbwo hawi Paulo na Sila waweiterewa Ruwa na imwimbya shiimbo shemṟumisha na wapfungo walya wengi waiho wechiadanya. 26Pereseng'u kukaida kidihingashi sa king'anyi na njomombo tsa mba iya ya wapfungo tsikatana tsawolawola na oweṟe mongo ikaṟuhuka na shipfunga shilya sha wandu wapfunge wose shikadawuka. 27Kyasia mringi ulya o mba ya wapfungo pang'u kapang'ka kawona mongo ya mba ya wapfungo ke nyi iṟuhukye kasomwo oshu ke nakuwahe akusaṟye ke kulako wandu walya wapfunge wose nyi wamedicha. 28Naho Paulo kakoṟoṟoma ilaha na ṟu ling'anyi echihamba, “Manya kulakutanye kiwicho, kyamba nahondo lui lose.” 29Nao kaduma taa kakupunguṟa kulya kiidi kechidedema kui wuowu kakuhutsa wanda na kyamu oo maṟdendenyi ha Paulo na Sila. 30Kawaende na nja kahamba, “Hoi wandumii wako, nyi kiki kinjikoe iwuta njikekukiṟyowo?” 31Nawo wakambia, “Keidikya Mndumii Yesu Kristo nalyo mochikukiṟyo na kanyi kopfo.” 32Wakawuya wakamwongoya idedo lya Mndumii wo na wa kanyi koke wose. 33Kawaambya saa na iya ya kio kawasanja kulyando wawewakape kahenda kupatisyo wo na wa kanyi koke wose oweṟe na lulya. 34Kawaende na ipfo mba koke kawaomoya shelya kachihio mnu wo na wa kanyi koke wose cha kipfa lyandi awonyi akuidikye Ruwa. 35Koikitambaṟuka waitoṟi wakaduma waṟundi wehamba, “Lekia wandu wo wakuhendye.” 36Mringi ulya o mba ya wapfungo kaongoya Paulo madedo ha ke waitoṟi nyi waduma wandu wemfunguo. Kyasia wulalu kuwukyenyi na nja mukuhendye na ofoṟo. 37Na Paulo kawawia, “Nyi walelukapa oshangunyilo wandu wose kulawode ma lomeanduyo, naso lui Waroma, wakawelukumba kipfungonyi, na wulalu wakundi iluwuta-pfo kui kiṟika? Manya! Chi wudopfo, wache wo wawenyi wache iluwutapfo.” 38Waṟundi walya wakahenda wakashitsya waitoṟi walya madedo ha. Nawo wakaowuo waicho ke nyi Waroma. 39Wakacha wakawalembalemba wakawaduo na nja, wakawaterewa wawuke kulya mṟinyi fulya. 40Nawo wakawuka kipfungonyi wakaida na kanyi ko Lidia. Wekiidima iwonana na wanawawama wakawawihiṟya moo wakakuhendyang'u.
Attualmente Selezionati:
MAWUTO HA WASU 16: KIM2
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Kimochi Bible © Bible Society of Tanzania, 2016.
