Kuvululelwa 1
1
1Loku hi kuvululwa ka Jesu Kristu, a nga nyikiwa hi Nungungulu lezaku a tivisa a malanza yakwe lezi zi ta nga humelela lokuloku. I lo ruma a ngelosi yakwe a ku ya zi kombisa ka Johani a nanza gakwe; Joh. 3:32
2loyi a mahako wukustumunyu makunu hi mhaka ya Nungungulu ni wumboni ga Jesu Kristu, hi zilo zontlhe lezi a zi wonileko. 1 Kor. 1:6; 1 Joh. 1:1
3I katekile loyi a gonzako a xiprofeto lexi, ni lava va zwako a timhaka ta xona, va hlayisa lezi zi tsalilweko kona; hakuva a xikhati xi laha kusuhani. Jak. 5:8; Lu. 11:28; Rom. 13:11
A marungula ka mabandla ya ntlhanu ni mambiri.
4Johani a rungula a mabandla ya ntlhanu ni mambiri ma nga le Asia, aku: A tipswalo ni kurula a zive na nwina zi tako hi ka yena Loyi a nga kona, Loyi a nga hi kona, Loyi a ta ngata, ni ka mimoya ya ntlhanu ni mimbiri leyi yi nga mahlweni ka xitshamu xakwe xa wuhosi; Ekso. 3:14; Zak. 3:9; Joh. 1:1
5ni ka Jesu Kristu, a kustumunyu a tsumbekileko, loyi a nga matewula ya vafileko, a Hosi ya tihosi ta misava. A ka yena loyi a hi ranzako, a nga hi tlhatlha zionhweni za hina hi nkhata wakwe, Joh. 8:14; 15:9; Efe. 1:20
6a hi maha hiva mufumo, ni vapristi va Nungungulu Dadani wakwe, a ka yena a kuve wudzunzo ni kufuma kala kupinzuka ni kupinzuka. Amen. 1 Tim. 6:16; 1 Ped. 2:5
7Langutani, wata hi marefu; a mahlo wontihe ma ta mu wona, na vona lava va nga mu tlhava; a vanhu va tixaka tontlhe ta misava va ta tiba zifuva loku va mu wona. Hizona. Amen. Dan. 7:13; Zak. 12:10; Joh. 19:37
8Hi mina Alfa na Omega, ku wula Hosi Nungungulu, Loyi a nga kona, Loyi a nga hi kona, Loyi a ta ngata, a Nyamintamu. Isa. 41:4; 44:6
9Mina makabye wa nwina Johani, tlhelo xihlengeli-kuloni kuxanisekeni ni le mufunweni ni kuhoniseleni loku ku nga ka Jesu, nzi wa hi le xihlaleni xi tibyako Patmosi, hi kota ya mhaka ya Nungungulu ni wukustumunyu ga Jesu. 2 Tim. 2:19; Fil. 1:7
10Nzi wa hi le moyeni hi siku ga Hosi, nzi lozwa lenzhako ka mina a gezu ga hombe, go khwatsi ga mpunzu, giku: Joh. 20:26; 2 Kor. 12:2
11Lezi u zi wonako zi tsale bhukwini, u gi rumela ka mabandla ya ntlhanu ni mambiri: le Efesusi; ni le Sinima, ni le Pergamumi, ni le Tiatira, ni le Sardisi, ni le Filadelfia, ni le Loadikea.
12Nzi lo hunzuluka a kuva nzi wona loyi nzi zwileko gezu gakwe na gi wulawula ka mina; na nzi hunzulukile nzi lo wona a ntlhanu ni timbiri a timeza ta nzalama to veka tikandiya. Zak. 4:2
13Laha xikari ka timeza ta tikandiya nzi lo wona wo kari wo fanana ni nʼwana wa munhu, na ambele a nguwo yo leha, yi bohilwe laha xifuveni hi bhandi ga nzalama. Ezek. 1:26; Dan. 7:13; 10:5
14A hloko yakwe ni misisi yakwe yi wa basile khwatsi hi woya go basa ga tiyivu, khwatsi hi gapongo; a mahlo yakwe a ma ku khwatsi malangavi ya nzilo; Dan. 7:9; 10:6
15a mikonzo yakwe yi wa kotisa suku wo ngangamela, khwatsi hi loku wu hisilwe nyunzwini; a gezu gakwe gi kotisa a guwa ga mati manyingi. Ezek. 1:7; 43:2
16Lomu canjeni gakwe ga xinene i wa hi ni ntlhanu wa tinyeleti ni timbiri; a nonwini wakwe ku lo huma a supado yo kariha ya wutlha gimbiri; a nghohe yakwe yi wa kota gambo loku gi ngangamela hi ntamu wa gona. Isa. 49:2; Miti. 26:13; Efe. 6:17
17Na nzi mu wonile nzi lowa lahasi mikonzweni yakwe nzi ku khwatsi nzi file. Yena i lo tlhateka canja gakwe ga xinene hehla ka mina, aku: U nga chavi, nzi Wa kusangula ni Wa kugumesa, Isa. 41:4; Ezek. 1:28; Dan. 10:10
18ni Loyi a hanyako. Nzi wa file, kanilezi makunu nza hanya kala kupinzuka; nzi na ni tipfhungulo ta kufa ni ta wutshamu ga vafileko. Tis. 68:20; Rom. 6:9
19Hikwalaho tsala lezi u zi wonileko, u tsala lezi zi nga kona makunu, ni lezi zi ta nga maheka anzhako ka lezi.
20A fihlakalo wa tinyeleti ta ntlhanu ni timbiri leti u nga ti wona canjeni ga mina ga xinene, ni timeza ta nzalama ta ntlhanu ni timbiri to veka tikandiya hi lowu: A tinyeleti ta ntlhanu ni timbiri hi tingelosi ta ntlhanu wa mabandla ni mambiri, ni timeza leti ta ntlhanu ni timbiri to veka tikandiya hi mabandla lawa ya ntlhanu ni mambiri. Zak. 4:2; Mat. 5:15
Attualmente Selezionati:
Kuvululelwa 1: TSC72
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Tshwa Bible © Bible Society in Mozambique, 1972, 2007.
