Juda 1
1
1Mina Juda, nzi nga nanza ga Jesu Kristu, a nakulobye wa Jakobe, nza rungula lava va vitanilweko, va nga lava va ranzekako ka Nungungulu Dadani, va hlayiselweko Jesu Kristu, nziku: Lu. 6:16; Joh. 17:11; Rom. 1:7
2A wuxinji ni kurula ni liranzo a zi anziswe ka nwina. A ku lwela kukholwa.
3Varanzekako, kota lezi nzi pangamileko a ku mu tsalela hi mhaka ya kukholwa ka hina hontlhe, nzi yimelwe hi ku mu tsalela nzi mu khongotela lezaku mu lwela a kukholwa loku ku nyikilweko kanwe ka vobasa. Fil. 1:27; Tit. 1:4
4Hakuva ku enghenile vanhu vo kari hi xihundla, lava ku tsalilweko kale ha vona lezaku va ta koneka kulamulweni, mbanhu va nga chaviko Nungungulu, va hunzula tipswalo ta Nungungulu wa hina va ti yisa wubhayini va kaneta loyi a nga yena Nwinyi wa hina ni Hosi, Jesu Kristu. Rom. 9:21; 2 Ped. 2:10; 1 Joh. 2:22
A kulamula.
5Makunu nza ranza ku mu alakanyisa, hambu lezi mu sinako mu tiva a mhaka ya kona, lezaku laha a Hosi na yi hanyisile a vanhu va yona, yi va humesa tikweni ga Gipite, yi tlhelile yi lovisa lava va nga kholwiko. Mitse. 14:29; 1 Kor. 10:9
6Ni tingelosi leti ti nga kala ku gonga a wuhosi ga tona, ti siya kaya ka tona, yena i ti hlayisile makhotsweni ya pinzukelwa ya munyama kala sikwini ga hombe ga kulamulwa. 2 Ped. 2:4; Kuv. 20:10
7Kota Sodoma ni Gomora ni miti ya kona, leyi yi nga ti nyikela wubhayini, ni ku lanzela nyama ya hava, yi yimisilwe a kuva xikombiso, yi tsayiswa hi nzilo wa pinzukelwa.
8Hizalezo ni vanhu lava, va nyenyezisa a nyama yabye hi miloro yabye, va kanyisa wuhosi ga le tilweni, va sola ni lava va nga kungangameleni. Ekso. 22:28
9Kanilezi Mikaeli, a ngelosi ya hombe, laha a nga kanetana na Satani hi xirumbi xa Mosi, i lo chava ku mu lamula hi nzhukano, kanilezi i te ngalo: A Hosi a yi ku kawuke. Dan. 12:1; Zak. 3:2; 2 Ped. 2:11
10Kanilezi a vanhu lavo va rukatela zontlhe lezi va nga zi tiviko; ni lezi va zi pimako hi mahanyela, khwatsi hi zihari zi nga hiko na kupima, va ti lovisa ha zona. 2 Ped. 2:12
11Khombo a give ka vona! Hakuva va fambile hi ndlela ya Kana, hi kota ya hakhelo va tsutsumela kuhambukeni ka Balami, va lobyiswa hi kuhluwuka ka Kora. Gen. 4:5; Mitse. 16:1; 22:7, 21
12Lava hi vona va nga makhwanga mibuzweni ya nwina ya liranzo, laha va gako zinwe na nwina a va chavi ku lonzola. Va hi marefu ma nga hiko na mati, ma kukuletwako hi timheho; va fanana ni tisinya a xikhatini xa wuxika ti nga hiko na mihanzu, ti womileko kumbiri, ti tsuwulwa ni mitsu; Mav. 25:14; 1 Kor. 11:21; 2 Ped. 2:13
13va hi mabyandlati ma gobhozako ya bimbi, lawa ma pupumako a khuvi ga tingana tabye; va hi tinyeleti ti nzulanzulako, leti ti vekelweko a munyama wo tshisa kala kupinzuka. Isa. 57:20; 2 Ped. 2:17
14Na Enoki, a wa wuntlhanu ni wumbiri ku sukela ka Adamu, i lo profeta ha vona, aku: Langutani, a Hosi yata zinwe ni vobasa va yona va makume ya mazana, Gen. 5:18; Deut. 33:2; Dan. 7:10
15a ku ta lamula vontlhe, yi kona vontlhe lava va nga chaviko Nungungulu hi kota ya mitiro yabye ya kubiha leyi va yi mahileko, yi tlhelisela a vaonhi hi kota ya magezu wontihe ya matshanza va yi rukateleko ha wona.
16Lava hi vona va kalalako ni ku monya, lava va fambako kumbilukeleni kabye, a milomu yabye yi wulawula wukhuxu, va hlawula vanhu hi kota ya bhinzu. 2 Ped. 2:18
17Kanilezi nwina, varanzekako, alakanyani a timhaka leti ti nga kanelwa a kale hi vapostoli va Hosi ya hina Jesu Kristu;
18laha va nga ku ngalo ka nwina: Hi xikhati xa kugumesa ku tava kona a vatseketseli, lava va fambako hi kumbilukela kabye ka kubiha. 1 Tim. 4:1
19Lavo hi vona va vangako kuhambana, va nga va ka nyama, va nga hiko na Moya. Mat. 18:1; Jak. 3:16
20Kanilezi nwina, varanzekako, ti akeni kukholweni ka nwina loku ku basileko, mu khongela hi Moya wa ku Basa; Kol. 2:7
21mu ti hlayisa liranzweni la Nungungulu, na mu cuwukela a wuxinji ga Hosi ya hina Jesu Kristu legi gi yisako kuhanyeni ka pinzukelwa.
22Va zweleni wuxinji a vanwani lava va kanakanako;
23mu hanyisa vanwani, mu va okola nzilweni; a vanwani mu va hawukela hi kuchava, na mu venga hambu ni nguwo leyi yi nyenyezisilweko hi nyama. Zak. 3:2, 4; Rom. 11:14; 1 Tim. 4:16
24Makunu loyi a nga ni ntamu wo mu hlayisa kasi mu nga khunguvanyeki, a mu yimisa na mu nga hi na nanzu mahlweni ka kungangamela kakwe na mu kari mu tsaka, Efe. 3:20; Kol. 1:22
25a ka Nungungulu leyi wa munwe a nga Muhanyisi wa hina ha Jesu Kristu, a Hosi ya hina, a kuve wudzunzo, ni wukulu, ni kufuma, ni ntamu, na zi nga seva kona zikhati, ni makunu, ni ku kala kupinzuka. Amen.
Attualmente Selezionati:
Juda 1: TSC72
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Tshwa Bible © Bible Society in Mozambique, 1972, 2007.