Kuvululelwa 2
2
1Tsalela a ngelosi ya bandla ga le Efesusi, uku:
Loyi a khomileko a ntlhanu wa tinyeleti ni timbiri canjeni gakwe ga xinene, loyi a fambako xikari ka timeza ta nzalama ta ntlhanu ni timbiri to veka tikandiya, i ngalo:
2Nza yi tiva mitiro ya wena, ni kupinyama ka wena ni kutimisela ka wena, ni lezaku a ku na kuhonisela hi vanhu va kubiha; u va hlolile lava va ti wulako vaku vapostoli, na va nga hi vona, u kumile lezaku vo hemba. Tis. 1:6; 2 Kor. 11:18; 1 Joh. 4:1
3U na ni kutimisela, na u xaniseka hi kota ya vito ga mina, a ku karatangi.
4Kanilezi nzi na ni xisolo lexi ha wena, lezaku u tsikile a liranzo la wena lo sangula.
5Hikwalaho alakanya laha u wileko ha kona, u hunzuluka, u maha mitiro yo sangula; loku u nga mahi lezo nzi tata ka wena, nzi ta susa a meza ya wena ya kandiya a wutshanwini ga yona, loku u nga hunzuluki. Mat. 21:41
6Kanilezi wudzunzo ginwe u nga nago, gaku wa venga a mitiro ya vaNikolatani, leyi nzi yi vengako na minawu.
7Loyi a nga ni tindleve, ngha a ingisa lezi a Moya wu byelako mabandla. Loyi a hlulako nzi ta mu nyika a kuva aga sinya ya wutomi, leyi yi nga kona Paradiseni ga Nungungulu. Gen. 2:9; Mat. 11:15; Xip. 22:2, 14
8Tsalela a ngelosi ya bandla ga le Smirna, uku:
Loyi wa kusangula ni wa kugumesa, loyi a nga file a tlhela a hanya, i ngalo:
9Nza tiva a kuxaniseka ka wena, ni wusiwana ga wena, kasi lezo u fumile, ni ku rukatelwa hi vona lava va nge ngalo vaJuda, na va nga hi vona, kanilezi na va hi va sinagoga ga Satani. Lu. 12:21; Rom. 2:17; Xip. 3:9
10U nga chavi nchumu ka lezi u ta nga xaniseka ha zona. Languta, Satani i ta khotsela vanwani va nwina paxweni, a kuva mu ringiwa, mu xaniswa khume ga masiku. Tsumbeka kala kufeni, nzi ta ku nyika xidlodlo xa wutomi. Mat. 10:22; 24:13; Jak. 1:12
11Loyi a nga ni tindleve, ngha a ingisa lezi a Moya wu byelako mabandla. Loyi a hlulako a nga ta bayiswa hi kufa ka wumbiri. Xip. 20:14; 21:8
12Tsalela a ngelosi ya bandla ga le Pergamumi, uku:
Loyi a nga ni supado yo kariha ya wutlha gimbiri, i ngalo:
13Nza ku tiva laha u tshamako kona, laha xi nga kona a xitshamu xa wuhosi xa Satani. Hambu zi hi tano, u khomisile a vito ga mina, a ku kanetangi a kukholwa ka mina, hambu masikwini ya Antipasi, a kustumunyu wa mina a kholekileko, loyi a nga dawa xikari ka nwina, laha Satani a akileko kona.
14Kanilezi nzi na ni zisolo zinwani ha wena, hakuva laho u na ni vanwani lava va namarelako a gonzo ya Balami, loyi a nga gonzisa Balaki a ku veka xikhunguvanyiso mahlweni ka vanana va Israeli, lezaku vaga zakuga lezi zi phahlelweko zifananisweni, ni ku bhaya. Mitse. 25:1; Miti. 15:29; 1 Kor. 8:9
15Hizalezo u navo vanwani lava va namarelako kugonziseni ka vaNikolatani.
16Hunzuluka! Loku u nga hunzuluki nzi ta hatlisa nzita ka wena, nzi talwa navo hi supado ya nomu wa mina. Isa. 11:4; 2 Tes. 2:8
17Loyi a nga ni tindleve, ngha a ingisa lezi a Moya wu byelako mabandla. Loyi a hlulako nzi ta mu nyika a manna ma fihlilweko, nzi mu nyika ni ribye go basa, legi ku tsalilweko ka gona a vito giswa; a ku na munhu a gi tivako, saseka loyi a gi amukelako. Xip. 19:12
18Tsalela a ngelosi ya bandla ga le Tiatira, uku:
A Nʼwana wa Nungungulu loyi a nga ni mahlo yo khwatsi malangavi ya nzilo, ni mikonzo yo khwatsi i suku wu ngangamelako, i ngalo:
19Nza yi tiva mitiro ya wena, ni liranzo la wena, ni kukholwa ka wena ni kutira ni kutimisela, ni lezaku mitiro ya wena yo gumesa yi hunza leyi yo ranga.
20Kanilezi nzi na ni xisolo lexi ha wena, lezaku u vumela Jezebeli, a wasati loyi a ti wulako ku muprofeti, a gonzisa ni ku xengetela a malanza ya mina a kuva ma bhaya, ni kuga nyama yi phahlelweko zifananisweni. Ekso. 34:15; 1 Tih. 16:31; Miti. 15:20
21Nzi mu nyikile xikhati a kuva a hunzuluka, kanilezi a nga zi ranzi a ku hunzuluka kubhayeni kakwe. Rom. 2:4
22Languta, nzi ta mu wisela sangweni ga wubabyi, ni ku yisa lava va bhayileko naye kuxanisekeni ka hombe, loku va nga hunzuluki mitirweni yakwe.
23A vana vakwe nzi ta va daya hi kufa; zonake a mabandla wontihe ma ta zi tiva lezaku hi mina nzi hlolako tiswa ni timbilu, nzi ta nyika munwe ni munwani wa nwina khwatsi hi mitiro yakwe. 1 Sam. 16:7; Tis. 62:12; Rom. 2:6
24Kanilezi ka vanwani va nwina va nga le Tiatira, nwentlhe lava mu nga vumeliko a gonzo leyi, lava mu nga tiviko a kueta ka Satani, kota lezi va wulako vona, mina nzi ngalo: Nzi nga ta mu rwexa munwani nzhwalo, Miti. 15:28
25ntsena khomisisani lezi mu nga nazo nzi kala nzi chikela.
26Loyi a hlulako, a kholeka mitirweni ya mina kala kugumesa, nzi ta mu nyika ntamu hehla ka matiko. Mat. 19:28; Joh. 6:29; 1 Kor. 6:3
27I ta ma risa hi nhonga ya xiketse, a ma fayetela zipanzana khwatsi hi zibya za wumba; khwatsi hilezi na minawu nzi nga nyikiswa zona hi Dadani wa mina. Tis. 2:8, 9; Dan. 7:22
28Nzi ta mu nyika Mahlahle wa mixo. Xip. 22:16
29Loyi a nga ni tindleve, ngha a ingisa lezi a Moya wu byelako mabandla.
Attualmente Selezionati:
Kuvululelwa 2: TSC72
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Tshwa Bible © Bible Society in Mozambique, 1972, 2007.
