1 Va le Korinte 10
10
VaKorinte ca lulekwa xungetano ni zifananiso.
1Vamakabye, nza ranza lezaku mu zi tiva ku ngalo, a vakoko vontlhe va hina va wa hi lahasi ka refu, vontlhe va lo tsemakanya bimbi; Ekso. 13:21; 14:22; Isa. 63:11
2vontlhe va lo bapatizelwa ka Mosi a refini ni lomu bimbini;
3vontlhe va loga a kuga kunwe ka moya; Ekso. 16:15; Joh. 6:32-56
4vontlhe va lonwa a kunwa kunwe ka moya; hakuva va lonwa ribyeni ga moya legi gi nga va pangalata; a ribye lego gi wa hi Kristu. Ekso. 17:6; Mitse. 20:11; Tis. 78:15; Joh. 4:10; Kuv. 22:17
5Kanilezi a linyingi labye Nungungulu i wa nga tsaki ha vona, hi kota ya lezo va lo lobyiswa xiwuleni.
6Lezi zilo za hi laya lezaku kasi hi nga naveli a zilo za kubiha, kota lezi vona va nga navela.
7Mu ngavi vakhozeli va zifananiso, khwatsi hi vanwani va vona; kota lezi ku tsalilweko, ku ngalo; A vanhu va lo tshama lahasi vaga, vanwa, va suka va hlakana. Ekso. 32:6
8Ngha hi nga mahi wubhayi kota vanwani ya vona va nga maha wubhayi, vafa hi siku ginwe 23,000 wa vanhu. Mitse. 25:1
9Ngha hi nga ringi Hosi, kota vanwani va vona va nga yi ringa, va dawa hi tinyoka. Ekso. 17:2, 7; Mitse. 21:6
10Kambe mu nga monyi, kota vanwani va vona va nga monya, va lobyiswa hi mudayi.
11Zontlhe lezi zi lo humelela ka vona kasi ku maha xikombiso, zi lo tsaliwa kasi ku hi luleka, hina lava hi chikelelweko hi zikhati zo gumesa. Rom. 15:4; Maheb. 10:25
12Hikwalaho loyi a alakanyako lezaku i yimile, a ti wonele, a nga dzuka awa.
13A mu se nga humelwa hi nzhingo ahandle ka lowu munhu a wu kotako ku rwala; Nungungulu i tsumbekile, a nga ta vumela a kuva mu ringwa ku hunza a ntamu wa nwina; kanilezi i ta mu mahela a ndlela ya kupona loku wuta nzhingo, kasi mu ta zi kota ku wu rwala. Jer. 29:11; 2 Ped. 2:9
14Hikwalaho varanzekako, chavani a ku khozela zifananiso.
15Nzi wulawula ku khwatsi hi ka lava va tlharihileko; pimani nwina venyi lezi nzi zi wulako.
16A gombe ga zikatekiso legi hi gi khesako, a hi gona ga hlengelo wa nkhata wa Kristu ke? Ni xibaba lexi hi xi khemako a hi xona xa hlengelo wa miri wa Kristu ke? Mat. 26:26; Miti. 2:42
17Lezi ku nga ni xibaba xinwe, hina hi nga vanyingi hi miri munwe, hakuva hina hontlhe higa xibaba xwalexi xa xinwe. Rom. 12:5
18Langutani a vaIsraeli hi ka nyama: vona lava va gako miphahlo a va hlengeli ni alati ke? Levi 3:3; 7:15; Rom. 4:12
19Zonake nzi yini ke? Lezi zi phahlelweko zifananisweni i nchumu ke? Kutani xifananiso i nchumu ke?
20Ahihi, kanilezi nziku, lezi a vamatiko va zi phahlelako, va phahlela madimoni, a va phahleli Nungungulu; a nzi zi ranzi lezaku mu hlengela ni madimoni. Deut. 32:17
21A mu zi koti kunwa a gombe ga Hosi ni gombe ga madimoni; a mu zi koti ku gela mezeni ya Hosi, ni mezeni ya madimoni, Deut. 32:38; 2 Kor. 6:15
22Xana ha yi vuxela xiluse a Hosi ke? Xana ha yi hunza hi ntamu ke? Ekso. 22:14
Mahani zontlhe ziva kudzunzwa ka Nungungulu.
23Zontlhe zilo zi vumelekile, kanilezi a hi zona zontlhe zi vunako. Zontlhe zilo zi vumelekile, kanilezi a hi zona zontlhe zi akako.
24Ngha na munhu a nga ti laveli a zakwe ntsena, kanilezi munwe ni munwani a mu lavele a kusasa a waakelane wakwe. Rom. 15:1
25Zontlhe lezi zi xaviswako bazarini, ganani; mu nga wutisi nchumu hi kota ya livalo.
26Hakuva a misava nja Hosi, ni zontlhe zi nga ka yona. 1 Tim. 1:4
27Loku munwe wa lava va nga kholwiko a mu ramba mubuzweni, na mu ranza a kuya, ganani zontlhe lezi zi vekiwako mahlweni ka nwina, mu nga wutisi nchumu hi kota ya livalo. Lu. 10:7
28Kanilezi loku munhu aku ka nwina: Lezi zi phahlelwe zifananiso, mu ngagi hi kota ya yena loyi a mu tivisileko, na hi kota ya livalo. Deut. 10:14; Xip. 8:10
29A nzi wuli a livalo la wena, kanilezi a la munwani; hakuva a kutlhatlheka ka mina ku nga lamuliswa kuyini hi livalo la munwani ke? Rom. 14:16
30Hakuva loku nziga hi kubonga, nzi solelwa yini hi lezi nzi bongileko ha zona ke?
31Hikwalaho loku muga, kutani munwa, kani hi xihi lexi mu xi mahako zi maheni zontlhe ziva kudzunzwa ka Nungungulu. Zak. 7:6; Mat. 5:16; Joh. 15:8; Tit. 1:11
32Mu nga mahi xikhunguvanyiso ka vaJuda, hambu ka vaGreki, kutani bandleni ga Nungungulu;
33khwatsi hi lezi na minawu nzi tsakisako vanhu vontlhe zilweni zontlhe, nzi nga ti laveliko lezi zi vunako mina, kanilezi nzi lava lezi zi vunako laʼvo tala, lezaku va fela ku hanyiswa.
Attualmente Selezionati:
1 Va le Korinte 10: TSC72
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Tshwa Bible © Bible Society in Mozambique, 1972, 2007.