1 Va le Korinte 9
9
A tifanelo ta mupostoli.
1Xana a nzi tlhatlhekangi ke? A nzi mupostoli ke? A nzi wonangi Jesu a Hosi ya hina ke? Nwina a mu ntiro wa mina Hosini ke? Miti. 9:3; 18:9; 1 Tim. 2:7; 2 Tim. 1:11
2Loku nzi nga hi mupostoli ka vanwani, ka nwina nzi yena; hakuva nwina mu xitiyiso xa wupostoli ga mina Hosini. 2 Kor. 3:2
3A kutihlamulela ka mina ka lava va nzi lamulako hi loku:
4A zi hi faneli hina a kuga ni kunwa ke? 2 Tes. 3:9
5A hi na fanelo hina ku fambafamba na hi hi ni sati loyi a nga mukholwa, a ku khwatsi hi vanwani vapostoli, ni vanakulobye va Hosi, na Kefasi ke? Mat. 8:14; 13:55; Mar. 6:3; Lu. 6:15; Gal. 1:19
6Kutani hi mina nzoce na Barnabasi, lava hi nga hiko na fanelo ya ku tsika a ku ti tirela ke?
7Hi gihi sochwa gi yako yimpini hi mali ya gona ke? Himani a byalako xivina na a ngagi: a mihanzu ya xona ke? Kutani a risako ntlhambi, na a ngagi a masi ya ntlhambi ke? Deut. 20:6; Joh. 21:15; 2 Kor. 10:4
8Xana nzi wula lezi khwatsi hi kuwula ka vanhu ke? A nayo a wu wuli zona ke?
9Ku tsalilwe nayweni wa Mosi, ku ngalo: U nga bohi a nomu wa homu laha yi hulako timbewu. Xana hi lezaku Nungungulu o tsetsa a tihomu ntsena ke? Deut. 25:4
10A nga wuli lezo hi kota ya hina kambe ke? Ina, zi tsalilwe hi kota ya hina lezaku: Loyi a rimako i fanelwe ku rima hi kutsumba, ni loyi a hulako i yimelwe hi ku hula na a tsumba lezaku i ta aveliwa na yenawu. 2 Tim. 2:6
11Loku hina hi mu xwanyele a zilo za ka moya, xana xi ngava xilo xa hombe loku hi tshovela ka nwina a zilo za misava ke? Rom. 15:27
12Loku vanwani va hi ni fanelo leyi xikari ka nwina, xana hina a hi hunzisi ke? Ahembaloko a hi tirisangi a fanelo leyi, hakuva hi timisela zilo zontlhe, kasi hi nga veki xikhubekiso ka ivangeli ya Kristu. 2 Kor. 11:7
13Xana a mu zi tivi lezaku lava va tirako tempeleni vaga a zilo za tempeli, ni lezaku lava va tirako alatini va kuma xiavelo zinwe ni alati ke? Levi 6:16
14Hizalezo a Hosi yi leletele lezaku lava va kanelako ivangeli va ta hanya hi ivangeli. Lu. 10:7; Gal. 6:6; 1 Tim. 5:7
15Kanilezi mina a nzi ti vunangi hi xinwe xa lezi zilo. A nzi tsali lezi lezaku kasi nzi fela ku mahelwa lezo; hakuva i chukwana ka mina a kuva nzifa, ku hunza lezaku munhu a nzi tekela a wudzunzo ga mina.
16Hakuva loku nzi kanela ivangeli, a nzi na nchumu lowu nzi nga ti dzunzako ha wona; hakuva nzi yimelwe hi ku maha lezo, ina i khombo ka mina loku nzi nga kaneli ivangeli.
17Hakuva loku nzi maha lezo hi kuranza ka mina, nzi na ni hakhelo; kanilezi hambu nzi nga zi mahi hi kuranza ka mina, nzi yimiselwe wona a ntiro wa wunekwa. Gal. 2:7; Fil. 1:17; Kol. 1:25
18Hi yini a hakhelo ya mina ke? Hi lezaku loku nzi kanela ivangeli nzi maha ivangeli yi nga rihiswi, hakuva a nzi ti vuni hi fanelo yontlhe ya mina ka ivangeli.
19Hakuva hambu lezi nzi nga tlhatlhekile ka vanhu vontlhe, nzi lo ti maha nanza ga vontlhe, lezaku kasi nzi fela ku kuma vanyingi. Mat. 18:15; Gal. 5:13; 1 Ped. 3:1
20A ka vaJuda nzi wa ku khwatsi nzi muJuda; ka vona lava va nga lahasi ka nayo, nzi wa ku khwatsinzi lahasi ka nayo, na nzi nga hi lahasi ka nayo, kasi nza fela ku kuma lava va nga lahasi ka nayo. Miti. 16:3; 21:23
21Ka vona lava va nga hiko na nayo, nzi wo khwatsi a nzi na nayo (na nzi nga hi loyi a nga hava nayo wa Nungungulu, kanilezi na nzi hi nayweni wa Kristu), kasi nza fela ku kuma lava va nga hiko na nayo. Rom. 2:12; Xip. 7:22; Gal. 3:2
22Ka vona lava va gome nzi lo maha wa gome, kasi nzi fela ku kuma lava va gome. Nzi lo ti maha zontlhe ka vanhu vontlhe, kasi hi ku maha lezo nzi fela ku hanyisa vanwani. Rom. 15:1
23Nzi maha zontlhe lezo hi kota ya ivangeli, kasi nzi fela ku kuma xiavelo ka yona zinwe navo.
24A mu zi tivi lezaku lava va palisanako ku tsutsuma va tsutsuma vontlhe, kanilezi munwe ntsena a amukelako a nchachazelo ke? Tsutsumani kota yena, kasi mu fela ku wu kuma. Maheb. 12:1
25Vontlhe vanhu va palisanako va ti khoma ka zilo zontlhe. Makunu va maha lezo kasi ku kuma a xidlodlo lexi xi bolako, kanilezi hina hi tirela a xidlodlo lexi xi nga boliko. 1 Tim. 6:12; 2 Tim. 1:5; Jak. 1:12
26Mina nza tsutsuma na ku nga hi nyamutsutsume, lezo nzalwa, na ku nga hi ku khwatsi nziba mheho. 2 Kor. 5:1
27Kanilezi nzi tsayisa a miri wa mina nzi wu hlula; ku nga taku, na nzi kanele ka vanwani mina wutsumbu nzi hoxiwa. Jer. 6:30; 2 Kor. 13:5
Attualmente Selezionati:
1 Va le Korinte 9: TSC72
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Tshwa Bible © Bible Society in Mozambique, 1972, 2007.