1 Va le Korinte 11
11
1Mahani vapimanyisi va mina, kotisa mina nzi nga mupimanyisi wa Kristu. 2 Tes. 3:9
A mikhuwo yi faneleko vavasati tinkhozweni.
2Nza mu khesa hilezi ma nzi alakanya ka zilo zontlhe, mu gonga a mikhuwo leyi nzi nga mu nyika yona. Xip. 7:17
3Kanilezi nzi ranza a kuva mu tiva lezaku a hloko ya wanuna munwe ni munwani hi Kristu, ni hloko ya wasati hi nuna wakwe, ni hloko ya Kristu hi Nungungulu. Gen. 3:16; Joh. 14:28; Efe. 5:23; 1 Ped. 3:1
4A wanuna munwe ni munwani loyi a khongelako, kutani ku profeta, na fenengetile a hloko yakwe, i yi chela tingana a hloko yakwe.
5Kanilezi a wasati munwe ni munwani loyi a khongelako, kutani ku profeta, na a nga fenengetangi a hloko yakwe, i yi chela tingana a hloko yakwe; hakuva lezo zi fana ni loku a cingile. Deut. 21:12; Miti. 21:9
6Hakuva loku wasati a nga ti fenengeti hloko, a kayiwe; kanilezi loku ku hi tingana ka wasati a ku kayiwa kutani ku cingiwa, ngha a fenengeta hloko. Mitse. 5:18
7Hakuva a wanuna a nga faneli ku fenengeta a hloko yakwe, kota lezi a nga xifananiso ni wudzunzo ga Nungungulu; kanilezi a wasati wudzunzo ga wanuna. Gen. 1:26
8Hakuva a wanuna a nga tangi hi ka wasati, kanilezi a wasati ita hi ka wanuna. Gen. 2:21
9Ni kambe a wanuna a nga vangelangi wasati, kanilezi hi wasati a nga vangelwa wanuna.
10Hi kota ya lezo a wasati i fanele a kuva ni xikombiso a hlokweni yakwe xaku i fumelwe, hi kota ya tingelosi. Gen. 24:65; Mut. 5:6
11Ahembalokoke, le Hosini a nga kona wasati hi lehandle ka wanuna, ni wanuna a nga kona hi lehandle ka wasati. Gal. 3:28
12Hakuva kota lezi a wasati a ngata hi ka wanuna, zinghaho ni wanuna i pswaliwa hi wasati; kanilezi zontlhe zita hi ka Nungungulu. Rom. 11:36
13Hi nga lamulani, xana zi fanele lezaku a wasati a khongela ka Nungungulu na a nga fenengetangi a hloko ke?
14Xana na wona ntumbuluko a wu mu gonzisi lezaku wanuna ava ni tingana loku a kulisa misisi ke?
15Kanilezi loku a wasati a hi ni misisi yo leha, mbukosi ka yena; hakuva i nyikilwe a misisi yakwe a kuva xifenengeto.
16Kanilezi loku munhu a ranza ku kaneta, hina a hi na mukhuwo wa kunghahi, hambu ni mabandla ya Nungungulu a ma nawo. 3 Tim. 3:4
A Xilalelo xa Hosi.
17Loku nzi engeta nzi mu laya a nzi zi koti ku mu khesa, hakuva a mitlhanganweni ya nwina a mu hloti ku ti chukwata, kanilezi mo ti bihisa.
18A kusanguleni, loku mu tsombana chechini, nzizwa lezaku ku kona kuhambana xikari ka nwina; hi tlhelo nza kholwa lezaku ku kona. Xip. 1:11
19Hakuva ku fela kuva kona mitlawa xikari ka nwina, kasi ku ta woneka lava va nga va nene xikari ka nwina. Lu. 17:1; 1 Joh. 2:19
20Hikwalaho loku mu tsombana, a zi koteki kuga xilalelo xa Hosi,
21hakuva a kugeni ka nwina a munwe ni munwani i rangela vanwani aga xilalelo xakwe; zonake munwani azwa ndlala, na munwani a xurile. Juda 12
22Xana a mu na tiyindlu ta ku gela ni ku nwela kona ke? Kutani mu kanyisa a chechi ya Nungungulu, ni ku va chela tingana lava va nga hiko nazo ke? Nzi taku yini ka nwina? Nzi ta mu dzunza ke? A nzi mu dzunzi. Levi 19:30; Tis. 89:7; 93:5
23Hakuva mina nzi amukele ka Hosi lezi nzi mu tivisileko zona; lezaku a wusiku lego a nga nyikelwa ha gona, Hosi Jesu i lo teka xibaba; Gal. 1:12
24laha a nga bongile i lo xi khema, aku ngalo: Lexi hi miri wa mina, lowu wu khemelelweko nwina; mahani lezo kasi ku nzi alakanya.
25Zinghaho anzhako ka xilalelo i lo teka a gombe, aku: A gombe legi hi xivumelwano xiswa nkhateni wa mina; ni xihi xikhati mu gi nwako, mahani lezo kasi ku nzi alakanya. Maheb. 9:15
26Hakuva hi xikhanzakanya xa lezi mu gako lexi xibaba, ni kunwa a gombe legi, muba hungu hi kufa ka Hosi yi kala yi wuya. Miti. 1:11; Kuv. 1:7
27Hikwalaho kani hi wihi a gako a xibaba ni kunwa a gombe ga Hosi hi kungafaneliko, i tava ni nanzu wa miri ni nkhata wa Hosi. Mitse. 9:10; Joh. 6:51; 13:27
28Hikwalaho ngha munhu a ti hlola yena wutsumbu, zonake age a xibaba ni kunwa a gombe. Gal. 6:4
29Hakuva loyi a gako ni kunwa na a nga hambanyisi xikari ka miri wa Hosi ni kuga kunwani, i ti gela a ti nwela kulamulwa.
30Hi xigelo lexo a vanyingi va nwina va na ni gome, va babya, ni vanwani va file.
31Kanilezi loku hina wutsumbu hi wa ti lamula, ngha hi nga lamulwi. 1 Joh. 1:9
32Kanilezi loku hi lamulwa hi biwa hi Hosi, kasi hi fela ku kala hi nga koneki zinwe ni misava. Joba 5:17; Am. 3:2
33Hikwalaho, vamakabye, loku mu tsombana ku taga, rinzelanani.
34Loku munhu azwa ndlala, ngha aga le kaya; kasi a kutsombana ka nwina ku nga mu vangeli kulamulwa. A timhaka tinwani nzi ta ta ti lulameta loku nzi chikele. Xip. 4:19; Tit. 1:5
Attualmente Selezionati:
1 Va le Korinte 11: TSC72
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Tshwa Bible © Bible Society in Mozambique, 1972, 2007.