Jang 15
15
Brah Jê-sus lah tơơm nho ngan
1“Hei laa tơơm nho ngan, Bươp Hei laa bnih tam nho. 2Paich bling êch knông Hei 'bưn play kao nei Pang gôt teq, nha bling êch play kao nei Pang khwaih ei jah kươt ơk play huôih. 3Bơl 'bei ja kươt jrah jriêp chkhôm baak Hei ja tơmbơh tti bơl 'bei. 4Phrui khang gôq knông Hei nei Hei a kươi gôq knông bơl 'bei. Bei bling nho, mơq 'bưn gôq knông tơơm nho nei êêng bu 'bưn geh lôh play kươt. Mơq bơl 'bei 'bưn khang gôq knông Hei nei kot bei nei. 5Hei laa tơơm nho, bơl 'bei lah bling. 'Bơơn khang gôq knông Hei, u Hei gôq knông bnih nei lôh sot ơk play, đươm agaih Hei bơl 'bei 'bưn lơh ơơn kươt. 6Mơq 'bơơn 'bưn khang gôq knông Hei nei bei bling nho bu jang teq a gaaih u bu ranh, bu nday pơih, jang teq u ôinh nei bu sơơr. 7Mơq bơl 'bei khang gôq knông Hei u baak Hei khang gôq knông bơl 'bei, phrui r'bon dan paich ntil ơơn bơn êch, bơl 'bei a kươi pơih kươt ntil nei. 8Đươm ntil au Bươp Hei kươt tư wơơl, nei laa bơl 'bei play kao ơk u but jơrnơ Hei. 9Bei Bươp ja srlanh Hei bei êch, Hei kot srlanh bơl 'bei bei nei. Phrui khang gôq knông baak srlanh Hei ri. 10Mơq bơl 'bei prap ơn pal baak ch'bap Hei ri nei a kươi gôq knông baak srlanh Hei ri, kot bei Hei ja prap ơn pal baak ch'bap Bươp Hei ri u khang gôq knông baak srlanh Pang ri. 11Hei mor n'hai bơl 'bei pal ntil au jah broh Hei ri gôq knông bơl 'bei, u broh bơl 'bei ri kươt sơp grơp.
12Au laa baak ch'bap Hei ri: Bơl 'bei phrui ta srlanh, bei Hei ja srlanh bơl 'bei.#Ja 13:34; 15:17; I Ja 3:23; II Ja 5. 13'Bưn geh baak srlanh ơơn ttih huôih baak srlanh đươm gnasaal baah teq lơi chhak nơơm. 14Mơq bơl 'bei lơh tênh ntil Hei tơmbơh tti nei bơl 'bei laa gnasaal Hei. 15Hei 'bưn nha khuôl bơl 'bei lah dêch hôm, đươm dêch 'bưn gưt ntil ơơn nnơơm lơh. Dôh Hei khuôl bơl 'bei laa gnasaal Hei, đươm Hei ja tơrsau aan bơl 'bei gưt leq sêch ntil ơơn Hei ja ttang a ktôk Bươp Hei. 16'Bưn geh bơl 'bei ja sach Hei, dôh Hei ja sach u maanh top bơl 'bei, jah bơl 'bei han, kươt play kao, u play bơl 'bei nha ơơm nggan; jah paich ntil ơơn bơl 'bei tơmoh chhak Hei r'bon dan Bươp nei Pang ươn bơl 'bei. 17Hei tơmbơh tti ntil au aan bơl 'bei jah bơl 'bei ta srlanh.”
Baak skiêr swich teh ri
18“Mơq swich teh a kiêr bơl 'bei nei phrui gưt laah swich teh ja a kiêr Hei noor bơl 'bei. 19Mơq bơl 'bei pơơn teq u swich teh nei swich teh srlanh bơl bnih pơơn teq u nơơm. Dôh đươm bơl 'bei 'bưn pơơn teq u swich teh, u Hei ja sach bơl 'bei a klung swich teh, mơ swich teh a kiêr bơl 'bei. 20Phrui gênh baak Hei ja mor n'hai bơl 'bei: ‘Dêch 'bưn huôih nnơơm.’ Mơq bu nhôp kơt Hei, bu a kươi kot nhôp kơt bơl 'bei. Mơq bu prap ơn baak Hei, bu a kươi kot prap ơn baak bơl 'bei.#Mat 10:24; Lu 6:40; Ja 13:16. 21Dôh đươm saak Hei, bu a kươi lơh jôm ntil nei aan bơl 'bei, đươm bu 'bưn gưt Yaang maanh Hei lôh. 22Mơq Hei 'bưn lôh u 'bưn mor teq u bu nei bu 'bưn geh dôih ơơn. Dôh bei au bu 'bưn geh koh roong aan dôih bơn ri kươt. 23'Bơơn a kiêr Hei nei kot a kiêr Bươp Hei nha. 24Mơq Hei 'bưn lơh lwah bu pal kaar baah ndah geh bnih êch lơh nei bu 'bưn geh dôih. Dôh bei au bu ja sau baah leet a kiêr Hei u leq dơng Bươp Hei. 25Bei nei baak ja 'bian knông ch'bap bu ri kươt dip plak: ‘Bu a kiêr Hei arơi.’
26Dôh tơt Yaang Nđum Nđiêng lôh, lah Yaang baah Hei a kươi maanh a Bươp lôh n'hai bơl 'bei, nei laa Wêêng Soong Klanh ri lôh a Bươp, nơơm Pang a kươi lơh ndraanh teq u Hei. 27Bơl 'bei kot lơh ndraanh teq u Hei, đươm bơl 'bei ja gôq n'hai Hei a daak bôôk.”
Valið núna:
Jang 15: SBL2024
Áherslumerki
Deildu
Afrita
Want to have your highlights saved across all your devices? Sign up or sign in
© 2024 Bible Society Vietnam. All rights reserved.