Jang 14
14
Nhi Bươp
1“Chưt bơl 'bei khơơm rhơq rpơq. Phrui jơ Brah Ưn! kot phrui jơ Hei hih!#14:1 Phrui jơ Brah Ưn! kot phrui jơ Hei hih! Paich laa Bơl 'bei jơ Brah Ưn, phrui jơ Hei hih! paich laa Bơl 'bei jơ Brah Ưn, bơl 'bei kot jơ Hei hih. 2Knông nhi Bươp Hei geh ơk ktôk gôq; mơq 'bưn geh bei nei, a hay Hei leet mor n'hai bơl 'bei laah Hei han riap aan bơl 'bei di ktôk?#14:2 Knông nhi... di ktôk? Knông m'baak plơơp 'bian ti laa Knông nhi Bươp Hei geh ơk ktôk gôq; Hei ja riap aan bơl 'bei di ktôk. Hei a kươi 'bưn mor n'hai bơl 'bei ntil au mơq 'bưn geh bei nei. 3Tơt Hei han u ja riap ktôk aan bơl 'bei hơơi, Hei a kươi plơq kơơi liêu bơl 'bei han n'hai Hei, jah Hei gôq a êch nei bơl 'bei kot a nei. 4Bơl 'bei gưt Hei han đêch, u gưt troong han hih.”
Pal droong ôp bơl jơrnơ ri
5Thô-ma mor: “Ơi Brah, bơl hei 'bưn gưt Brah han đêch, lơh bei êch gưt troong kươt?” 6Brah Jê-sus ơh: “Hei laa troong han, song klanh u baak rêh. 'Bưn đươm Hei nei 'bưn 'bơơn kươt lôh n'hai Bươp. 7Mơq bơl 'bei ja gưt Hei nei a kươi kot gưt Bươp Hei;#14:7 Mơq bơl 'bei ja gưt Hei nei a kươi kot gưt Bươp Hei: Knông m'baak plơơp 'bian ti laa Mơq bơl 'bei ja gưt Hei nei ja phrui gưt Bươp Hei. a bei au bơl 'bei gưt u ja sau Pang.”
8Phi-lip ơh laah: “Ơi Brah, dan tơrsau Bươp aan bơl hei nei sơp hôm.” 9Brah Jê-sus ơh: “Phi-lip ơi, Hei ja gôq n'hai bơl 'bei jook hôm, baah bơl 'bei ndah gưt Hei! 'Bơơn ja sau Hei nei laa ja sau Bươp. A hay 'bei leet mor: ‘Dan tơrsau Bươp aan bơl hei’? 10Geh lah 'bei 'bưn jơ laah Hei gôq knông Bươp u Bươp gôq knông Hei pan? Pal baak Hei mor n'hai bơl 'bei 'bưn geh Hei mor êêng, dôh đươm Bươp laa Yaang gôq knông Hei plah lơh pal kaar Pang ri. 11Tơt Hei mor Hei gôq knông Bươp u Bươp gôq knông Hei nei phrui jơ Hei; mơq 'bưn, phrui jơ rlach đươm pal kaar Hei lơh. 12Ngan, Hei maanh bơl 'bei ngan, bnih 'bơơn jơ Hei a kươi kot lơh pal kaar Hei lơh, u a kươi lơh pal kaar ttih huôih nha, đươm Hei siq n'hai Bươp. 13Bơl 'bei tơmoh chhak Hei r'bon dan paich ntil ơơn, Hei a kươi lơh aan 'bei, jah Bươp kươt tư wơơl ktôk Koon. 14Mơq bơl 'bei tơmoh chhak Hei r'bon dan ntil ơơn đôôi,#14:14 r'bon dan ntil ơơn đôôi: Knông m'baak plơơp 'bian ti laar'bon dan Hei ntil ơơn đôôi. Hei a kươi lơh aan.”
Brah Jê-sus pơn ươn Brah Wêêng
15“Mơq bơl 'bei srlanh Hei nei a kươi prap ơn#14:15 a kươi prap ơn: Knông m'baak plơơp 'bian ti laa prap ơn. pal baak ch'bap Hei. 16Hei a kươi r'bon dan Bươp, Pang a kươi ươn bơl 'bei di mbu Yaang Nđum Nđiêng nday jah gôq n'hai bơl 'bei yoot yôw, 17nei laa Wêêng Soong Klanh pa swich teh 'bưn geh pơih kươt, đươm 'bưn sau u 'bưn gưt Pang. Dôh bơl 'bei gưt Pang đươm Pang plah gôq n'hai bơl 'bei, u a kươi gôq knông bơl 'bei.#14:17 u a kươi gôq knông bơl 'bei: Knông m'baak plơơp 'bian ti laau gôq klung bơl 'bei. 18Hei 'bưn teq bơl 'bei bei koon l'ơơi laang, Hei a kươi lôh n'hai bơl 'bei. 19'Bưn nhjok ơơm, swich teh a kươi 'bưn nh'ơơm sau Hei hôm, dôh bơl 'bei a kươi sau Hei. Đươm Hei rêh nei bơl 'bei a kươi kot rêh. 20Knông nar nei, bơl 'bei a kươi gưt laah Hei gôq knông Bươp Hei; bơl 'bei gôq knông Hei, u Hei gôq knông bơl 'bei. 21'Bơơn geh pal baak ch'bap Hei ri u prap ơn, nei laa bnih srlanh Hei. Bnih êch srlanh Hei a kươi kươt Bươp Hei srlanh, Hei a kươi kot srlanh bu, u tơrsau nơơm Hei aan bu.” 22Ju-đa, 'bưn geh laa Ju-đa Ich-ka-ri-ôt, ơh laah: “Ơi Brah, đươm a hay Brah a kươi tơrsau chhak nơơm aan bơl hei baah 'bưn tơrsau aan swich teh?” 23Brah Jê-sus ơh: “Mơq 'bơơn srlanh Hei nei a kươi prap ơn baak Hei, Bươp Hei a kươi srlanh bu, Bơl bơn a kươi lôh pôl bnih nei u gôq n'hai bu. 24'Bơơn 'bưn êch srlanh Hei nei 'bưn prap ơn pal baak Hei. Ntil baak bơl 'bei ttang 'bưn geh laa baak Hei ri, dôh Bươp ri laa Yaang ja maanh Hei lôh.
25Hei ja mor pal ntil au aan bơl 'bei plah Hei nha gôq n'hai bơl 'bei. 26Dôh Yaang Nđum Nđiêng, nei laa Brah Wêêng baah Bươp a kươi tơmoh chhak Hei maanh lôh, Pang a kươi kne bơl 'bei jôm ntil, u krơơ aan bơl 'bei gênh leq sêch ntil ơơn Hei ja lah n'hai bơl 'bei. 27Hei teq baak sroong boong kơơi aan bơl 'bei. Hei ươn baak sroong boong Hei ri aan bơl 'bei. Baak sroong boong Hei aan bơl 'bei 'bưn bei swich teh aan. Chưt bơl 'bei khơơm rhơq rpơq u khơơm n'hông. 28Bơl 'bei ja ttang Hei mor: ‘Hei han, u Hei a kươi plơq kươi n'hai bơl 'bei.’ Mơq bơl 'bei êch srlanh Hei nei mơ broh s'bai đươm Hei han siq n'hai Bươp, đươm Bươp prêh thlay huôih Hei. 29Bei au Hei lah ntil au aan bơl 'bei di noor kaar ndah lôh tơt, jah khal kaar lôh tơt nei bơl 'bei a kươi jơ. 30Hei a kươi 'bưn nh'ơơm mor ơk n'hai bơl 'bei hôm, đươm bah kan bôôk swich teh au plah lôh. Bu 'bưn geh ch'bap kmheng ơơn lơ Hei, 31dôh Hei lơh tênh ntil Bươp ja tơmbơh maanh, jah swich teh gưt laah Hei êch srlanh Bươp. Phrui dơk, bơl bơn phrui han rlach au.”
Valið núna:
Jang 14: SBL2024
Áherslumerki
Deildu
Afrita
Want to have your highlights saved across all your devices? Sign up or sign in
© 2024 Bible Society Vietnam. All rights reserved.