Jang 16
16
Yaang Nđum Nđiêng
1“Hei ja maanh bơl 'bei pal ntil au jah bơl 'bei 'bưn geh a kơq. 2Bu a kươi nduul bơl 'bei rlach nhi pơrgum; u a kươi tơt bêl pa bah êch lưm bơl 'bei leet kơn ơơn laah bơn plah jraih kaar Brah Ưn. 3Bu a kươi lơh pal ntil au đươm bu 'bưn gưt Bươp, kot 'bưn gưt Hei nha. 4Dôh Hei ja mor pal ntil au aan bơl 'bei jah jơl tơt bêl bu ri, bơl 'bei gênh kơơi laah Hei ja mor aan bơl 'bei hơơi. Hei 'bưn mor ntil au n'hai bơl 'bei a ptơơm, đươm Hei nha gôq n'hai bơl 'bei. 5Dôh bei au Hei êch dơơh siq n'hai Yaang ja maanh Hei lôh, u 'bưn 'bơơn knông bơl 'bei ôp Hei: ‘Yau han đêch?’ 6Dôh đươm Hei ja mor pal ntil au aan bơl 'bei mơ chưt bơl 'bei bêêng chhong rmlơng. 7Paich bei nei, Hei mor ngan n'hai bơl 'bei: Hei han laa preh thlay aan bơl 'bei. Đươm mơq Hei 'bưn han nei Yaang Nđum Nđiêng a kươi 'bưn lôh u bơl 'bei. Dôh mơq Hei han, Hei a kươi maanh Pang lôh. 8Tơt Pang lôh, Pang a kươi sngaanh swich teh teq u dôih 'baap, teq u baak sêch song u teq u baak pơrkat. 9Teq u dôih 'baap, đươm bu 'bưn jơ Hei; 10teq u baak sêch song, đươm Hei lôh n'hai Bươp, u bơl 'bei 'bưn nha sau Hei hôm; 11teq u baak pơrkat, đươm bah kan bôôk swich teh au ja dol pơrkat.
12Hei nha ơk ntil jah mor n'hai bơl 'bei, dôh bei au bơl 'bei 'bưn geh gưt moh. 13Tơt Wêêng Soong Klanh lôh, a kươi Pang liêu bơl 'bei mưt jôm song klanh; đươm Pang 'bưn mor êêng, dôh a kươi mor ntil ơơn bơn ttang, u tơmbơh aan bơl 'bei ntil ơơn a kươi lôh. 14a kươi Pang tư wơơl Hei, đươm a kươi Pang pơih ntil ơơn pơơn teq u Hei pa tơmbơh aan bơl 'bei. 15Leq sêch ntil ơơn Bươp geh laa Hei ri, nei mơ Hei mor laah Pang a kươi pơih ntil ơơn pơơn teq u Hei pa tơmbơh aan bơl 'bei.”
Ta lơơi u a mơp kơơi
16“Di rbôông nha, bơl 'bei a kươi 'bưn nh'ơơm sau Hei, u hôm di rbôông kơơi, bơl 'bei a kươi leet sau Hei.” 17Đươm nei, pal jơrnơ Pang mor ta u laah: “Yau maanh bơl bơn: ‘Di rbôông nha, bơl 'bei a kươi 'bưn nh'ơơm sau Hei, u hơơi, di rbôông kơơi bơl 'bei a kươi leet sau Hei, đươm Hei siq n'hai Bươp.’ Ntil au geh rpach ơơn?” 18Bu mor: “‘Di rbôông’ geh rpach ơơn? Bơl bơn 'bưn gưt Pang êch mor ơơn.” 19Brah Jê-sus gưt bơl jơrnơ êch ôp Pang mơ mor laah: “Geh lah bơl 'bei plah ta ôp teq u ndroong mor: ‘Di rbôông nha, bơl 'bei a kươi 'bưn nh'ơơm sau Hei, u hôm di rbôông kơơi, bơl 'bei a kươi sau Hei’, geh rơih laa ơơn 'bưn rê? 20Ngan, Hei maanh bơl 'bei ngan, bơl 'bei a kươi nhim ngliêng, trơh rnđeng, nha swich teh a kươi broh s'bai. Bơl 'bei a kươi chhong rmlơng, dôh baak chhong rmlơng bơl 'bei ri a kươi but broh s'bai. 21Mei dơur plah deh lgơơch nei ji kôr, đươm ja tơt bêl bơn ri, dôh tơt koon drêên geh mat nei bnih nei 'bưn nh'ơơm gênh tơt baak ji kôr hôm, pa broh s'bai đươm mbu bnih ja kươt lgơơch knông swich teh. 22Kot bei nei, khal au bơl 'bei chhong rmlơng, dôh Hei a kươi mơp kươi bơl 'bei nei chưt bơl 'bei broh s'bai, u 'bưn 'bơơn awap piit nhôq broh s'bai bơl 'bei ri. 23Knông nar nei, bơl 'bei a kươi 'bưn ôp Hei ntil ơơn hôm. Ngan, Hei lah bơl 'bei ngan, paich ntil ơơn bơl 'bei r'bon dan Bươp, klung saak Hei, nei Pang a kươi ươn bơl 'bei.#16:23 paich ntil ơơn... a kươi ươn bơl 'bei: Knông m'baak plơơp 'bian ti laa paich ntil ơơn bơl 'bei r'bon dan Bươp, nei Pang a kươi ươn bơl 'bei klung saak Hei. 24Tơt bei au, bơl 'bei ndah ơơm tơmoh chhak Hei baah r'bon dan ntil ơơn. Phrui r'bon dan ơơi, a kươi bơl 'bei pơih kươt, jah broh s'bai bơl 'bei ri kươt sơp grơp.
25Hei ja nhôq pn'geh ruk jah mor pal ntil au aan bơl 'bei. Dôh bêl tơt, Hei 'bưn nhôq pn'geh ruk jah mor n'hai bơl 'bei hôm, dôh a kươi mor teq u Bươp aan bơl 'bei di troong srlah srlom. 26Knông nar nei, bơl 'bei a kươi tơmoh chhak Hei baah r'bon dan. Hei 'bưn mor laah Hei a kươi đươm bơl 'bei baah r'bon dan Bươp laang; 27đươm Bươp srlanh bơl 'bei, đươm bơl 'bei ja êch srlanh Hei u jơ laah Hei lôh a Brah Ưn. 28Hei ja a Bươp lôh swich teh, u Hei leet lơơi swich teh jah siq n'hai Bươp.”
29Bơl jơrnơ ơh laah: “Bei au Yau mor srlah srlom, 'bưn nhôq pn'geh ruk hôm. 30Bei au bơl hei gưt laah Yau gưt leq sêch, 'bưn chkhôm geh 'bơơn ôp Yau. Nei mơ, bơl hei jơ laah Yau lôh a Brah Ưn.” 31Brah Jê-sus ơh: “Bei au bơl 'bei jơ 'bưn? 32Au bêl tơt u tơt hôm, khal bơl 'bei a kươi a brơh a brah, 'bơơn han troong 'bơơn, teq Hei kơơi mbu êêng. Dôh Hei 'bưn gôq mbu êêng, đươm Bươp gôq n'hai Hei. 33Hei ja maanh bơl 'bei pal ntil au, jah bơl 'bei geh baak sroong boong knông Hei. Bơl 'bei a kươi geh r'baak knông swich teh, dôh phrui jap chưt, Hei ja jn'ah swich teh hơơi.”
Valið núna:
Jang 16: SBL2024
Áherslumerki
Deildu
Afrita
Want to have your highlights saved across all your devices? Sign up or sign in
© 2024 Bible Society Vietnam. All rights reserved.