Jang 13
13
Pal baak kne ptut Brah Jê-sus ri
(13:1 – 17:26)
Brah Jê-sus rao jơng aan bơl jơrnơ
1A mat ryơơng Chloong Rlach, Brah Jê-sus gưt bêl Pang phrui lơơi swich teh au jah plơq siq n'hai Bươp ja lôh. Pang ja êch srlanh bơl bnih pơơn teq u nơơm knông swich teh nei khang êch srlanh aan tơt ptut. 2Plah lap sôông mau, chaak ap trôih rnđêch ndun Pang laap chưt Ju-đa Ich-ka-ri-ôt, koon Si-môn ri. 3Brah Jê-sus gưt laah Bươp ja ndơơp jôm baak knông ti Pang, u Pang lôh a Brah Ưn, kot êch dơơh siq n'hai Brah Ưn, 4mơ dơk du rlach bliêng sa, doh ao ryoq, pơih kma puut rlum buq, 5ja nei Pang khut daak teq u pi khaap, u lap rao jơng aan bơl jơrnơ. Pang kot pơih kma ja puut rlum buq baah jhut jơng aan bu. 6Khal Pang lôh u Si-môn Phi-e-rơ nei bu mor: “Ơi Brah, Brah baah leet rao jơng aan hei neh?” 7Brah Jê-sus ơh: “Bei au, 'bei ndah gưt kaar Hei lơh, dôh u kươi nei gưt.” 8Phi-e-rơ ơh: “Koon a kươi 'bưn khal êch jah Brah rao jơng aan koon laang!” Brah Jê-sus ơh: “Mơq Hei 'bưn rao jơng aan 'bei nei 'bei 'bưn geh smlaang ơơn a ktôk Hei ơơm.” 9Si-môn Phi-e-rơ lah: “Ơi Brah, 'bưn geh dơơn rao jơng ei, dôh leq ti u bôôk hei dơq!” 10Brah Jê-sus ơh: “'Bơơn ja um hơơi, dơơn rao jơng nei jrơh leq sêch. Bơl 'bei ja kươt jrơh hơơi, dôh 'bưn geh leq sêch.” 11Đươm gưt 'bơơn laa bah a kươi ndun Pang mơ Pang mor: “'Bưn geh leq sêch bơl 'bei jrah jriêp.” 12Di kươi ja rao jơng aan bơl jơrnơ, Pang dook ao kơơi, ja nei gôq teq u bliêng u mor: “Bơl 'bei geh gưt ntil Hei ja lơh aan bơl 'bei 'bưn? 13Bơl 'bei khuôl Hei laa Yau, laa Brah. Bơl 'bei lah dip đat, đươm Hei a ngan bei nei. 14Dôh mơq Hei laa Yau, laa Brah, baah nha rao jơng aan bơl 'bei nei bơl 'bei kot phrui rao jơng ta pôl. 15Đươm Hei ja lơh ryơơng aan bơl 'bei, jah bơl 'bei kot lơh bei Hei ja lơh aan bơl 'bei.#Lu 22:27. 16Ngan, Hei maanh ngan bơl 'bei: Dêch 'bưn ttih huôih nnơơm, ndraanh 'bưn ttih huôih bnih maanh nơơm bu. #Mat 10:24; Lu 6:40; Ja 15:20. 17Mơq bơl 'bei gưt pal ntil au u lơh tênh nei geh smlaang. 18Hei 'bưn mor leq sêch teq u bơl 'bei, Hei gưt bơl bnih Hei ja sach. Dôh baak Sm'bưt Brah au kươt dip plak: ‘Bah sa nom Hei ri, wih sot ta wal kơơi Hei.’ 19Bei au, Hei mor ntil au n'hai bơl 'bei di mat baak kaar lôh tơt, jah tơt kaar lôh tơt nei lôh bơl 'bei jơ laah Hei laa Yaang Geh Yoot. 20Ngan, Hei maanh bơl 'bei ngan, 'bơơn wơơt bnih Hei maanh han nei laa wơơt Hei; nha 'bơơn wơơt Hei nei laa wơơt Yaang ja maanh Hei lôh.” #Mat 10:40; Mak 9:37; Lu 9:48; 10:16.
Brah Jê-sus mor noor teq u baak ndun kơrlap Ju-đa ri
21Tơt Brah Jê-sus ja mor bei nei hơơi, nei Pang rthưt nuih knông chưt u a ngan laah: “Ngan, Hei maanh bơl 'bei, di mbu knông bơl 'bei a kươi ndun Hei.” 22Bơl jơrnơ mơq tơrnang nơơm, 'bưn gưt srlah Pang mor teq u 'bơơn. 23Di mbu knông bơl jơrnơ, laa bnih kươt Brah Jê-sus srlanh, plah chhing teq u chưt Brah Jê-sus. 24Si-môn Phi-e-rơ wak ti aan jơrnơ nei mơ ôp mơq Yau êch mor teq u 'bơơn. 25Jơrnơ au kêt chhak lơ kơtoh Brah Jê-sus u ôp: “Ơi Brah, bnih nei laa 'bơơn?” 26Brah Jê-sus ơh: “Nei laa bnih Hei a kươi ndơơp plơơp nom Hei êch dơơh tơyuk au.” Ja nei Pang tơyuk di plơơp nom u ndơơp aan Ju-đa Ich-ka-ri-ôt, koon Si-môn ri. 27Di kươi Ju-đa dơơp plơơp nom nei sa-tan mưt u knông chưt bu nei. Brah Jê-sus maanh Ju-đa: “Kaar 'bei lơh, phrui lơh gway ơơi.” 28Dôh 'bưn mbu 'bơơn gôq tu bliêng gưt đươm a hay Pang mor n'hai bu nei bei nei. 29Mbu baar du gênh laah, đươm Ju-đa ơn thong prak mơ Brah Jê-sus maanh bu nei han pook ntil griêng sa aan jơl ryơơng, paich ta toon ntil ơơn aan bnih l'ơơi. 30Tơt ja pơih nom hơơi, Ju-đa han sot kơndaal. Plah nei trôôk ja jơ ngôw.
Baak ch'bap mhei
31Tơt Ju-đa han sot hơơi, Brah Jê-sus lah: “Bei au Koon Bnih kươt tư wơơl, u Brah Ưn kươt tư wơơl ktôk Koon Bnih. 32[Mơq Brah Ưn kươt tư wơơl ktôk Koon Bnih]#13:32 [Mơq Brah Ưn kươt tư wơơl ktôk Koon Bnih]: Knông m'baak plơơp 'bian ti 'bưn geh pal sêr au. nei Brah Ưn a kươi kot tư wơơl Koon Bnih knông nơơm Pang, u a kươi tư wơơl kơndaal. 33Ơi bơl 'bei dêq drêên, Hei 'bưn nh'ơơm gôq n'hai bơl 'bei nhjok hôm. Bơl 'bei a kươi wơng Hei, u bei Hei ja mor n'hai bnih Jo-thai laah: ‘Ktôk Hei han bơl 'bei 'bưn geh lôh kươt’, nei bei au Hei kot mor n'hai bơl 'bei bei nei.#Ja 7:34. 34Hei ươn bơl 'bei di ch'bap mhei, nei laa bơl 'bei phrui ta srlanh. Bei Hei ja srlanh bơl 'bei bei êch nei kot phrui ta srlanh bei nei.#Ja 15:12,17; I Ja 3:23; II Ja 5. 35Mơq bơl 'bei ta srlanh, đươm bei nei, jôm bnih a kươi grnưt bơl 'bei laa jơrnơ Hei.”
36Si-môn phi-e-rơ ơh: “Ơi Brah, Brah han u đêch?” Brah Jê-sus ơh: “Ktôk Hei han, bei au 'bei 'bưn geh tênh kươt, dôh au m'ơơn 'bei a kươi tênh.” 37Phi-e-rơ ơh: “Ơi Brah, đươm a hay bei au hei 'bưn kươt tênh Brah? Hei a kươi teq lơi sơmlaang rêh hei đươm Brah!” 38Brah Jê-sus ơh: “Ay a kươi teq chhak nơơm ay đươm Hei laang? Ngan, Hei maanh ngan n'hai 'bei: Ndah tơt iêr ndrau, 'bei a kươi dmôw Hei pei wưt!”
Valið núna:
Jang 13: SBL2024
Áherslumerki
Deildu
Afrita
Want to have your highlights saved across all your devices? Sign up or sign in
© 2024 Bible Society Vietnam. All rights reserved.