Ịbụrụ Ezigbo Onye Na-Achọta Ihe

Ina-achọ ịdị mma nke Chineke kwa ụbọchị na-enyere anyị aka ịtụ anya ihe ọma igosiputa na ndụ anyị. Ịdị mma nke Chineke adịghị ezo ezo, ma ihu ọma Ya adịghị eme otu ebe hapụ ebe ọzọ. . . Naanị ihe anyị kwesịrị ime bụ inwe anya iji na achọta ha. Ọ bụghị mgbe niile ka anyị na-ahụta ihu ọma Chineke, ọ bụ ya merè Pọl Onyeozi jiri kpeere ndị enyi ya ekpere ka ìhè nke mmepe wee dakwasị n'anya ha.

Pọl degaara Ndị Ụka Efesọs akwụkwọ-ozi ma gwa ha na ọ nọ na-ekpe ekpere ka "ìhè nke mmepe dakwasị anya obi [ha]." Nke a bụ ihe dị adị: ihu ọma gbara anyị gburugburu. Mgbe m malitere ịchọ ihe ọma na ndụ m, ana m achọpụta na enwerè ike ịchọta ha n'ebe niile ọbụlagodi n'ebe ana atụghị anya ha. Mgbe ụfọdụ mgbe ọ dị ka adịghị ahụ ihu ọma Chineke anya n'ụzọ a tụrụ anya ya, ọ bụ mgbe ahụ ka ọ n'arụ ọrụ n'ụzọ kachasị mma maka anyị. Zụlite anya gị ịhụ ihe ọma mgbe niile ma lee ka ịga ebido hụwa ihe ọma ebe ọbụla i cherè ihu.

Ihu ọma Chineke pụrụ ịbịaru gị nso n'ihi akparama-àgwà gị na kà i si eche echiche, ihe abụọ a pụkwara ime ka ejigide ya ka ọ ghara ịbịaru gị nso. Ọ bụ eziokwu na ihu ọma Chineke adịghị asọ onye ọbụla asọ, mana nke ahụ apụtaghị na ọ na anakwere akparama-àgwà na echiche onye ọbụla. Mgbe anyị họọrọ ịbụ ezigbo ndị na-achọta ihe, ọ na-abawanye ihu ọma Chineke na ndụ anyị.

Chee Echiche Banyere Nke A: Kedụ ka ị ga-esi malite izugharị̀ uche gị ilekwasị anya na ihe ndị dị nma?

KPEE EKPERE: Ekele dịrị gị Chineke maka inye m ikike izugharị̀ uche m ka m wee nwee ike ịna ahụkwu ihe ọma bụ́ akụkụ nke ndụ m. Achọrọ m ịbụ ezigbo onye na-achọta ihe ka m wee nwee ike ịna edebe uche m ma n'atụ anya ịna ahụ ihu ọma gị kwa ụbọchị. N'aha Jizọs. Amen.