रोमी 1
1
अदर
1अह च़िठी आसा मंऐं पल़सी, मसीहा ईशूए दास लिखी दी, ज़ुंण परमेशरै आपणैं खुशीए समादा खोज़दअ शधाणूं आसा छ़ांटअ द। 2परमेशरै आसा एऊ खुशीए समादे बारै खास्सी साला पैहलै आपणैं गूरा संघै पबित्र शास्त्रा दी करार किई दी। 3अह खुशीओ समाद आसा परमेशरे पूते बारै ज़ुंण देहीए साबै राज़ै दाबेदे खिंबा दी आजू लुआद हुअ।
4पबित्र आत्में शगती करै मरनै का बाद भिई ज़िऊंदअ हई हुई अह गल्ल प्रगट कि सह आसा परमेशरो पूत। सह आसा ईशू मसीहा म्हारअ प्रभू। 5मसीहा दी विश्वास करी दैनअ परमेशरै मुल्है जश अर शधाणूंए पदबी ताकि हुंह सोभी होरी ज़ाती का तेऊ खुशीए समादा खोज़े कि परमेशरै तिन्नां लै किज़ै किअ! ताकि तिन्नें विश्वास करी तेऊए हर गल्ला मने अर परमेशरो प्रतप्प बढे।
6तम्हैं मसीहा दी विश्वास करनै आल़ै ज़ुंण रोम नगरी रहा, तम्हैं आसा तिन्नां ई होरी ज़ातीए लोगा मांझ़ै ज़ुंण मसीहा ईशूए हणां लै आसा शादै दै।
7हुंह लिखा ऐहा च़िठी रोम नगरी रहणैं आल़ै तिन्नां सोभिए नाओंऐं, ज़हा लै परमेशर झ़ूरी करा अर तेऊए पबित्र हणां लै आसा शादै दै।
मेरी आसा म्हारै बाब परमेशर अर प्रभू ईशू मसीहा का अरज़ कि तम्हां सोभी लै लोल़ी झींण अर शांती सदा हुई।#इफि. 1:2
रोम डेऊणेओ बच़ार
8पैहलै करा हुंह तम्हां सोभी लै ईशू मसीहा करै, आपणैं परमेशरा लै शूकर। किल्हैकि मसीहा दी थारै विश्वासे गल्ला आसा लागी दी सारै संसारै हंदी। 9हुंह करा दिला का परमेशरे च़ाकरी। हुंह खोज़ा तेऊए पूतो खुशीओ समाद, सह ई परमेशर आसा ऐहा गल्ला लै मेरअ शाजत कि हुंह करा तम्हां कबल्लअ प्राथणां दी आद।
10हुंह करा कबल्ली प्राथणां दी एही अरज़ कि तम्हां सेटा लै एछणअ लोल़ी त मेरअ केऊ नां केऊ साबै परमेशरे मरज़ी दी हुअ। 11किल्हैकि मेरअ दिल आसा तम्हां सेटा एछणा लै चाछल़दअ लागअ द, कि हुंह तम्हां लै आत्मिक बरदान दैई सकूं ताकि तम्हैं परमेशरे झींण अर विश्वासा दी पाक्कै होए। 12मेरअ बोल़णैंओ मतलब आसा इहअ कि हुंह च़ाहा इहअ कि हाम्हैं एकी-दुजै लै आपणैं मसीहा दी विश्वास करने बारै खोज़ी करै हैअ दैई सके।
13भाईओ, हुंह च़ाहा इहअ कि तम्हां का लोल़ी ऐहा गल्लो थोघ लागअ कि मंऐं च़ाहअ कई बारी तम्हां सेटा लै एछणअ कि ज़िहै मंऐं होरी ज़ातीए लोग मसीहे च़ेल्लै बणाऐं; तिहअ तम्हां मांझ़ै बी होए, ज़ेते तैणीं मंऐं कई बारी तम्हां सेटा लै एछणें कोशिश किई सह मकसद निं अज़ी बी पूरअ हुअ। 14हुंह आसा यूनानी समाज़ अर बोली समझ़णैं आल़ै अर तेता नांईं समझ़णैं आल़ै दुहीओ खुशीए समादा खोज़णेंओ ऋणी। 15ज़ुंण तम्हैं रोम नगरी रहा, हुंह आसा तम्हां लै बी खुशीए समादा खोज़णा लै तेभी तैर।
खुशीए समादे शगती
16किल्हैकि मुंह आसा खुशीए समादा दी पूरअ भरोस्सअ। परमेशरे तैहा शगती करै भेटअ सोभी उद्धार ज़ुंण खुशीए समादा दी विश्वास करा, पैहलै यहूदी अर तिंयां बी ज़ुंण यहूदी निं आथी।#2 तिम. 1:8
17एऊ खुशीए समादा करै बणाआं परमेशर हाम्हां आप्पू संघै धर्मीं; अह हआ शुरू का खिरी तैणीं विश्वासा करै, ज़िहअ पबित्र शास्त्रा दी लिखअ द बी आसा, “सह ज़ुंण परमेशरै विश्वासा करै धर्मीं बणाअं सह रहणअ सदा ज़िऊंदअ।”#हब. 2:4; गल. 3:11
मणछ ज़ातीओ पाप
18परमेशरो रोश्श, हआ तिन्नां सोभी लोगा लै स्वर्गा का प्रगट ज़ुंण तेऊओ अदर नांईं करदै अर ज़ुंण पाप कर्म करा। सह रहैऊआ तिन्नां का कि तिंयां तिन्नां भेटणीं सज़ा। किल्हैकि तिन्नैं किअ पाप, तिन्नैं डाही होरी लोगा का बी परमेशरो सत्त च़ोरी। 19तिंयां सोभै सका परमेशरे बारै राम्बल़ै करै समझ़ी किल्हैकि परमेशर हुअ आप्पू सोभी लै प्रगट।
20असली दी निं इना संसारे आछी करै शुझदअ कि परमेशर किहअ आसा, अर एऊ संसारा बणाणें ज़मानैं ओर्ही तेऊए कामां भाल़ी सका हाम्हैं समझ़ी कि परमेशर किहअ सर्वशक्तिमान आसा, इहअ निं कोहै बोली सकदअ, “हाम्हैं निं परमेशरा ज़ाणदै आथी।”
21इधी तैणीं कि तिन्नां का आसा थोघ कि परमेशर किहअ आसा, पर तैबी निं तिंयां परमेशरो अदर करदै, नां तिंयां तिन्नां गल्ला आद डाहंदै ज़ुंण तेऊ तिन्नां लै किई पर एता का लाऊआ हआ परमेशरे बारै ऐडी गल्ला सोठदै लागै दै। तिन्नें बेसमझ़ सोठ आसा सारी गलत। 22तिंयां गऐ आप्पू लै बडै समझ़कार समझ़ी ऐडै बणी,#जेर. 10:14 23अर तिन्नैं किई अमर परमेशरे प्रतप्पा छ़ाडी खतम हणैं आल़ै मणछ, च़ेल्लू-पखीरू, च़ऊ ज़ांघा हांढणै आल़ै अर रिंगणै आल़ै ज़ीबे मुहुर्तीए च़ाकरी।#बधा. 4:15-19; भज. 106:20
24तैही आसा परमेशरै बी तिंयां देहीए साबै तिन्नें दिला-मन्नें मरज़ी दी कंझ़रदै दैनै दै छ़ाडी, कि तिंयां आप्पू एकी-दुजै संघै छ़ोतलै काम करे। 25किल्हैकि तिन्नैं बणाअं परमेशरो सत्त बदल़ी करै झ़ुठअ, अर तिन्नैं किई परमेशरे बणाईं दी च़िज़े च़ाकरी अर च़ाकरी नां कि तेऊ संसार बणाणैं आल़ै परमेशरे च़ाकरी किई ज़ुंण सोभी बणाणैं आल़अ आसा अर ज़सरी हाम्हां सदा ज़ै-ज़ैकार लागा करनी। एवमस्तू।#जेर. 13:25; 16:19
26तैही दैनै परमेशरै तिंयां च़िल़्हखरै कंज़रैईए काम करदै छ़ाडी, इधी तैणीं कि तिन्नें बेटल़ी बी बदल़अ आपणअ बभार ज़ुंण तेऊ असली सभाबा का उंबल़अ आसा तिन्नैं छ़ाडअ आपणैं लाल़ै संघै सुत्तणअ अर तिंयां लागी आप्पू मांझ़ै कंझ़रदी।
27तिहै ई मर्ध बी आसा आपणीं बेटल़ी संघै सुत्तणै छ़ाडी लागै दै आप्पू मांझ़ै कंझ़रदै। होर ता होर मर्ध आसा लागै दै मर्धा संघै आप्पू मांझ़ै कदुष्ट कामां करदै। इना शर्मिंदै करनै आल़ै कामां लै आणा तिंयां आप्पू लै घोर सज़ा ज़ुंण तिन्नां भेटी बी लोल़ी।#लेब. 18:22; 20:13
28ज़ांऊं तिन्नैं परमेशर बछ़ैणनअ ऐडी गल्ल समझ़ी, तैही छ़ाडै परमेशरै बी तिंयां तिन्नां सोभी उंबल़ै कामां करना लै तिन्नें निक्कै मन्नें बशै।
29इहअ करै भर्हुऐ तिंयां सोभी रंगे पाप, निक्की सोठ, मांण, ज़ीद-मिश करै अर कपट, हत्या, झ़गल़ै, छ़ल़, दुजे च़िज़ा आप्पू लै च़ाहणैं आल़ै अर घैंचल़ करनै आल़ै। 30बदनाम करनै आल़ै, परमेशरा लै नफरत करनै आल़ै, होरीए बेइज़ती करनै आल़ै घमंडी, शरेरै, उपद्रभ करनै आल़ै अर ज़ुंण आपणैं ईजा-बाबे शुणदै ई निं आथी! 31बेसमझ़, छ़ल़-कपट करनै आल़ै, झींण अर झ़ूरनअ निं तिन्नैं सोठदै ई आथी! तिंयां आसा नर्दैई।
32तिन्नां का आसा परमेशरे बधानो थोघ कि इहै कामां करनै आल़ै आसा मौते सज़ा जोगी। तज़ी बी आप्पू ता करा ई तिंयां इना कामां, पर तिन्नां होरी बी हआ तिंयां सराहंदै लागै दै ज़ुंण इहै ई काम करा!
Pilihan Saat Ini:
रोमी 1: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.