गलाती 4
4
1एता समझ़ा तम्हैं एऊ साबै कि, ज़ै कुंण बाब मरी करै आपणीं ज़ैदात पिछ़ू आपणैं होछ़ै लान्हैं लै छ़ाडे; तेऊ लान्हैं अर दास मांझ़ै निं तेभै तैणीं किछ़ फरक हंदअ ज़ेभै तैणीं सह ज़ुआन निं होए एही ता आसा सह आपणैं बाबे हर गल्लो मालक। 2पर तेऊए बाबे सोठी दी धैल़ी तैणीं रहा सह हेर-सभाल़ करनै आल़ै अर भढारीए बशै।
3तिहै ई आसा हाम्हैं बी, ज़ेभै तैणीं हाम्हैं लान्हैं ज़िहै तै, तेभै तैणीं रहै हाम्हैं गलामा ज़िहै संसारे रिती-रबाज़ा मंदै लागी।
4पर ज़ांऊं ठीक बगत पुजअ, परमेशरै छ़ाडअ आपणअ पूत संसारा लै अर तेऊओ ज़ल्म हुअ होरी मणछा ज़िहअ ई एकी ज़नानीए ओदरा का। तेऊओ ज़ल्म हुअ यहूदी खिंबा दी अर तेऊ किई सोभै गल्ला मोसा गूरे बधाने साबै। 5ताकि ज़ुंण बधाने डरा हेठै आसा, तिन्नां लै मोल दैई छ़ुटकारअ होए, अर हाम्हां बी गोद लऐ दै शोहरू ज़िहअ हक भेटे।
6किल्हैकि तम्हैं आसा परमेशरे पूत, तैही छ़ाडी परमेशरै आपणैं पूते आत्मां म्हारै दिलै, ज़ुंण “बाबा, ए बाबा बोला।” 7ऐबै निं तम्हैं गलाम रहै, पर ऐबै आसा तम्हैं परमेशरे पूत। ऐबै ज़ै हाम्हैं परमेशरे पूत आसा, तेऊ दैणीं हाम्हां लै तिंयां सोभै गल्ला ज़ुंण तेऊ आपणैं पूता लै आसा डाही दी।
गलात नगरीए विश्वासीए बारै पल़सीओ फिकर
8ज़ेभै तैणीं तम्हां का परमेशरो थोघ नांईं त आथी तम्हैं थिऐ तिन्नां गल्ले गलाम ज़हा लै दईब बोला ज़ुंण असली दी किछ़ै निं आथी।#ईशा. 37:19; जेर. 2:11
9पर ऐबै ज़ांऊं तम्हैं परमेशर बछ़ैणीं हेरअ, पर परमेशरै बछ़ैणैं तम्हैं। ऐबै तिन्नां दुबल़ी, निक्की आदी शिक्षे गल्ला बाखा किल्है फिरा पिछ़ू, ज़सरै तम्हैं भिई आसा गलाम च़ाल्लै दै बणी?
10मंऐं शूणअ इहअ कि तम्हैं होरी ज़ातीए विश्वासी मना धैल़ी, भिन्नैं, ऋत अर साले तिह-थैर इहअ सोठी करै कि परमेशर हआ एता करै खुश। 11मुंह पल़ा थारै बारै फिकर कि किधी इहअ नां होए कि ज़ुंण मैन्थ मंऐं तम्हां लै आसा किई दी, सह बरैबाद डेओए।
12ए भाईओ, हुंह करा तम्हां सेटा अरज़ कि तम्हां हआ मुंह ज़िहै, किल्हैकि हुंबी आसा तम्हां ज़िहअ तिन्नां बधाना का आज़ाद हुअ द।
तम्हैं थिऐ मुल्है बडै भलै ज़धू हुंह तम्हां सेटा पैहली बारी इना गल्ला खोज़दअ आअ। 13पर तम्हां का आसा थोघ कि हुंह त तधू बमार ज़धू हुंह पैहली बारी तम्हां सेटा खुशीए समादा खोज़दअ आअ। 14मेरी बमारी ती तम्हां लै बी कष्ट, पर तम्हैं निं हुंह बागै काढअ अर तम्हैं किई मेरी हेर-सभाल़। तम्हैं मनअ हुंह इहअ कि ज़िहअ कि तम्हैं परमेशरे स्वर्ग दूतो या मसीहा ईशूओ सुआगत सका तै करी।
15तधू तै तम्हैं खुश अर ऐबै किधी डेऊई थारी सह खुशी? मुंह आसा थारै बारै ऐहा गल्लो निहंचअ कि तम्हैं सका तै मेरी तैणीं किछ़ बी करी, इधी तैणीं कि, ज़ै तम्हां आपणीं आछी बी पल़दी मुल्है दैणीं, तम्हां हेरनी ती तिंयां बी दैई। 16तै कै हुंह तम्हां का शुची गल्ला खोज़णैं पिछ़ू थारअ दुशमण हुअ?
17ज़ुंण लोग यहूदी बधाना मनणा लै ज़ोर दैआ तिंयां तम्हां आपणैं साथी; च़ाहा बणाणअं पर तिन्नें मन्नैं आसा खोट, तिंयां च़ाहा तम्हां मुखा ज़ुदै करनअ, कि तम्हैं तिन्नें च़ेल्लै बणें। 18ज़ै कुंण तम्हां लै भली गल्ला करनअ च़ाहा, सह आसा ठीक। पर तिन्नां दैणअ हर बगत इहअ तेभै बी करनै ज़ेभै हुंह तम्हां संघै नांईं बी होए।
19तम्हैं आसा मेरै शोहरू ज़िहै, मुंह पल़अ भिई थारअ फिकर अर अह फिकर रहणअ मुंह तेभै तैणीं पल़ी ज़ेभै तैणीं तम्हैं मसीहा ज़िहै निं बणी जाए। 20दिल, करा मेरअ कि, ज़ै हुंह एभै तम्हां सेटा हंदअ ता, तै करनी ती मिठै बैण बोली गल्ला, किल्हैकि एभै निस्सी मुंह समझ़ पल़ी कि हुंह तम्हां लै किज़ै बोलूं!
सारा अर हागार
21हुंह च़ाहा तम्हां का एक सुआल पुछ़णअ ज़ुंण तम्हैं तिहअ च़ाहा करनअ ज़िहअ मोसा गूरो बधान बोला। तम्हां का थोघ बी आसा कि बधान किज़ै बोला? 22पबित्र शास्त्रा दी आसा लिखअ द कि आबरामे हुऐ दूई शोहरू, एक शोहरू हुअ हागारा का ज़ुंण तेऊए दासी ती, दुजअ हुअ सारा का ज़ुंण तेऊए असली लाल़ी ती।#मूल. 16:5; 21:2
23पर इशमाईल ज़ुंण हागार नाओंए दासी का हुअ, सह ज़ल्मअ देहीए रिती संघै, अर ज़ुंण तेऊ असली बेटल़ी सारा का हुअ, तेऊ लै ती परमेशरै करार किई दी।
24ईंयां दूई बेटल़ी आसा परमेशर अर लोगा मांझ़ै दूई करारा ज़ेही। ज़ुंण करार परमेशरै सीनाई धारा इज़राईली मणछा संघै किई ज़धू तेऊ तिन्नां लै बधान दैनअ सह आसा हागारा ज़ेही। तेसे लुआद हुई गलाम। 25अरब देशे सीनाई धार आसा एरुशलेम नगरीए लोगा ज़िहै आझ़ बी किल्हैकि सह अर तेसे शोहरू काटा मोसा गूरे बधाने गलामी दी ज़िन्दगी।
26पर स्वर्गो एरुशलेम आसा आबरामे लाल़ी सारा ज़िहअ अर तेसे शोहरू निं गलाम आथी अह एरुशलेम नगरी आसा हाम्हां विश्वास करनै आल़ै लै ईजा ज़ेही। 27किल्हैकि पबित्र शास्त्रा दी आसा ईशायाह गूरै लिखअ द,#ईशा. 54:1
“एरुशलेम नगरीऐ, तूह हुई बांढी बेटल़ी ज़ेही,
तूह मनाऊं खुशी।
ताह ज़हा सूंणें दाहो थोघ निं आथी,
तूह कर गअल़ घुआल़ी ज़ोरै-ज़ोरै ज़ै-ज़ैकार,
किल्हैकि तेरी हणीं ऐबै सदा सुहागण बेटल़ी का खास्सी लुआद।”
28ए भाईओ, हाम्हैं आसा आबरामे शोहरू इसहाका ज़िहै ज़ुंण परमेशरे करारे साबै पैईदा हुअ, हाम्हैं बी हुऐ परमेशरे लुआद परमेशरे करारे साबै। 29ज़िहअ तेऊ ज़मानैं मणछे रिती दी पैईदा हुअ द शोहरू परमेशरे आत्में शगती करै पैईदा हुऐ दै शोहरू लै दुख दैआ त। तिहअ ई भेटा हाम्हां बी आझ़ तिन्नां का दुख ज़ुंण इहअ च़ाहा कि तम्हैं लोल़ी परमेशरा संघै धर्मीं हणां लै मोसा गूरो बधान मनअ।#मूल. 21:10
30पर पबित्र शास्त्र किज़ै बोला, “दासी अर तेसे शोहरू काढ पोर्ही, किल्हैकि गलाम ज़नानीओ शोहरू निं आज़ाद ज़नानीए शोहरू संघै बरासतो हकदार हणअ।”
31भाईओ, तैही बोला हुंह, हाम्हैं निं दासीए लुआद आथी पर हाम्हैं आसा आज़ाद ज़नानीए लुआद।
Pilihan Saat Ini:
गलाती 4: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.