बधान 6
6
बिधाते खास हुकम
1“बिधाता दैनअ मुल्है इना बधाना अर बिधी तम्हां इज़राईली का खोज़णेंओ हुकम, ताकि तम्हैं तेऊ देशै मने ज़ुंण ज़ैगा तम्हां लै बिधाता आसा लाई दी दैई अर ज़ेते मालक तम्हैं जरदण नदी पार टपी हणैं आल़ै आसा। 2ज़ै तम्हैं अर थारी आजू आद-लुआद आपणैं परमेशर बिधातो अदर करे अर तेऊए इना बधाना अर बिधी मने ज़ुंण मंऐं तम्हां का खोज़ी लाऐ, तै हणीं तैहा ज़ैगा थारी खास्सी अमर। 3इज़राईलीओ, तेऊ बिधाते गल्ला दी दैआ धैन ज़हा म्हारै दाद-बाब मना तै अर तेऊ आसा तम्हां लै एऊ देशा दैणें करार किई दी ज़ेते ज़ैगा खास्सी रज़दी-पज़दी आसा। ज़िहअ बिधाता बोलअ तिहअ ई करना लै चतैन बी रहै! तैही हणअ थारअ भलअ अर तम्हैं हणैं एक बलबान देश।
4“इज़राईलीओ, शूणां! म्हारअ परमेशर बिधाता आसा एक्कै ज़ुंण असली परमेशर आसा।#मार्क. 12:29 5तम्हैं करै आपणैं परमेशर बिधाता लै आपणअ सारअ मन्न, प्राण अर आपणअ सारअ ज़ोर लाई झ़ूरी।#मोत्त. 22:27; मार्क. 12:30; लूक. 10:27 6बिधाते बधान अर बिधी ज़ुंण मंऐं आझ़ खोज़ी लाऐ, तिंयां लोल़ी तम्हैं आपणैं दिलै सदा आद डाहै।#बधा. 11:18-20 7इना डाहै तम्हैं आपणैं शोहरू-माठै का भिई-भिई बोली खोज़ी। हर बगत करनी तिन्नां संघै एते ई बारै गल्ला, घअरै-बणैं, हांढदी-फिरदी, बैल़ी सुत्तदी अर दोत्ती उझ़दी करै तम्हैं एते ई बारै गल्ला। 8एता डाहै तम्हैं जंतरी-पत्री दी लिखी संघा डाहै आपणैं नल़ै अर दोहरी भृहुंई मांझ़ै माथै दी बान्हीं नछ़ैणा ज़िहै ताकि तम्हां सदा आद रहे। 9इना बधाना डाहै तम्हैं आपणैं दुआरे द्रींडा अर नगरीए प्रऊल़ी दी लिखी।
बिधातो हुकम निं चोल़ी
10“बिधाता आसा थारै दाद-बाब आबराम, इसहाक अर याकबा संघै एही करार किई दी कि तेऊ दैणीं अह ज़ैगा तम्हां लै। ऐबै पजैल़णैं तेऊ तम्हैं तैहा ज़ैगा अर तम्हां लै दैणीं तेऊ बडी-बडी नगरी अर तेथ शोभली-शोभली कोठी, ज़ेता लै थारी किछ़ै मैन्थ निं आथी लागी दी।#मूल. 12:7; 26:3; 28:13 11बधिया-बधिया च़िज़ा करै भेटणैं तम्हां घअर भरी, तिंयां च़िज़ा बी निं आथी तम्हैं तेथ झाल़ी डाही दी। तिधी दैणैं बिधाता तम्हां लै कुहै ज़ुंण तम्हैं निं कोतै, दाख अर जैतूने बाग, तिंयां बी निं आथी तम्हैं लाऐ दै। पर ज़ेभै तम्हैं इना च़िज़ा खाई करै रज्ज़ी जाए, 12तेभै निं तम्हैं ऐहा गल्ला बिस्सरुई आथी कि सह आसा बिधाता ज़ुंणी तम्हैं गलामी का आज़ाद किऐ अर मिसर देशा का इधी पजैल़ै। 13तम्हैं रहै आपणैं परमेशर बिधाते डरा हेठै अर तेऊए ई करै च़ाकरी, तम्हैं दैऐ सिधी तेऊए ई नाओंऐं ज़बान।#मोत्त. 4:10; लूक. 4:8
14“तम्हैं निं तिन्नां देअआ पिछ़ू डेऊई ज़ेता तम्हां फेर होरी देशे लोग पूज़ा। 15ज़ै तम्हैं तिन्नां होरी देअआ पूज़े, इहअ करै पल़णअ बिधातो कोप तम्हां लै आगी ज़िहअ अर तेता करै हणैं तम्हैं धरती का पठी खतम। 16तम्हैं निं आपणैं परमेशर बिधाता परखदै लागी, ज़िहअ तम्हैं मस्सा नाओंए ज़ैगा किअ त।#मोत्त. 4:7; लूक. 4:12; लुआ. 17:1-7 17तम्हैं मनै सदा तिन्नां बधाना, बिधी अर बिधाते हुकम ज़ुंण तेऊ तम्हां लै आसा दैनै दै। 18-19तम्हैं ज़िऊऐ तेही ज़िन्दगी ज़ेता लै बिधाता खुश हआ। तै हेरनी सह ज़ैगा तम्हां आपणैं दुशमणा का ज़िती, ज़ेही बिधाता म्हारै दादा-बाबा का ज़बान आसा दैनी दी।
20“तेखअ ज़ै आजू केभै थारै शोहरू-माठै तम्हां का इहअ पुछ़े, ‘बिधाता हाम्हां लै ईंयां बधान अर बिधी किल्है आसा दैनी दी?’
21“तेभै खोज़ै तम्हैं तिन्नां का इहअ, ‘हाम्हैं थिऐ मिसर देशे माहा राज़ेए गलाम अर बिधाता किऐ हाम्हैं आपणैं महान बला करै तेता का आज़ाद। 22हाम्हैं भाल़अ बिधाता आपणीं आछी च़मत्कार करदअ अर तेऊ पाई मिसर देशे माहा राज़ै, तेऊए कार करिंदै अर सोभी मिसरी लोगा लै घोर आफ़ता। 23तेखअ बच़ाऊऐ बिधाता हाम्हैं मिसर देशे गलामी का ताकि सह हाम्हां ऐहा ज़ैगा पजैल़ी सके, ज़िहअ तेऊ म्हारै दादा-बाबा संघै करार थिई किई दी। 24-25तैही आसा बिधाता हाम्हां लै हुकम किअ द कि हाम्हैं तेऊओ बधान मने अर हाम्हैं डरदी-काम्बदी तेऊए च़ाकरी करे। तेता करै हणैं हाम्हैं धर्मीं अर बिधाता करनी म्हारी फाज़त ज़िहअ सह आझ़ तैणीं करदी आअ, संघा करनी तेऊ म्हारी सोभी कामां लै सफल हणां लै मज़त।’”
Pilihan Saat Ini:
बधान 6: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.