Baroma 15
15
Ni mwikhoyese babaandi
1Ifwe babaali ni khufukiilila khukhumala khwakhiile khuyeeta abo babashiili batoro mu khufukiilila khwaabwe, mu shifwo she khuwosiina nga khubatsekhelela. 2Lekha buli mutweela khus'ifwe ekhoyese uwashe khubirira mu bilayi byeesi khukhola, nio akile amwombakhe mu khufukiilila khweewe. 3#Zab 69.9Khulwekhuba Kristu s'eyikhoyesa umweene ta, ne akhola nga ni sharonebwa shiri, “Tsikhomo tseesi bakhukhoma iwe, tsakwa khus'ise.” 4#1 Mak 12.9; 2 Mak 15.9Khulwekhuba buli shisharonebwa khaale, sharonebwa khulwe khukhuleekela ifwe. Ari nio bibyaronebwa bikhosefu bikhureere ifwe khuba ni khukhwiyikina khubirira mu khwikhalilikha ni khukhwisibwamo kamaani. 5Lekha Wele ukhuwa ifwe khukhwikhaliilikha nalundi ukhwisamo ifwe kamaani, abawe inywe khukholakanila atweela, nga mulondelela Kristu Yezu, nga niye she khubonelakho. 6Nio inywe mweesi atweela, nga likono litweela mubuyile Wele, nalundi niye uli Paapa w'Omukasya weefwe, Yezu Kristu.
Kamakhuuwa Kamalayi isi Banaambo
7Buli mutweela ni ekhoyele uwashe, khulwe khuuwa Wele shiriifwa, nga Kristu n'amala khubekhoyela inywe. 8Khulwekhuba imbaboolela inywe ndi ni Kristu ekyela umwakaanisi isi Bayudaaya ari nio okesanise bwa ŋali bwa Wele, ari nio awandalase byeesi Wele aloma nga abirira mu bakuuka beefwe. 9#2 Sam 22.50; Zab 18.49Nalundi ari nio be kamanaambo babuyile Wele khulwe shiisa sheewe. Nga bibyaronebwa bikhosefu ni biloma biri,
“Nashiryo kane ikhuyile iwe nga ndi akari mu manaambo.
Kane niimbe nga imbuyila lisiina lyoowo.”
10 #
Maka 32.43
Nalundi sharonebwa shiri,
“Banaambo ni mwikhoyele atweela ni babaandu ba Wele.”
11 #
Zab 117.1
Mu shifwo shishiindi bibyaronebwa biloma biri,
“Inywe be Kamanaambo kakakhali ke ba Isiraeli ta,
mweesi ni mubuyile Umukasya;
inywe babaandu boosi ni mumubuyile.”
12 #
Isay 11.10
Nalundi Yisaaya eloosela khuloma ari,
“Umwitsukhulu uwa Yese aliitsa,
atsowesebwe khuuba umuwuli uwe kamanaambo,
ni Banaambo balira khukhwiyikina khwaabwe mu niye.”
13Khali Wele umweene uwe khukhwiyikina abetsusile inywe ni kumwikhoyo, ni lukoosi mu khufukiilila khwenywe, nio manya khulwe kamaani k'Omwoyo Umukhosefu mwiloosele khuuba ni khukhwiyikina.
Shishakila Paulo warona aryo
14Be buulebe, ise samweene ishihandalasa ndi inywe mwabeene mwetsuule buulayi, ni khumanya, nalundi namanyile ndi mwabeene khu mwabeene buli mutweela anyala khuleekela uwashe. 15Ne khu bilomo bitweela naabaronele ni bunyindaalifu mu saambo iye khubashebusa, khulwe bubweela bweesi Wele amba ise. 16Amba ise khuuba umwakaanisi wa Kristu Yezu isi Banaambo, mu khuboolela Kamakhuuwa Kamalayi ka Wele, nga umusaayi. Shino ise ishikhola nio akile Banaambo babe shiwaanwa sheesi Wele asiima, nga Umwoyo Umukhosefu abarobola khuuba ba Wele.
17Nashiryo indi ni shishikila nebuyila samweene khulwe buraambi bwase bweesi ikholela Wele, nga ndi atweela ni Kristu Yezu. 18Kane imbe umunyindalifu inganikhe khwibyo byonyene byeesi Kristu amalile khukhola khubirira mus'iise, nga nikhwo khuraangilila Banaambo banyalisa khulondelela Wele. Ibyo Kristu wabikholile nga abirira mu byeesi ise ikholile ni byeesi ise inomile, 19nga araambisa kamaani ke bibibonekha ni bye kamakaanga, ni khulwe kamaani k'Omwoyo Umukhosefu. Shishikila khukhwaama i Yerusalemu, ni khukhwibotokhelela ilala mu Ilikumu, naboolela Kamakhuuwa Kamalayi kakawamba khu Kristu. 20Shitsiililwa shase busheele shaba she khulaangilila kamakhuuwa kamalayi, mu bifwo mweesi bashiili khumanya Kristu ta. Khulwekhuba ise nakana khunanikha mu shifwo sheesi ukuundi ashiili khunanikha ta.
21 #
Isay 52.15
Ne akhali ndi ise ikhola nga ni sharonebwa shiri,
“Abo babashiili khuwulila khu biwamba khu Kristu ta, bali mubona,
ni naabo babashiili khuwulila khu bimuwambakho ta, balimanya.”
Paulo arengekharengekha khukyeniya i Roma
22 #
Roma 1.13
Ni khulwe ilomo yino, kimilundi kimikali shayishinjilila ise khukhwiitsa isi muli. 23Ne ari khukhwaama nga n'imalile buraambi bwase mu bisiintsa bino, nalundi khukhwaama nga abe namalile kimiiko mikali nga nikoomba khukhwiitsa khu babona, 24ari nambaasa khubabona nga ndi khu lukyeendo lwase, nga intsya i Sipeyini. Namanyile ndi lwanyuma lwe khuuba ni nanywe khafwiiti, kane munjeete nio niloosele mu lukyeendo lwase. 25#1 Kor 16.1-4Ne ari indikho intsya i Yerusalemu, nga nakaanisa buyeeti isi bakhosefu ba Wele. 26Khulwekhuba babaandu be Masedoniya ni be Akaya baboone bari shili shilayi khubukula khu biindu byabwe bayeete batweela khu bakhosefu ba Wele babaali mu Yerusalemu babaali bataambi. 27#1 Kor 9.11Nibo babeene babakhalawo khukhola baryo. Ne nga washimenielesile, bali ni likatala lye khuyeeta babaandu be Yerusalemu. Khukhwaama nga ari bali shitweela ni Banaambo mu khukabanana tsikhabi tse mu mwoyo khukhwaama isi Wele, nabo shandyashiile babakabilekho tsikhabi tsye bibiindu byeesi bali ni nabyo. 28Nashiryo nindiba nga namalile shino, nalundi nga namalile khubakaanisa byeesi bababuusanisiile, indibirira isi inywe muli nga intsya i Sipeyini. 29Ne namanyile ndi nga niitsa isi muli, indibareereera tsikhabi tsya Kristu mu bwitsufu.
30Indikho mbaloomba inywe be buulebe, indi khulw'Omukasya weefwe Yezu Kristu, ni khuukana khweesi Umwoyo areera, mukhakekho naabi muntsitubaasekho munoombele ise isi Wele. 31Ise ingana munoombele indi ni babakhafukiilila mu Wele ta be mu Yuda balekhe khukhuntsolisakho ise bukosi bwoosi ta. Nalundi ndi nio bakhosefu ba Wele be Yerusalemu bafukiilise buraambi bwase. 32Noola abe Wele wakanile, shino shikile niitse isi muli nga ndi ni kumwikhoyo. Nalundi ndi nio mu khubakyeniyila inywe, nase ifune kamaani. 33Lukoosi lulwama isi Wele lube ni nanywe mweesi. Amiina.
Pilihan Saat Ini:
Baroma 15: LCE
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.