MATAIO FAZA 25.
FAZA 25.
I. Amaedola: Ono alawe si dafoeloe. II. Amaedola: Anaʼa, nibeʼe ba zohare. III. Fangoehoekoe ba gamozoea.
1I. Ba daʼõ dania fachilichili ira mbanoea zoroego andrõ nono alawe, dafoeloe, sangai fandroera, ba weʼamõi mamaondragõ sangowaloe. (Fam. 19, 7 b. t. Kor. II. 11, 2). 2Ba dalima ira zambõ tõdõ, ba dalima zatoeatoea. 3Lahalõ sa wandroera sambõ tõdõ andrõ, ba lõ laʼohe wanicha. 4Ba satoeatoea andrõ, ba laʼohe wanicha ba nahia, fabaja fandroera. 5Ba me ara zangowaloe, ba manoekõoe ira fefoe ba mõrõ. 6Ba me taloe mbongi, ba so ziʼao: Hiza zangowaloe, miʼae mifaondragõ ia! 7Awena maoso nono alawe andrõ fefoe ba lahaogõ wandroera. (Loek. 12, 36). 8Ba lamane sambõ tõdõ andrõ ba zatoeatoea: Mibeʼe fanichama wanichami maʼifoe, mate sa wandroema andre. 9Ba latema lira satoeatoea, lamane: Ma dania faoma ambõ chõda; sõchi na mõi ami ba zolafo, ba na miʼõli chõmi. 10Ba me no mõi ira mowõli, ba so zangowaloe, ba si no mamaʼanõ, ba mõi jomo, awõnia ba walõw̃a, ba lakoesi mbawandroehõ. (Loek. 13, 25 b. t.). 11Ba aefa daʼõ, ba so gõi nono alawe no mege, si tosai, lamane: He Toea! he Toea! bokai chõma! 12Ba itema lira, imane: Si ndroehoe niw̃aʼõgoe chõmi, lõ oeʼila, ha niha ami. (F. 7, 22. 23. Loek. 13, 27). 13Andrõ bõi mifõrõ, me lõ miʼila mbaw̃a, aw̃o ginõtõ.
(A. 25, 14—30: Loek. 19, 11—28)
14II. Hoelõ niha sofanõ: Hoemede ia ba zawoejoenia, ibeʼe ba dangara zi so chõnia. 15Ibeʼe ba zi samõsa, ba lima balaki, ba ba zi samõsa, ba doea balaki, ba ba zi samõsa, ba samba fondroejoe, dali waʼabõlõ zamõsana, ba mofanõ ia. 16Ba iʼanemaʼõ mõi nibeʼe si lima balaki, ilaoe ba waniaga, ba fabali. 17Si manõ gõi nibeʼe si doea balaki, fabali ibeʼe. 18Ba nibeʼe si samba fondroejoe, ba mõi mogoʼoli tanõ, ibiniʼõ bacha ganaʼa zochõ jaʼia. 19Ba me no ara, ba so zochõ sawoejoe andrõ, ba mangerai õmõ ia chõra. 20Ba iʼondrasi ia nibeʼe si lima balaki, iʼohe gõi zi lima balaki harenia, imane: Lima balaki nibeʼeoe ba dangagoe, Toea faigi, lima balaki tõ, nisõndragoe, harenia. 21Imane chõnia sochõ jaʼia: Laoe, sawoejoe si sõchi, si lõ farõi; lõ si farõi ndraʼoegõ ba zi lõ ojaʼoja, ba oebeʼe barõ mbawaoe zoja; taboe ba waʼomoeso dõdõ andrõ chõ zochõ jaʼoegõ. (F. 24, 45. 47). 22Ba iʼondrasi gõi ia nibeʼe si doea balaki, imane: Doea balaki nibeʼeoe ba dangagoe, Toea, faigi doea balaki tõ nisõndragoe harenia. 23Imane chõnia sochõ jaʼia: Laoe, sawoejoe si sõchi, si lõ farõi; lõ si farõi ndraʼoegõ ba zi lõ ojaʼoja, ba oebeʼe barõ mbawaoe zoja; taboe ba waʼomoeso dõdõ andrõ chõ zochõ jaʼoegõ. 24Ba iʼondrasi ia gõi nibeʼe si samba fondroejoe andrõ, imane: He Toea, no oeʼila ndraʼoegõ, wa niha sabeʼe hoekoe ndraʼoegõ; mamasi ndraʼoegõ ba zi lõ nitaroemõ ba mangozaraʼõ ba zi lõ nifazaeweoe, 25ba no ataʼoe ndraʼo, ba no mõido moebiniʼõ zi samba fondroejoe andrõ chõoe barõ danõ; ba jaʼae chõoe ganaʼaoe. 26Ba itema linia sochõ jaʼia, imane chõnia: He sawoejoe si lõ sõchi, sareoe! Na no õʼila mamasi ndraʼo, ba zi lõ nitaroegoe ba mangozara ndraʼo, ba zi lõ nifazaewegoe; 27ba õbeʼe menaʼõ nifalali wirõgoe andrõ, ba zamalali anaʼa, ba na so ndraʼo, ba oetema enaʼõ ganaʼagoe, fabaja hare. 28Ba mihalõ chõnia zi samba fondroejoe andrõ, ba mibeʼe ba zi so si foeloe balaki. 29Dozi sa, ba zi so ba tebeʼe na ba tehõna chõra; ba ba zi lõ õ, ba teheta gõi zi so chõnia. (F. 13, 12). 30Ba sawoejoe andrõ, si lõ goena, ba mitiboʼõ baero ba zogõmigõmi. Ba fegeʼege dania ba daʼõ ba fatangisa mboha. (F. 8, 12).
31III. Ba na so Nono Niha, na si so lachõmi ia, na fao chõnia malaʼika andrõ fefoe, ba daʼõ dania doemadao ia ba dadaoma lachõminia andrõ. (F. 16, 27. Loek. 21, 27). 32Ba teʼowoeloi dania fõnania fefoe soi, ba ifõfõʼõ ira, si mane na ifõfõʼõ ira mbiribiri si alawe mbiribiri si matoea koebalo. (Rom. 14, 10. Kor. II. 5, 10). 33Ba ifaʼaso ba gambõlõnia mbiribiri si alawe, ba ba gaberania mbiribiri si matoea. (Hes. 34, 17 b. t.). 34Ba imane dania razo andrõ ba zi so ba gambõlõnia: Mi aine, jaʼami, nifahowoeʼõ Namagoe, mitema gondrõita andrõ, banoea andrõ, niʼasiwai chõmi, iʼotarai mbõ õta danõ. 35Me olofo ndraʼo, ba no mibeʼe gõgoe; me owõchi dõdõgoe, ba no nifabadoegõ chõgoe nidanõ; me tome ndraʼo, ba no mifaʼamõido jomo; (Jes. 58, 7); 36me lõ noechagoe, ba no mifonoecha ndraʼo; me mofõchõ ndraʼo, ba no mõi ami moefaigi ndraʼo; ba me sodo ba goeroenga, ba no mõi ami chõgoe. 37Ba latema dania linia satoelõ andrõ, lamane: He Toea, ha mega maʼila solofo ndraʼoegõ, ba mabeʼe gõoe! ba ma sowõchi tõdõ ndraʼoegõ, ba mafabadoegõ chõoe nidanõ? 38Ba ha mega maʼila, tome ndraʼoegõ, ba mafaʼamõiʼõ jomo? ba ma si lõ noecha ndraʼoegõ, ba mafonoechaʼõ? 39Ba ha mega maʼila sotõchõ ndraʼoegõ, ba ma si so ba goeroenga, ba mõiga chõoe? 40Ba itema dania lira razo andrõ, imane chõra: Si ndroehoe niw̃aʼõgoe chõmi, ndrege nilaoemi ba dalifoesõgoe andrõ, fondrege zi noemana, ha niha ia, ba chõgoe no milao daʼõ. (F. 10, 40. Amaed. 19, 17. Mar. 3, 35). 41Awena dania imane gõi ba zi so ba gabera: Milaboe ami, jaʼami, niʼelifi, miʼae ba galitõ andrõ, si lõ matemate, niʼeboeaʼõ chõ Gafõcha andrõ ba ba malaʼikania. (F. 7, 23. Jes. 30, 33. Fam. 20, 10. 15; 21. 8). 42Olofo ndraʼo, ba lõ nibeʼemi õgoe; owõchi dõdõgoe, ba lõ nifabadoegõmi chõgoe; (Jak. 4, 17); 43tome ndraʼo, ba lõ nifaʼamõimi jomo jaʼo; lõ noechagoe, ba lõ nifonoechami jaʼodo; mofõchõ ndraʼo, ba ba goeroenga sodo, ba lõ si mõi ami mamaigi jaʼo. 44Ba latema dania linia, jaʼira gõi, lamane: He Toea, ha mega maʼila solofo ndraʼoegõ, ba ma sowõchi tõdõ, ba ma tome, ba ma si lõ noecha, ba ma sofõchõ, ba ma si so ba goeroenga ndraʼoegõ, si lõ si mõiga ngoningonioe? 45Ba itema dania lira, imane: Si ndroehoe niw̃aʼõgoe chõmi, ndrege zi lõ nilaoemi chõ wondrege zi noemana andrõ, ha niha ia, ba chõgoe gõi lõ nilaoemi daʼõ. 46Ba mõi daʼõ ba waʼafõchõ si lõ aetoe andrõ, ba satoelõ andrõ, ba mõi ba waʼaoeri si lõ aetoe. (Dan. 12, 2. Joh. 5, 29).
Pilihan Saat Ini:
MATAIO FAZA 25.: NIA
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.