MATAIO FAZA 24.
FAZA 24.
I. Famaʼeleʼõ fanoedoegõ Jeroezalema. II. Famaʼeleʼõ faʼatoea danõ. III. Famarooe tõdõ, ba wa lõ mõrõ.
(A. 24, 1—28: Mar. 13, 1—23: Loek. 21, 5—24)
1I. Ba mõi baero Jesoe, irõi gosali, mofanõ ia, ba mõi chõnia nifahaõnia, ba wanoetoeroe osali andrõ chõnia. 2Ba itema lira, imane chõra: Hadia, lõ miʼila daʼõ fefoe? Si ndroehoe niw̃aʼõgoe chõmi, samboea lõ torõi ba daʼõ ba dete nawõnia jaw̃a, kara, si lõ ladoedoegõ. (Loek. 19, 44). 3Ba me moedadao ia ba hili wanicha, ba mõi chõnia nifahaõnia, ba zi ha jaʼira, lamane: Ombachaʼõ chõma, ha waʼara daʼõ, ba hadia dandra waʼasomõ ba tandra waʼatoea danõ. 4Ba itema lira Jesoe, imane chõra: Mifaigi, fa bõi ifaeloengoe ami niha, ha niha ia. (F. 7, 15. Tes. II. 2, 3). 5Ato sa dania zi mõi, sanagõ tõigoe, sangoemaʼõ: Jaʼodo Keriso, ba ato lafaeloengoe. (Joh. 5, 43. Hal. zin. 5, 36 b. t.). 6Ba mirongo dania wanoewõ ba feʼiraʼira ba wanoewõ; mifaigi, bõi tokea ami; lõʼõ sa tola lõ si manõ, ba tenga faʼatoea danõ na sa. 7Maoso dania zi samboea soi, oedoe zi samboea; ba si sara õri, oedoe zi sara; ba sosó lofo mbanoea awõ ndroeroe danõ misa. 8Ba bõrõta waʼafõchõ daʼõ fefoe. 9Ba daʼõ dania laʼohe ami ba wamakao ba laboenoe ami; ba dozi soi dania zi fatioe tõdõ chõmi, bõrõ dõigoe andrõ. (F. 10, 17 b. t. Joh. 16, 2. Fam. 2, 10). 10Ba ato dania ba daʼõ zi teʼala, ba faoma dania laʼā mbõli nawõra, ba faoma fatioe dõdõra chõ nawõra. 11Ba ato zi maoso samaʼeleʼõ sofaja, ba ato lafaeloengoe. (Joh. I. 4, 1). 12Ba me monõnõ wa lõ atoelõ, ba ato zi taja faʼomasi. (Tim. II. 3, 1 b. t.). 13Ba sanaoe õlõ iroegi gamozoea, daʼõ niʼorifi. (F. 10, 22. Jak. 1, 12). 14Ba tetoeriagõ dania mbanoea Lowalangi andrõ, toeria somoeso dõdõ, ba goeli danõ misa, maʼasagõrõ, ba wamadoehoeʼõ ba niha fefoe, ba awena dania faʼatoea danõ. (Rom. 10, 18). 15Ba na miʼila dania waʼadoedoe andrõ, sihocha mboeda, niw̃aʼõ Daniëli, ba naha niʼamoniʼõ — jatoemõrõ tõdõnia sombaso daʼe — (Dan. 9, 27; 12, 13) 16ba ndramoloi zi so ba Joedaia, ndramoesaw̃a hili. 17Bõi jamõi tooe zi so ba dete nomonia jaw̃a, ba wangai hadia ia ba nomonia, (Loek. 17, 31), 18ba bõi jamoefoeli ia foeri si so ba nowi, ba wangai baroenia. 19Ba alai zanabina ba si so ono ba mbagi zoesoe, na loeo daʼõ! (Loek. 23, 29). 20Ba miʼangandrõ, fa bõi baw̃a deoe, ba fa bõi loeo sabato, na loeo woloimi andrõ. 21So sa wamakao sabõlõbõlõ ba daʼõ dania, si lõ irai si manõ, iʼotarai mbõrõta danõ, irege daʼe, ba lõʼõ gõi si manõ dania. (Dan. 12, 1). 22Ba na tenga niʼõnaigõ loeo daʼõ enaʼõ, ba samõsa lõ aoeri niha. Ba bõrõ nitoetoejoe andrõ, wa teʼõnaigõ loeo andrõ. 23Ba na so ba daʼõ zangoemaʼõ chõmi: Faigi, so ba daʼe Keriso, ba ma: ba daʼõ so ia, ba bõi mifati. (Loek. 17, 21. 23 b. t.). 24Maoso sa dania Keriso faja ba samaʼeleʼõ sofaja, ba lafazõchi dandra seboea, awõ gilaʼila, ba wamaeloengoe nitoetoejoe andrõ, na bõla. (Tes. II. 2, 9). 25Hiza, no oehõnagõ oew̃aʼõ chõmi. 26Ba na lamane chõmi: Hiza, ba danõ si mate so ia, ba bõi miʼaeʼe; ba ma: Hiza, ba mbateʼe, ba bõi mifati. 27Hoelõ gari mbanoea sa si otarai gatoemboecha loeo, sihaga, irege gaechoela, si manõ dania waʼaso Nono Niha andrõ. (Loek. 17, 24). 28Ba zi so amatela, ba daʼõ owoeloe mojo. (Job. 39, 30. Loek. 17, 37).
(A. 24, 29—36: Mar. 13, 24—32: Loek. 21, 25—33)
29II. Ba aefa siʼaikõ wamakao andrõ, na loeo daʼõ, ba taja haga loeo, ba lõʼõ saʼae hoemaga mbaw̃a, ba atoroe ndrõfi moroi ba mbanoea si jaw̃a, ba hoemeoeheoe wangaro mbanoea si jaw̃a. (Jes. 13, 10. Fam. 6, 12 b. t.). 30Ba aefa daʼõ, ba oroma dandra Nono Niha andrõ ba mbanoea si jaw̃a, ba megeʼege fefoe soi ba goeli danõ, ba laʼila dania Nono Niha, si so moroi si jaw̃a, ba dete lawoeo ba mbanoea, fao waʼabõlõ ba lachõmi seboea. (F. 25, 31, Dan. 7, 13. Fam. 1, 7. Mar. 14, 62). 31Ba ifatenge malaʼikania, telaoe dorofe seboea li, ba laʼowoeloi chõnia nitoetoejoenia andrõ, moroi ba zi fasoei, iʼotarai wondrege danõ, noemalõ ba wondregenia tánõ sa. (F. 13, 41. Tes. I. 4, 16). 32Ba ba marafala mitõngõni wamaedo andrõ: Na moʼidanõ ndrahania, na toemboe lehelehe, ba miʼila, no ahatõ mbaw̃a waʼaoechoe zino. (Loek. 21, 37). 33Si manõ gõi ami, na miʼila daʼõ fefoe, ba oroma chõmi, no ahatõ ia. 34Si ndroehoe niw̃aʼõgoe chõmi, lõ fachamõ atoea niha si sagõtõ andre, ba no aloea daʼõ fefoe. (F. 16, 28). 35Atoea mbanoea ba atoea danõ, ba lõ awoeʼa niw̃aʼõgoe. 36Ba baw̃a andrõ ba inõtõ, ba lõ sangila, he malaʼika ba zoroego, he Ono; ha Ama zangila. (Tes. I. 5, 1 b. t.).
(A. 24, 37—41: Loek. 17, 26—36)
37Ba hoelõ si mane me loeo Noachi, si manõ gõi waʼaso Nono Niha andrõ dania. (Moz. I. 6, 5. 11 b. t.). 38Hoelõ si mane jaʼira sa, me loeo fõna waʼanõnõ danõ andrõ, mangamanga ira ba mamadoemadoe hadia ia, mangowaloe ba mameʼe nihalõ, iroegi loeo mõi baowo Noachi, 39ba lõ aboto ba dõdõra, irege so waʼanõnõ andrõ ba irege ahori ira fefoe, si manõ gõi dania waʼaso Nono Niha andrõ. 40Daroea dania zi so ba nowi; samõsa nihalõ ba si samõsa, ba nirõi. 41Daroea ndra alawe sanoetoe fache ba lõsoe; samõsa nihalõ ba si samõsa, ba nirõi.
42III. Andrõ, bõi mifõrõ, me lõ miʼila mbaw̃a waʼaso Zoʼaja jaʼami. (F. 25, 13. Mar. 13, 33). 43Ba daʼõ mibeʼe ba dõdõmi: Na iʼila enaʼõ sochõ omo, ha waʼalaw̃a mbongi so zanagõ, ba lõ mõrõ ia enaʼõ, ba itimba enaʼõ zanagõ, fa lõ mõi jomo chõnia. (Loek. 12, 39 b. t. Fet. II. 3, 10. Fam. 3, 3). 44Andrõ jaʼami gõi, mihõnagõ mifaʼanõ ami, me si lõ midõnadõna dania Nono Niha, na so ia.
(A. 24, 45—51: Loek. 12, 42—46)
45Ba ha niha zawoejoe andrõ, si lõ farõi, satoeatoea, nibeʼe zochõ jaʼia barõ mbawa si so jomo chõnia, ba wameʼe gõra, na inõtõ wemanga? 46Jaʼahowoe zawoejoe andrõ, na iʼila sochõ jaʼia, na so ia, no iʼoʼõ daʼõ. 47Si ndroehoe niw̃aʼõgoe chõmi, ibeʼe barõ mbawania fefoe hadia ia, zi so chõnia. 48Ba na iw̃aʼõ tõdõnia sawoejoe si lõ sõchi: Mogasa waʼaso zochõ jaʼo, 49ba na ibõrõtaigõ ibõzibõzi nawõnia sawoejoe, ba na mangamanga ia, ba na ibadoebadoe hadia ia, awõ zi maboemaboe andrõ; 50ba so dania zochõ sawoejoe andrõ, na loeo lõ idõnadõna ba gamaoedoe waʼalaw̃a loeo, na iwai lõ jaʼia na; 51ba iʼõtõ daloe zawoejoe andrõ, ba ibeʼe goerachania awõ zamini tõdõ andrõ; ba fegeʼege dania ba daʼõ ba fatangisa mboha. (F. 22, 13; 25, 30).
Pilihan Saat Ini:
MATAIO FAZA 24.: NIA
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.