Ayat-ayat Alkitab Ternama dari गलाती 5

Bagikan

पर ज़ेभै हाम्हैं पबित्र आत्में बशै रहा सह करा हाम्हां दी झ़ूरी, नंद, मेल़-ज़ोल़, भलाई, विश्वास, क्रिप्पा, सबर, शरीफी, सबर पैईदा इहै-इहै कामें खलाफ निं कोहै बधान आथी।

पर हुंह बोला तम्हां लै इहअ कि पबित्र आत्में साबै काटणी आपणीं ज़िन्दगी। तै निं तम्हां तिंयां बूरी गल्‍ला करनी ज़ुंण थारअ पापी सभाब च़ाहा करनअ।

ज़ै हाम्हां लै पबित्र आत्मां नऊंईं ज़िन्दगी आसा हेरी दी दैई, तै लागा हाम्हां पबित्र आत्में बशै आपणीं सारी ज़िन्दगी ज़िऊंणीं।

आजू लै आसा इहअ कि ज़ुंण मसीहा ईशूए आसा, तिंयां निं तिन्‍नां पापी सभाबे कामां ऐबै करी सकदै ज़ेता करनैओ हाम्हां पैहलै च़ाअ लागा त। किल्हैकि ईंयां कदुष्ट काम आसा हाम्हैं क्रूसा दी छ़ड़ाऊई करै मारी हेरै दै!

अह गल्‍ल आसा सोभी का शुझदी कि पापी सभाब किज़ै च़ाहा करनअ, मतलब कंज़रैई ज़िहै छ़ोतलै अर च़िल़्हखरै काम, मुहुर्ती पूज़ा, ज़ादू मत्र, ज़ीद, झ़गल़ै, होरीए च़िज़ो मांण, रोश्श, बरोध, फूट, कल़बिश, होरीए च़िज़ा आप्पू लै च़ाहणीं, शराबी हणअ। इना ज़िहै आसा कई च़िल़्हखरै काम, इने इहै कामें बारै दैआ हुंह तम्हां लै चतैनगी ज़िहै मंऐं तम्हैं पैहलै बी किऐ तै चतैन कि इहै-इहै कामां करनै आल़ै निं परमेशरे राज़ा दी बरासते हकदार हणैं।

ए भाईओ, तम्हैं आसा परमेशरै आज़ाद हणां लै शादै दै अर ऐबै निं तम्हां मोसा गूरे बधाने गलामी दी रहणें ज़रुरत आथी, पर इहअ निं सोठा कि तम्हैं आसा देहीए पापी सभाबे साबै काम करना लै आज़ाद। एकी-दुजै संघै करा झ़ूरी अर च़ाकरी तम्हैं आसा एता करना लै आज़ाद।

किल्हैकि ज़ुंण थारअ पापी सभाब करनअ च़ाहा तिहअ निं पबित्र आत्मां करनअ च़ाहंदी। ठीक इहअ ई ज़ुंण पबित्र आत्मां करा तेता निं म्हारअ पापी सभाब करनअ च़ाहंदअ। ईंयां दूई शगती करा कबल्‍ली एकी-दुजै संघै जुध। तम्हैं निं हर बगत भलै काम करी सकदै ज़ुंण हाम्हैं करनअ च़ाहा।

किल्हैकि सारअ बधान हआ ऐहा एकी गल्‍ला दी पूरअ, “तूह कर आपणैं साथी-संघी संघै आप्पू ज़ेही झ़ूरी।”

तै निं हाम्हां घमंडी हणअ, हाम्हां निं एकी-दुजै लै रोश्श झ़ैऊंणीं नां एकी-दुजै संघै ज़ीद डाहणीं।

मसीहा आसा हाम्हैं मोसा गूरे बधाना का आज़ाद किऐ दै, हर बगत रहा आज़ाद किऐ दै लोगा ज़िहै बणी। ऐबै निं भिई तम्हैं बधाना मनणे गलामीए जूँआं दी पल़ा।