Matayo 14
14
Ku̱wa ndia Yohana Mbati̱zi̱
(Maliko 6:14-29; Luka 9:7-9)
1Ka bwile injo, Helude ntua esaza aoka makulu ndia angbei̱be Yesu, 2du̱mbi̱ nakibhugia bhakoli̱ ndibhaki bhiyo; “Miyo andi Yohana Mbati̱zi̱, ahu̱mbu̱ki̱a toli̱ adhu̱ ndu̱lu̱ nali na mani̱ sa kola ndia akitina nki̱li̱.”
3Helude ali̱ka nabhulagi̱li̱ bhasilikale ndibhaki eti bhangbe Yohana, bhambu̱we toli̱ bhambi̱se ka nkomo nanga Heludi̱ya nkali̱ mindia namaki Fi̱li̱po. 4Akola yoho nanga Yohana yangiaga Helude bhiyo; “Kogbokiliani̱ ama nyi̱ako Heludi̱ya.” 5Helude nakikabha ola Yohana Mbati̱zi̱, no nakitiya nanga Bhayu̱daya bi̱yabho yabhamu̱hi̱ki̱li̱zi̱ Yohana bhia nabbi̱.
6No ka tolo sa kanilia bhokotiana ndia Helude, mi̱ki̱ mindia Heludi̱ya naki̱bhi̱na ka bhageni̱ kulungi toli̱ Helude nakidhedhelua, 7du̱mbi̱ nakilahilia pesi̱aki poni ndia akinkunga. 8Amaki nakintolia ndia akinkunga Helude du̱mbi̱ nsika nakingia Helude bhiyo; “Onipesi̱e mehe endindi muhu ndia Yohana Mbati̱zi̱ ka siniya.” 9Helude atuntula si̱ni̱, nanga lahilia ndiaki kei̱soa bhageni̱, nakilagilia eti bhampesi̱e ndia akungi̱o. 10Du̱mbi̱ Helude nakibhutika bhasilikale ndibhaki eti bhai̱ye ka nkomo bhanzombebe Yohana muhu. 11Nibhaki̱mbi̱ki̱si̱li̱a muhu ndia Yohana ka siniya nibhaki̱mpesi̱a nsika, naki̱sa ka amaki. 12Bhaegi̱ ndibha Yohana nibhaki̱ya ka nkomo bhuwaku̱ ki̱nda ndiaki nibhaki̱lu̱mba. Du̱mbi̱ nibhaki̱ya tolia Yesu nesi̱ Helude amu̱oli̱ Yohana.
Yesu naki̱bhu̱li̱si̱a bhakpa nku̱mi̱ tano
(Maliko 6:30-44; Luka 9:10-17)
13Yesu ndia aoka makulu ndia agbei̱be ku̱wa ndia Yohana, adhaya bhwati̱ ka nsobho naki̱ya ka kikalo kindia bhakpa yabhakabhi̱. Bhakpa bi̱yabho ndia bhaoka injo, nibhakituka ka tau̱ni̱ ndiabho tombaki nibhalia kidhetaga. 14Yesu ndia atuka ka bhwati̱, abhutangia bi̱ya bhakpa, nakibhugbelia kobhu̱ toli̱ nakibhulami̱sa ndibha yabhalwali̱o.
15Nali bi̱ya duwai̱ tamabhugo-bhugo, bhaegi̱ nibhaki̱ya kindia abhi̱o nibhakingia bhiyo; “Yoho andi kyalo ndia kali bi̱ya na tau̱ni̱, toli̱ kyalo ali kali̱ai̱. Obhulake bhakpa bhai̱ye ka ngongwa-mbi̱li̱ andu̱lu̱ bhasumbe li̱eli̱.”
16Yesu naki̱bhu̱si̱ki̱aku̱ bhiyo; “Bhakagbokiliani̱ yabho. Bhu̱bhu̱pesi̱e li̱eli̱.”
17Nibhaki̱nsi̱ki̱aku̱ bhiyo; “Kili na mugati̱ tano na bhasu̱ bhebhali tedhe.”
18Yesu nakibhugia bhiyo; “Bhu̱bi̱ki̱se mugati̱ na bhasu̱ bhenjo mehe.” 19Du̱mbi̱ nakibhulagilia bhakpa li̱kagabho gwabhi̱mba ka kasamili. Nakibhuwa mugati̱ tano na bhasu̱ bhebhali, naki̱zi̱ba gulu naki̱nsi̱ma Mambombi̱. Naki̱u̱dha mugati̱ nakibhupesi̱a bhaegi̱ ndibhaki tambula bhakpa. 20Bhoponi bhaliaga toli̱ nibhaki̱ku̱ta. Bhaegi̱ nibhakikumesa kigega komi̱ namu̱lu̱ bhali sa mugati̱ na bhasu̱ ndia abhusaga. 21Ndibha bhaliaga bhabhi̱ bhia bhaluku nku̱mi̱ tano nobhubhoi̱be bhakali̱ na bhani̱ki̱.
Yesu nakidhetiliaga gua li̱bho
(Maliko 6:45-52; Yohana 6:15-21)
22Menjo Yesu nakibhulagilia bhaegi̱ ndibhaki dhaya bhwati̱ andu̱lu̱ bhatekete bhai̱ye naseke ndietolo se tu̱li̱, ye nalia kibhulaka bi̱ya bhakpa. 23Ndia adhakia lakabho, nakidhaya gua gu̱si̱a saba yekaka, kindia adoi̱sa ki̱li̱ya naliaku̱ yekaka. 24Toli̱ bhwati̱ abha nalai̱ gendo mazamba tukai̱ ka mwalo, no ngala li̱bho abha kahunga-hungi̱sai̱ nanga wewelia abhu̱bhi̱ zidhi.
25Ka ti̱ni̱-ti̱ni̱, Yesu nakibhuduwabe nalia kidhetiliaga gua li̱bho. 26Bhaegi̱ ndia bhantangia Yesu nali kadhetiliaga gua li̱bho, bhatiya, nibhakigia bhiyo; “Ali mu̱li̱mo,” nibhakihabhaga nanga bhoko.
27Du̱mbi̱ Yesu nakibhugia bhiyo; “Bhukulukutiya, andimi.”
28Petelo naki̱nsi̱ki̱aku̱ bhiyo; “Sali̱a kabha nanduwe Yesu, onilagilie ni̱bi̱ke kindia olio gua li̱bho.”
29Yesu nakingia bhiyo; “Obi̱ke.” Du̱mbi̱ Petelo nakituka ka bhwati̱, nakitandika yaki kindia Yesu.
30No ndia atangia wewelia, nakitiya, li̱bho nakitandika medhaki, nakihabhaga bhiyo; “Sali̱a onikonie!”
31Menjo Yesu nakingba nakingia bhiyo; “Uwe mindia oli na hi̱ki̱li̱za nke, ndia adhu̱ koniesige andiki?”
32Ndia bhadhaya bhwati̱, wewelia nakidhuwa bhi̱ndai̱. 33Bhaegi̱ ndibha Yesu ndibhabhi̱ ka bhwati̱ nibhakimulami̱a bhiyo; “Ka mazima oli Mi̱ki̱ mindia Mambombi̱.”
34Ndia bhazaba tu̱li̱, bhaki̱dha ka mwalo ndia abhi̱ bi̱ya na ngongwa-mbi̱li̱ ndia ka Genesaleti̱. 35Toli̱ bhakpa ndibha ka ngongwa-mbi̱li̱ injo ndia bhamu̱i̱bi̱li̱a eti andi Yesu, bhadhakisaga makulu ka kyalo poni ndia ali bi̱ya nesi̱ Yesu abhi̱ menjo. Bhakpa bhabhu̱bi̱ki̱sa ndibha yabhalwali̱o kindia Yesu. 36Nibhakinkunga eti abhubhali̱sane ndibha yabhalwali̱o bhagbe ka gandula ndiaki, toli̱ ndibha bhagbabe bhoponi nibhakilama.
Արդեն Ընտրված.
Matayo 14: KWAMBA
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Wycliffe Bible Translators, Inc., 2025