मत्ती 7
7
फोकोकी दोष मालैडीनी
(लूका ६:३७-३८,४१-४२)
1येशूये फेरि डेया, “फोकोकी दोष मालैडीनी होटबाटै नाखुरीक र दोषी माठहरीस्ले।” 2हीजैडेनाङ नाखुरीकै कुटजाट्न अरुकी दोषी ठहरीले, होटजाट्न न नाखुरीक र दोषी ठहरीस्ले। नाखुरीकै अरुकी कुटजाट्न जाप्ले, होटजाट्न न नाखुरीककी र जाप्ले। 3“हीजै नाको अरु भर्मीयो मीमीकुङ कसिङ्गर चहिँ डाङ्ले, तर नाकुङ लहो मीमीकाङ लेच मुढा चहिँ हीजै थाहा माढीन्ले? 4लहो मीमीकुङ मुढा माडाङ्चये अरु भर्मीकी कुटजाट्न डेकी ह्योक्ले, ‘ङाकी नाकुङ मीमीकुङ कसिङ्गर डोन्की यान्ही?’ 5ए कपटीको! पहिला लहो मीमीकुङ मुढा डोन्नी, तब अरुओ मीमीकीङ कसिङ्गर डोन्की नाकै छ्याङ्गै डाङ्की ह्योक्ले।
6 “पवित्र कुरा चीउकोलाक माह्यानी, हीजैडेनाङ होचे ल्हेसार नाखुरीककी न झम्टडीस्ले। लहो मोतीको वाककुङ अगाडि माल्होनी, नभा च होखुरीकुङ मीकुये पीचीले।
ङेन्ही, पानी र ढ्वाक-ढ्वाक जाट्नी
(लूका ११:९-१३)
7 “ङेन्ही र नाखुरीककी याल्हे, पानी र नाखुरीकै डुप्ले, ढ्वाक-ढ्वाक जाट्नी र नाखुरीकुङ लागि गालाम फोले। 8हीजैडेनाङ सुये ङेल्हे होसकी याल्हे, सुये पाले, होचे डुप्ले, सुये ढ्वाक-ढ्वाक जाट्ले, होच्यो लागि गालाम फोले। 9ही नाखुरीक मध्याङ कुसे बोइ औला लहो लेन्जा मीजै रोटो ङेन्हाङ ल्हुङ याल्हे? 10की डीस्या ङेन्हाङ होसकी बुल याल्हे? 11होटबाटै नाखुरीक दुष्ट छानार च लहो मीजाकोलाक सेछ ठोकको याखी वार्ल्हे डेनाङ, झन् स्वर्गाङ लेच नाखुरीकुङ बोये कुडीक वास्टै जाट्न होसकोखाटा ङेछकोलाक मजुङ ठोकको याल्हे।
12 “भर्मीकै नाखुरीकखाटा कुङ्च व्यवहार जाट्ख्यो डेच नाखुरीक मीमन जाट्ले, नाखुरीकै र होखुरीकखाटा होङ्च न व्यवहार जाट्नी। हीजैडेनाङ मोशौ व्यवस्थाङ र अगमवक्ताकै याछ मुख्य शिक्षाको इसे न हो।
मार्जा गालाम र मार्जा लाम
(लूका १३:२४)
13 “मार्जा गालाम लकीङ भित्री पर्नी, हीजैडेनाङ बाड्को गालाम र फराकिलो लामै च नरकाङ टाहाक्ले र इसे लामीङ नुङ्चको च वास्टै छान्ने। 14तर मार्जा गालाम र अप्ठ्यारो लामै जीवनाङ टाहाक्ले। इसे लाम डुप्चको चहिँ थोरै छान्ने।
भर्मी होच्यो काम लकीङ न चीन्डीले
(लूका ६:४३-४६; १३:२५-२७)
15 “झूटा अगमवक्ताको लकीङ होशियार छान्नी। होखुरीक चहिँ भेडौ ल्याक्च न रुप लार राल्हे, तर भित्री चहिँ बीह्रीमसेच ब्वाँसाको ल्याक्च न छान्ने। 16नाखुरीकै होखुरीककी होखुरीकुङ काम लकीङ चीन्डीले। ही जुऔ म्यार्टुङाङ अङ्गुर स्याले र? न त सिउँडीयो म्यार्टुङाङ अञ्जीर न स्याले। 17होटजाट्न न पट्ट न सेछ म्यार्टुङै सेछ न मीस्या स्याटाक्ले। तर मासेछ म्यार्टुङै मासेछ न मीस्या स्याटाक्ले। 18सेछ म्यार्टुङै मासेछ मीस्या स्याटाक्की माह्योक्ले, न त मासेछ म्यार्टुङै सेछ मीस्या स्याटाक्की ह्योक्ले। 19सेछ मीस्या मास्याटाक्च पट्ट न म्यार्टुङको चेयार फुस्ले, होटै म्हेयाङ लोम्हकाले। 20होटजाट्न न होसे झूटो अगमवक्ताकोलाक होखुरीकुङ काम लकीङ न चीन्डीले।
21 “ङाकी ‘प्रभु, प्रभु’ डेच पट्ट न स्वर्गौ राज्याङ पर्की माडुप्ले। सुये स्वर्गाङ लेच ङौ बोयो इच्छा अनुसार काम जाट्ले होखुरीक मट्टै स्वर्गौ राज्याङ पर्की डुप्ले। 22न्यायौ दिनाङ ङाकी वास्टै जनै डेले, ‘प्रभु, ए प्रभु, ही कानै नाकुङ म्यार्मीनाङ अगमवाणी माङाका र? नाकुङ म्यार्मीनाङ भूतको माखेट्डीया र? कानै नाकुङ म्यार्मीनाङ वास्टै अचम्मौ कामको माजाटा र?’ 23अनि होडीक बेला ङा होखुरीककी डेले, ‘ए दुष्ट काम जाट्चको, ङा नाखुरीककी माचीन्डीले, ङा लकीङ नुङ्की क्योटो!’
नीस खाल्या जग
(लूका ६:४७-४९)
24 “होटबाटै सुये इसे ङौ वचन सेयार होसे अनुसार काम जाट्ले, होसे चहिँ काट बुद्धि लेच भर्मी ल्याक्च न हो, होचे लहो इम चट्टान मीटाक खासा। 25अनि नामास राहा, भल राहा, नाम्सु क्योसा र होसे इमाङ ठोका, तर होसे इम माफुटा। हीजैडेनाङ होसे इम चट्टान मीटाक खास्नन्या। 26तर सुये इसे ङौ वचन सेयार मामन्डीले, होसे चहिँ काट जना मूर्ख भर्मी ल्याक्च न हो, होचे लहो इम बालुवा मीटाक खासा। 27नामास राहा, भल राहा, नाम्सु क्योसा र होसे इमाङ ठोकार होसे इम फुटा।”
28येशूये इसे कुरा डेम भ्यारखीङ भर्मीकुङ भीड होसकुङ शिक्षा सेयार छक्क पर्या। 29हीजैडेनाङ होसकै होखुरीककी धर्मगुरुकै लेखा होइन तर अधिकार लेच भर्मीये लेखा न पाहाक्ङन्या।
Արդեն Ընտրված.
मत्ती 7: EMGP
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2025 by Mother Tongue Translators Society and Wycliffe Bible Translators, Inc.