ԴԱՏԱՎՈՐՆԵՐ 21
21
Բենիամինի ցեղի վերածնունդը
1Իսրայելի մարդիկ երդվեցին Մասեփայում և ասացին. «Մեզանից ոչ մեկն իր դստերը Բենիամինին կնության թող չտա»։ 2Ամբողջ ժողովուրդը եկավ Մասեփա և Բեթել, մինչև երեկո նրանք նստեցին այնտեղ՝ Աստծու առաջ, բարձրացրին իրենց ձայնը, սաստիկ լաց եղան 3և ասացին. «Տե՛ր, Աստվա՛ծ Իսրայելի, ինչո՞ւ այս բանը եղավ Իսրայելում, որ այսօր Իսրայելից մի ցեղ բնաջնջվեր»։ 4Հաջորդ օրը ժողովուրդը կանուխ վեր կացավ. այնտեղ զոհասեղան շինեցին և փրկության ողջակեզներ մատուցեցին։
5Իսրայելի որդիներն ասացին. «Իսրայելի բոլոր ցեղերից ո՞վ է, որ այս հավաքին Տիրոջ առաջ Մասեփա չի եկել»։ Արդարև, մեծ երդում էին տվել՝ ասելով. «Պիտի մեռնի՛ նա, ով չգա Մասեփա՝ հավաքի»։ 6Իսրայելի որդիները ցավեցին իրենց եղբայր Բենիամինի համար և ասացին. «Այսօր Իսրայելից մի ցեղ վերացավ։ 7Հիմա ի՞նչ անենք առանց կնոջ մնացածներին, քանի որ մենք երդվել ենք Տիրոջով, որ մեր աղջիկներից նրանց կնության չտանք»։ 8Եվ ասացին. «Իսրայելի ցեղերից ո՞վ է, որ Տիրոջ առաջ չի եկել Մասեփա»։ Պարզվեց, որ Գաղաադի երկրի Հաբիս բնակավայրից ոչ ոք չէր եկել բանակատեղի՝ հավաքին։ 9Եվ ժողովրդին հաշվառման ենթարկեցին։ Նրանց մեջ մարդ չկար Գաղաադի Հաբիս վայրի բնակիչներից։ 10Ժողովուրդն այնտեղ ուղարկեց տասներկու հազար զորավոր մարդիկ, նրանց պատվիրեցին և ասացին. «Գնացե՛ք և Գաղաադի Հաբիս բնակավայրի բնակիչներին՝ և՛ կանանց, և՛ մանուկներին կոտորե՛ք սրով։ 11Ահա թե ինչ պիտի անեք. բոլոր արուներին և արուի հետ անկողին մտած կանանց կոտորե՛ք»։ 12Եվ Գաղաադի երկրի Հաբիս բնակավայրի բնակիչների մեջ նրանք գտան չորս հարյուր կույս աղջիկ, որոնք տղամարդու հետ անկողնում չէին պառկել։ Նրանց բերեցին բանակատեղի՝ Սելով, որ Քանանի երկրում է։ 13Եվ ամբողջ ժողովուրդը մարդ ուղարկեց, որ խոսեն Բենիամինի որդիների հետ, որոնք Ռեմոնի քարայրում էին, և նրանց խաղաղության կոչեցին։ 14Այն ժամանակ Բենիամինը վերադարձավ Իսրայելի որդիների մոտ։ Եվ նրանց կնության տվեցին Գաղաադի Հաբիս բնակավայրի աղջիկներին, և դա նրանց հաճելի թվաց։ 15Ժողովուրդը ցավեց Բենիամինի ցեղի համար, որովհետև Տերն Իսրայելի ցեղերի մեջ ճեղք էր բաց արել։
16Ժողովրդի ծերերն ասացին. «Ի՞նչ անենք առանց կնոջ մնացած մյուսների համար, քանի որ Բենիամինի ցեղի կանայք բնաջնջվեցին»։ 17Եվ ասացին. «Բենիամինի ցեղի ժառանգությունը պետք է փրկել, թող Իսրայելից ցեղ չբնաջնջվի։ 18Բայց մենք չենք կարող մեր աղջիկներից նրանց կնության տալ, որովհետև մենք՝ Իսրայելի որդիներս, երդվելով ասացինք. “Անիծված լինի նա, ով Բենիամինին կին կտա”»։ 19Եվ ասացին. «Ամեն տարի Տիրոջ տոն է լինում Սելովում, որը Բեթելի հյուսիսում, Բեթելից Սյուքեմ տանող ճանապարհի արևելյան կողմում, Լիբանանից հարավ՝ Ելեբոնայում է գտնվում»։ 20Նրանք Բենիամինի որդիներին պատվիրեցին և ասացին. «Գնացե՛ք, դարա՛ն մտեք այգիներում։ 21Երբ տեսնեք, որ Սելովի աղջիկները պար բռնած դուրս են գալիս, ելե՛ք այգիներից և թող ամեն այր մի կին առևանգի Սելովի աղջիկներից, և գնացե՛ք Բենիամինի երկիրը։ 22Եթե նրանց հայրերը և եղբայրները գան ձեր դեմ բողոքելու, նրանց կասենք՝ “Ողորմե՛ք նրանց, որովհետև պատերազմի ժամանակ այդ մարդիկ իրենց համար կին չառան”. և քանի որ դո՛ւք չէ, որ աղջիկներին կնության տվեցիք նրանց, դա ձեզ համար մեղք չէ»։ 23Եվ Բենիամինի որդիներն այդպես արեցին. պարողներից իրենց թվի համեմատ առևանգելով՝ կանայք առան և գնացին։ Վերադարձան ամեն մեկն իր ժառանգությունը, քաղաքներ շինեցին և բնակվեցին դրանց մեջ։ 24Այն ժամանակ Իսրայելի որդիները գնացին ամեն մեկն իր ցեղի և ազգատոհմի մոտ, և ամեն մարդ գնաց իր ժառանգությունը։ 25Այն օրերին Իսրայելում թագավոր չկար, և ամեն մարդ անում էր այն, ինչ հաճելի էր իրեն։
Արդեն Ընտրված.
ԴԱՏԱՎՈՐՆԵՐ 21: ՆԷԱ
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Bible Society in Armenia © Հայաստանի Աստվածաշնչային Ընկերություն