ԴԱՏԱՎՈՐՆԵՐ 20
20
Իսրայելը պատրաստվում է պատերազմի
1Իսրայելի բոլոր որդիները ելան, և ժողովուրդը՝ Դանից մինչև Բերսաբեե և մինչև Գաղաադի երկիրը, մեկ մարդու պես հավաքվեց Տիրոջ առաջ՝ Մասեփայում։ 2Ամբողջ ժողովրդի իշխանները և Իսրայելի բոլոր ցեղերը՝ չորս հարյուր հազար սուսերակիր, ներկայացան Աստծու ժողովրդի հավաքին։ 3Բենիամինի որդիները լսեցին, որ Իսրայելի որդիները եկել են Մասեփա։ Իսրայելի որդիներն ասացին. «Ասե՛ք, թե որտե՞ղ կատարվեց այս չարագործությունը»։ 4Ղևտացի մարդը՝ սպանված կնոջ ամուսինը, պատասխան տվեց և ասաց. «Ես և իմ հարճը եկանք Բենիամինի երկրի Գաբաա վայրը, որ գիշերենք։ 5Գաբաայի տղամարդիկ ելան իմ դեմ, գիշերով շրջապատեցին տունը և ուզում էին ինձ սպանել։ Իմ հարճին լլկեցին, խեղդեցին, և նա մեռավ։ 6Ես էլ առա իմ հարճին, կտրատեցի նրան և ուղարկեցի Իսրայելի ժառանգության բոլոր սահմանները, որովհետև նրանք մեծ հանցանք և անզգամություն արեցին Իսրայելի մեջ։ 7Ահա մենք ամենքս Իսրայելի որդիներ ենք, մեզ խո՛սք ասեք ու խորհո՛ւրդ տվեք»։ 8Ամբողջ ժողովուրդը վեր կացավ մեկ մարդու նման և ասաց. «Մեզնից ոչ մի մարդ իր հարկի տակ չի մտնելու, և ոչ մի մարդ ճանապարհը չի թեքելու դեպի իր տուն։ 9Ահա թե ինչ պիտի անենք Գաբաային. նրա վրա պիտի գնանք վիճակահանությամբ ընտրված մարդկանցով։ 10Իսրայելի բոլոր ցեղերից վերցնենք հարյուրից տասը, հազարից հարյուր, տասը հազարից հազար մարդ, թող պաշար վերցնեն և կգնան Բենիամինի երկրի Գաբաայի դեմ, որ պատժեն նրան Իսրայելի մեջ նրա արած ամբողջ անզգամության համար»։ 11Եվ բոլոր իսրայելացիները մեկ մարդու նման քաղաքներից հավաքվեցին եկան։
12Իսրայելի ցեղերը Բենիամինի ցեղի մոտ մարդիկ ուղարկեցին և ասացին. «Այդ ի՞նչ չարագործություն է, որ եղավ ձեր մեջ։ 13Հիմա տվե՛ք Գաբաայի այդ ամբարիշտ մարդկանց՝ Բելիարի որդիներին, որ սպանենք նրանց և չարիքը վերացնենք Իսրայելից»։ Բայց Բենիամինի որդիները չկամեցան լսել իրենց եղբայրների՝ Իսրայելի որդիների ձայնը։ 14Եվ Բենիամինի որդիներն իրենց քաղաքներից հավաքվեցին Գաբաայի մեջ, որ Իսրայելի որդիների դեմ պատերազմի դուրս գան։ 15Այն օրն իրենց քաղաքներից եկած Բենիամինի որդիները քսանհինգ հազար սուսերակիր էին, չհաշված Գաբաայի բնակիչներին, որոնք յոթ հարյուր մարդ էին՝ ընտիր երիտասարդներ ամբողջ ժողովրդից՝ 16երկու ձեռքով էլ գործելու ընդունակ։ Նրանք բոլորն էլ պարսատիկավորներ էին, որ քարեր էին նետում և մազաչափ չէին վրիպում։ 17Իսկ Իսրայելի որդիները, բացի Բենիամինի ցեղի որդիներից, չորս հարյուր հազար սուսերակիրներ էին, բոլորն էլ պատերազմող մարդիկ։
Պատերազմ Բենիամինի դեմ
18Վեր կացան ելան Բեթել, և Իսրայելի որդիները հարցրին Աստծուն ու ասացին. «Բենիամինի որդիների հետ պատերազմելու համար ո՞վ պիտի լինի մեր առաջնորդը»։ Տերն ասաց. «Հուդան թող լինի առաջնորդը»։ 19Եվ Իսրայելի որդիներն առավոտյան վեր կացան, բանակեցին Գաբաայի մոտ։ 20Իսրայելի մարդիկ ելան Բենիամինի դեմ պատերազմելու և Գաբաայի մոտ նրանց դեմ պատերազմելու համար ճակատ կազմեցին։ 21Բենիամինի որդիները դուրս եկան քաղաքից, և այն օրը Իսրայելից քսաներկու հազար մարդ սպանեցին և գետնին փռեցին։ 22Բայց Իսրայելի մարդիկ դարձյալ զորացան և նորից ճակատ կազմեցին՝ պատերազմելու համար այն տեղում, որտեղ ճակատել էին առաջին օրը։ 23Իսրայելի որդիները վեր կացան և մինչև երեկո լաց եղան Տիրոջ առաջ և Տիրոջը հարցրին ու ասացին. «Շարունակե՞նք պատերազմել մեր եղբոր՝ Բենիամինի դեմ»։ Տերն ասաց. «Դո՛ւրս եկեք նրանց վրա»։ 24Երկրորդ օրն Իսրայելի որդիները պատերազմի ելան Բենիամինի որդիների դեմ։ 25Բենիամինն էլ երկրորդ օրը ելավ նրանց դեմ պատերազմելու և ժողովրդից նորից ութ հազար մարդ սպանեց և գետնին փռեց։ Նրանք բոլորն էլ սուսերակիրներ էին։
26Իսրայելի բոլոր որդիները, ամբողջ ժողովուրդը վեր կացան-եկան Բեթել, նստեցին, լաց եղան Տիրոջ առաջ, ծոմ պահեցին այդ օրը և փրկության ողջակեզներ մատուցեցին Տիրոջ առաջ։ 27Որովհետև այդ օրերին այնտեղ էր Տիրոջ՝ Աստծու Ուխտի տապանակը։ 28Նրա առաջ այդ օրերին Ահարոնի որդի Եղիազարի որդի Փենեեսն էր կանգնում։ Իսրայելի որդիները հարցրին Տիրոջը և ասացին. «Նորից մեր եղբայր Բենիամինի որդիների դեմ պատերազմելու դուրս գա՞նք, թե՞ դադարեցնենք»։ Տերն ասաց. «Դո՛ւրս եկեք, վաղը նրանց կմատնեմ ձեր ձեռքը»։
29Իսրայելի որդիները դարանակալներ դրեցին Գաբաայի շուրջը։ 30Երրորդ օրն Իսրայելի որդիները դուրս եկան Բենիամինի դեմ, ճակատ կազմեցին Գաբաայի մոտ, ինչպես նախորդ անգամները։ 31Բենիամինի որդիները դուրս եկան ժողովրդի դեմ, հեռացան այդ քաղաքից և սկսեցին նախորդ անգամների պես ժողովրդին ջարդել այն ճանապարհների վրա, որոնցից մեկը դուրս էր գալիս Բեթել, իսկ մյուսը՝ Գաբաա։ Նրանք այդ դաշտում Իսրայելից մոտ երեսուն մարդ կոտորեցին։ 32Բենիամինի որդիներն ասացին. «Սրանք մեր առաջ կոտորվելու են, ինչպես նախորդ անգամ»։ Իսկ Իսրայելի որդիներն ասացին. «Փախչենք և հեռացնենք նրանց քաղաքից ու ճանապարհից»։ 33Եվ Իսրայելի բոլոր որդիները վեր կացան իրենց տեղից և վերադասավորվեցին Բաալթամարում։ Իսրայելի դարանակալները կռվում էին իրենց տեղից՝ Գաբաայի արևմտյան կողմից։ 34Ամբողջ Իսրայելից տասը հազար ընտիր մարդիկ հավաքվեցին Գաբաայի դիմաց։ Պատերազմը սաստկացավ, բայց Բենիամինի որդիները չգիտեին, որ իրենց վրա չարիք է հասել։ 35Տերը Բենիամինի ցեղին հարվածեց Իսրայելի որդիների առաջ, և Իսրայելի որդիներն այդ օրը Բենիամինի ցեղից քսանհինգ հազար հարյուր մարդ կոտորեցին։ Նրանք բոլորն էլ սուսերակիրներ էին։
36Բենիամինի որդիները տեսան, որ պարտության են մատնված։ Իսրայելացիները նահանջեցին, որովհետև հույսները դրել էին Գաբաայի շրջակայքում եղած դարանամուտների վրա։ 37Դարանամուտները հարձակվեցին և թափվեցին Գաբաայի վրա, մտան և ամբողջ քաղաքը սրի քաշեցին։ 38Իսրայելի մարդիկ պայմանավորվել էին դարանակալների հետ, որ կրակ վառեն և ծուխ հանեն քաղաքի վրա։ 39Այդ ազդանշանի վրա Իսրայելի մարդիկ պետք է հետ քաշվեին պատերազմից։ Բենիամինի ցեղի մարդիկ սկսեցին ջարդել Իսրայելի դարանակալներին, մոտ երեսուն վիրավոր մարդու կոտորեցին և ասացին, թե՝ «Կոտորվում են մեր առաջ այսօր, ինչպես նախորդ պատերազմում»։ 40Կրակե ազդանշանը ծավալվելով բարձրացավ քաղաքի վրա, ինչպես ծխի սյուն։ Բենիամինի մարդիկ հետ նայեցին և տեսան, որ քաղաքի հրդեհի բոցերը երկինք են բարձրանում։ 41Իսրայելի այրերը նորից հետ դարձան. Բենիամինի մարդիկ տագնապեցին, որովհետև տեսան, որ չարիքը հասել է իրենց վրա։ 42Նրանք Իսրայելի մարդկանցից փախան անապատի ճանապարհով, բայց պատերազմողները հասան նրանց, և քաղաքից դուրս եկող իսրայելացիներն սպանում էին նրանց՝ իրենց մեջ առնելով։ 43Բենիամինի մարդկանց նրանք ջարդեցին և հետապնդեցին Նուից մինչև Գաբաայի դիմացը՝ արևելյան կողմից։ 44Բենիամինից տասնութ հազար մարդ ընկավ. նրանք բոլորն էլ զորավոր մարդիկ էին։ 45Մնացածները, տեսնելով այդ, փախան դեպի անապատ՝ ապավինելով Ռեմոնի քարայրին։ Ճանապարհին Բենիամինից հինգ հազար մարդ կոտորեցին, հետապնդեցին նրանց մինչև Գաղաադ և նրանցից երկու հազար մարդ էլ կոտորեցին։ 46Այն օրը Բենիամինի ցեղից ընկածները քսանհինգ հազար հարյուր սուսերակիրներ էին, բոլորն էլ զորավոր մարդիկ։ 47Մնացածները՝ վեց հարյուր մարդ, խույս տալով փախան անապատ՝ ապավինելով Ռեմոնի քարայրին, և Ռեմոնի քարայրում մնացին չորս ամիս։ 48Իսկ Իսրայելի մարդիկ հետ դառնալով հարձակվեցին Բենիամինի որդիների վրա։ Նրանց հերթով սրի քաշեցին, մինչև իսկ անասուններին և ամեն բան, որ գտան յուրաքանչյուր քաղաքում։ Իսկ կոտորածից զերծ մնացած քաղաքները մարդիկ ուղարկեցին և այրեցին հրով։
Արդեն Ընտրված.
ԴԱՏԱՎՈՐՆԵՐ 20: ՆԷԱ
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Bible Society in Armenia © Հայաստանի Աստվածաշնչային Ընկերություն