Népszerű bibliai igeversek innen: Mathiu 6

Megosztás

Kɛrɛ mɔtha nu thɛns rȧbȧy ra Kuru, dɛ yi mȧlompi mɔŋ, ɔwa ɔ tǝ bȧrȧ nu ɛyɛt ɛye bɛ.

Tiyȧŋ te nu ba asoli ta ninaŋ, ȧtesoma-e rasɔk ra ninaŋ rǝ tǝ ba aŋsoli ŋati. Mȧlǝs ma ȧŋrey mǝ beki ta ȧŋrey ŋati.

Tiyȧŋ i kanɛ nu, te nu ba asoli ta ɛŋesǝm ɛ nu, ta ara mǝ nǝ di-e, thalɔm ta ara mǝ nǝ mun-e, ta a pa ras ta aŋdɛr a nu ta ara mǝ nǝ wɔŋ. Aŋesǝm aŋ thas hɛ yɛt ɛdi-i, ɔwa aŋdɛr aŋ thas hɛ ɛloprȧ-i?

Kɛrɛ munɔŋ, bepi mǝ ramnɛ-e, wɔŋ ka ȧŋkonko a mu, ɔwa ma mǝ po kantha kadare ka mu-e, ramnɛ ka ɔKas ka mu ɔwe yi rǝ ɔmaŋknɛ, ɔwa ɔKas ka mu ɔwe nənk rǝ ɔmaŋknɛ ɔ tǝ ram mu gbafǝth.

Tiyȧŋ ramnɛ nu yaŋ; ƆKas kȧsu ɔwe yi ro riyana, kanka ȧŋes a mu aŋ yi ȧsǝm. Kaŋkɔ rȧbȧy ra mu rǝ bek. Kaŋkɔ mȧselɔ ma mu mǝ yɔnɛ nɔru mɔ mǝ mǝ yɔnɛ ro riyana.

Yer su thonɔŋ ɛyɛt ɛdi ɛbeki su.

Tera su mȧtȧy ma su mǝlǝs, mɔ saŋ mǝ sǝ tera ŋaŋ aŋa yɔ su ɔlǝs.

Te su wɔŋȧ rǝ tȧy tǝgbɔns kɛrɛ wurɔ su ka mətȧy mǝlǝs; ȧtesoma-e munɔ ba rȧbȧy yi aŋfɔsɔ yi aŋyiki thȧnkȧŋ thǝbana, Amina.

kotȧy-e, bepi nǝ tera afǝm mȧtȧy maŋ mǝlǝs-e, ɔKas ka nu ro riyana ɔ tǝ tera nu sɔ

Kǝli ɛbȧmp rokɔm-a, aŋ sak hɛ, aŋ rɔk hɛ, aŋ thonkla hɛ rǝ tǝfunk: kɛrɛ ɔKas ka nu ro riyana ɔ wɔnthǝr ŋa. Naŋ-e, nǝ thas hɛ ŋa mȧrǝŋ mȧrǝŋ-i?

Te nu thoŋklanɛ tɛŋ ka ȧdȧru ro amɔrka yi magbak mȧ mǝ sɔm ti, dɛ yi akey mǝ aŋ bɛs tǝ kǝkeya. Thoŋklanɛ nu gbo tɛŋ ro riyana, ro amɔrka yi mǝgbak mǝ gbǝli hɛ sɔm ti, ɔwa ro akey aŋ te bɛs, aŋ keya. Ȧtesoma-e ro atɛŋ ta nu tǝ yi-e, rǝ ɛmerȧ ɛ nu ɛ tǝ yi sɔ.

Wuni o wuni ɔ gbǝli hɛ bȧtho amarki ŋarǝŋ, kotȧy-e ɔ tǝ gbɛŋa ɔkin ɔwa ɔ tǝ bɔthǝr ɔlɔm; thalɔm ɔ tǝ gbapsa ɔkin, ɔwa ɔ tǝ sai ɔlɔm. Nǝ gbǝli hɛ bȧtho Kuru dɛ yi mǝbɔŋɔ.

Ɔwa bepi Kuruȧŋ ɔ lonsǝr akereŋ ka ro lal yaŋ-e, ȧke yi thonɔŋ, ɔwa ninaŋ a fitha ki rǝ nȧnt nǝbana; thamsinɛ naŋ-e, nia afǝm ŋa kǝlanɛ kǝthan.

Kɛrɛ ma mǝ mǝ sɔŋ ɛboya-e, te selɔ kȧta ka mu kǝmɛrɔ kǝ tȧrȧ ȧte kȧta ka mu kǝdiyɔ kǝ yɔ; kȧmȧ ɛboya ɛ nu ɛ yi rǝ agbundu, ɔwa ɔKas ka nu ɔwe nənk rǝ agbundu ɔ tǝ ram nu gbafǝth.

Botnɛ nu kȧmȧ nǝ te yɔ mȧlompi ma nu rodi ka aŋfǝm kȧmȧ aŋ nənk nu. Bepi pǝ yi yaŋ-e, nǝ sɔthɔ hɛ ȧrȧm kǝwur ka ɔKas ka nu ɔwe yi ro riyana.

Ɔwa ma pǝ thas ri-e, bepi nǝ wop asum-e, te nu suma mɔ aŋyɔr; kotȧy-e aŋ lǝsǝr aser taŋ kȧmȧ aŋfǝm aŋ nənk kǝpa aŋ wop asum. Tǝ tɛntɛnɛ i kanɛ nu kǝpa aŋ po sɔthɔ ȧŋrȧm ŋaŋ. Kɛrɛ munɔŋ, bepi mǝ wop asum, sop rȧbomp ra mu yi mȧro, ɔwa yak ȧder a mu, kȧmȧ afǝm aŋ te nənk kǝpa mǝ wop asum-e, kɛrɛ ɔKas ka mu ɔwe yi rǝ ɔmaŋknɛ. Ɔwa ɔKas ka mu ɔwe nənk rǝ agbundu ɔ tǝ ram mu.