Matta 9
9
Al-Masiih khafar le l-mukarsah
1Wa khalaas, Isa rikib fi l-markaba wa gataʼ al-bahar wa gabbal fi hillitah Kafar Naahuum. 2Wa naas waahidiin jaabo leyah raajil mukarsah raagid fi furaachah. Wa Isa chaaf iimaanhum wa gaal le l-raajil al-mukarsah : «Ya wileedi, chidd heelak ! Zunuubak ankhafaro.»
3Wa waahidiin min al-ulama gaalo fi guluubhum : «Kalaam al-naadum da kalaam kufur !» 4Wa Isa irif fikirhum. Wa saʼalaahum wa gaal : «Maala tuguulu cheyy fasil fi guluubku ? 5Weenu al-hayyin nuguulah min al-kalaam al-itneen dool ? Nuguul : ‹Zunuubak ankhafaro› walla nuguul : ‹Gumm wa ruukh› ? 6Ana nidoor intu taʼarfu kadar ana Ibn al-Insaan indi sulta fi l-ard achaan nakhfir le l-naas zunuubhum.» Wa khalaas gaal le l-mukarsah : «Gumm, chiil furaachak wa amchi beetak !»
7Wa khalaas al-naadum gamma wa macha beetah. 8Wakit al-naas chaafooh, khaafo bilheen wa chakaro Allah achaan hu anta sulta misil di le l-naas.
Al-Masiih naada Matta
9Wa fi ruwaakhtah Isa chaaf naadum waahid usmah Matta gaaʼid yakhdim fi maktab al-daraayib. Wa Isa gaal leyah : «Taʼaal taabiʼni.» Wa khalaas gamma foog wa taabaʼah.
10Wa Isa alʼachcha fi beet Matta wa naas katiiriin jo min naas al-yichiilu miiri wa muznibiin aakhariin. Wa jo gaʼado maʼa Isa wa talaamiizah. 11Wa waahidiin min al-Fariiziyiin chaafoohum wa saʼalo talaamiizah wa gaalo : «Maala sayyidku yaakul maʼa naas al-daraayib wa l-muznibiin ?»
12Wa Isa simiʼ kalaamhum wa gaal : «Al-naas al-taybiin ma hawjaaniin daktoor, illa l-mardaaniin bas. 13Amchu agru wa afhamo kalaam Allah al-buguul : <Nidoor al-rahma ziyaada min al-dahaaya.>#9:13 Al-kalaam da talgooh fi Huuchaʼ 6:6, hasab al-tarjama al-yuunaaniiye. Ana ma jiit achaan ninaadi al-saalihiin laakin jiit le ninaadi al-muznibiin le l-tooba.»
Al-Masiih saʼalooh fi l-siyaam
14Wa khalaas waahidiin min talaamiiz Yahya jo le Isa wa saʼalooh wa gaalo : «Aniina wa l-Fariiziyiin nusuumu daayman. Maala talaamiizak ma yusuumu ?» 15Wa Isa radda leehum wa gaal : «Kan naas gaaʼidiin fi iris wa l-ariis maʼaahum, yahzano walla ? Wa laakin yaji yoom waahid al-ariis yichiiluuh minhum wa khalaas fi l-wakit daak, yusuumu.
16«Ma fi naadum al-yargaʼ khalag gadiim be gitʼe jadiide achaan al-rugʼa al-jadiide di ticharrit al-khalag al-gadiim wa l-gadd yabga ziyaada min awwal. 17Wa l-naas ma yusubbu khamar jadiid fi girbe gadiime achaan kan sawwo misil da, al-girbe tinchagga. Wa misil da, al-khamar yidaffig wa l-girbe tatlaf. Wa laakin yusubbu al-khamar al-jadiid fi girbe jadiide wa misil da yahfado al-khamar maʼa l-girbe sawa.»
Isa anta al-haya wa l-aafe
18Wa wakit Isa gaaʼid yihajji fi l-kalaam da, naadum waahid masʼuul ja wa sajad giddaamah wa gaal : «Bineeyti dahaabha maatat wa laakin taʼaal almasha be iidak wa hi tahya.» 19Wa Isa gamma wa macha maʼaayah wa talaamiizah kula macho maʼaayah sawa.
20Wa mara waahide garrabat le Isa min wara wa hi taʼbaane. Dammaha yidaffig min 12 sana. Wa jaat limsat taraf khalagah 21wa gaalat fi galibha : «Kan nalmas khalagah nalga al-aafe.» 22Wa Isa anlafat wa chaafha wa gaal : «Ya bineeyti, chiddi heelki. Iimaanki beyi najjaaki». Wa khalaas min al-wakit da bas, hi ligat al-aafe.
23Wa Isa dakhal fi beet al-masʼuul wa chaaf darraabiin al-suffaara hana l-moot wa naas gaaʼidiin yabku katiir. 24Wa Isa gaal leehum : «Yalla amchu. Al-bineeye ma maatat. Hi naayme bas». Wa dihko leyah be chamaate. 25Wa wakit kulla l-naas marago, Isa dakhal fi lubb al-beet wa karab iid al-bineeye wa hi gammat. 26Wa l-khabar da ansamaʼ fi kulla l-balad di.
Al-amyaaniin wa l-naadum al-abkam
27Wa Isa maachi giddaam wa amyaaniin itneen taabaʼooh. Wa gaaʼidiin yasrakho wa yuguulu : «Ya Ibn Dawuud ! Arhamna !» 28Wa wakit Isa dakhal fi l-beet, humman jo leyah wa hu saʼalaahum wa gaal : «Sahiih intu tiʼaamunu kadar indi gudra nidaawiiku walla ?» Wa raddo leyah wa gaalo : «Aywa sayyidna.» 29Wa Isa limis uyuunhum wa gaal : «Khalli yabga leeku misil aamantu beyah.» 30Wa khalaas, uyuunhum anfataho wa chaafo. Wa Isa amaraahum wa gaal : «Angarʼu ! Ma tiʼooru beyah naadum waahid.» 31Wa laakin macho wa chattato al-khabar da wa usmah talaʼ fi kulla l-balad di.
32Wa wakit al-rujaal dool maargiin min al-beet, naas waahidiin jaabo naadum abkam wa muchootin. 33Wa Isa tarad al-cheetaan wa l-abkam gamma yihajji. Wa l-naas alʼajjabo bilheen wa gaalo : «Cheyy ajiib misil da abadan ma chifna fi daar Israaʼiil !» 34Wa laakin al-Fariiziyiin gaalo : «Al-naadum da yatrud al-chawaatiin be gudrat kabiir al-chawaatiin.»
Al-khaddaamiin chiyya
35Isa gaaʼid yuruukh fi kulla l-mudun wa fi kulla l-hillaal wa yiʼallim al-naas fi buyuut al-sala wa yibachchirhum be bichaarat mamlakat Allah. Wa yachfiihum min ayyi wajaʼ wa ayyi marad. 36Wa Isa chaaf naas katiiriin marra waahid jaayiin leyah wa hanna fooghum achaan humman taʼbaaniin wa ayyaaniin misil khanam al-ma induhum raaʼi. 37Wa gaal le talaamiizah : «Al-naas dool misil zereʼ kabiir wa khallitah nijdat khalaas. Wa laakin al-naas al-yakhdumu chiyya. 38Achaan da, atulbu min siid al-zereʼ hu yirassil khaddaamiinah yilimmu khallitah.»
Sélection en cours:
Matta 9: ADT19
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Arabe tchadien (alphabet latin) Bible © Alliance Biblique du Tchad, 2019.