Matta 10
10
Al-Masiih rassal rusulah
1Wa Isa naada talaamiizah al-atnaachar wa antaahum sulta achaan yaturdu al-chawaatiin wa yachfu ayyi naadum al-indah ayyi marad. 2Wa asaame al-rujaal al-atnaachar al-jaʼalaahum rusul. Humman awwal Simʼaan al-binaaduuh Butrus wa akhuuh Andareeyas, wa Yaakhuub wileed Zabadi wa akhuuh Yuuhanna, 3wa Filibbus wa Bartulma, wa Tuuma wa Matta al-yichiil al-miiri, wa Yaakhuub wileed Halfa wa Taddaaya, 4wa Simʼaan al-Sawri wa Yahuuza al-Iskhariyooti al-baʼadeen yukhuun Isa.
5Dool humman al-rusul al-atnaachar. Wa Isa rassalaahum fi ust al-naas. Wa amaraahum wa gaal : «Ma tamchu le l-naas al-ma Yahuud wa ma tadkhulu fi ayyi hille hana l-Saamiriyiin. 6Amchu illa fi ust al-khanam al-muwaddiriin hana Bani Israaʼiil. 7Wa wakit intu maachiin fi l-derib, ballukhu al-bichaara guulu : ‹Mamlakat Allah garrabat !› 8Al-mardaaniin daawuuhum wa l-maytiin gawwumuuhum wa l-induhum jidaam antuuhum al-aafe wa l-chawaatiin aturduuhum min al-naas. Intu ligiitu bala tukfa wa khalaas, antu le l-naas bala tukfa. 9Ma tichiilu maʼaaku dahab wa la fudda wa la sile fi juzlaanku. 10Wa ma tichiilu wa la mukhla wa la khulgaan hana khiyaar wa la naʼaal wa la asa. Achaan al-khaddaam laggaam.
11«Wa ayyi madiina aw hille tadkhulu foogha, fattuchu fiiha naadum ijwaadi wa dallu fi beetah lahaddi tamchu min al-bakaan da. 12Wa wakit intu tadkhulu fi l-beet, asʼalo salaam Allah foogah. 13Wa kan naas al-beet ijwaadiyiin, khalli salaamku yagood fooghum. Wa kan naas al-beet ma ijwaadiyiin, khalli salaamku yigabbil leeku. 14Wa kan naas hana ayyi beet walla ayyi hille ma yakhbalooku wa yaabo kalaamku, amurgu minnah wa hittu al-ajaaj min rijleeku. 15Nuguul leeku al-hagg, fi yoom al-Hisaab, al-azaab al-yanzil foog naas al-bakaan da yabga ziyaada min al-azaab al-nazal foog naas hillaal Saduum wa Amuura.#10:15 Saduum wa Amuura Al-taariikh da talgooh fi Takwiin 19:24-25.
Taʼab al-talaamiiz fi l-dunya
16«Asmaʼo ! Nirassilku fi ust al-naas wa tabgo misil khanam fi ust al-maraafʼiin. Achaan da, waajib tabgo hadiiriin misil al-daabi wa bariyiin misil al-hamaama. 17Awʼu baalku min al-naas, achaan yiwadduuku le l-chariiʼa wa yajluduuku fi buyuut al-sala. 18Wa yiwadduuku giddaam al-hukkaam wa l-muluuk achaan intu naasi. Wa fi l-bakaan da, tachhado leyi giddaam al-naas al-induhum diin wa giddaam al-naas al-ma induhum diin. 19Wa wakit yakurbuuku wa yiwadduuku le l-chariiʼa, ma tihimmu le l-kalaam al-tuguuluuh walla kikkeef tihajju. Achaan fi l-wakit da, Allah yantiiku al-kalaam al-tuguuluuh. 20Al-kalaam ma yaji minku intu wa laakin yaji min Ruuh abuuku Allah. Wa hu yihajji be khuchuumku.
21«Wa fi l-wakit al-jaayi da, naadum waahid yisallim akhuuh le l-moot wa abu iyaal yisallim wileedah le l-moot wa l-iyaal yabgo aasiyiin le waaldeenhum wa yisabbubu leehum al-moot. 22Wa fi chaan usmi kulla l-naas yakrahooku. Wa laakin al-naadum al-yagood saabit lahaddi kumaalit kulla cheyy, hu yanja. 23Wa wakit yitaʼʼubuuku fi hille waahide, ajru fi hille aakhara. Nuguul leeku al-hagg, ma tagdaro tikammulu amalku fi hillaal Israaʼiil gubbaal Ibn al-Insaan ma yaji».
Ma takhaafo min al-naas
24Wa Isa gaal battaan : «Al-tilmiiz ma akbar min sayyidah wa l-abid ma akbar min siidah. 25Wa l-tilmiiz radyaan kan yabga misil sayyidah wa l-abid radyaan kan yabga misil siidah. Wa kan yuguulu siid al-beet : ‹Hu Ibliis›, akiid yuguulu nafs al-cheyy ziyaada fi naas beetah. 26Ma takhaafo minhum. Achaan ma fi cheyy mukhatta al-baʼadeen ma yinkachif wa ma fi sirr al-ma yinʼarif. 27Ayyi cheyy al-nuguulah leeku fi l-leel, guuluuh fi l-nahaar. Wa l-kalaam al-kallamtah leeku be bicheech fi adaanku, ballukhuuh barra fi l-chawaariʼ.
28«Ma takhaafo min al-naas. Yagdaro yaktulu jisim al-naadum wa laakin ma yagdaro yaktulu ruuhah. Akhaafo min Allah achaan hu yagdar yahlik al-jisim wa l-ruuh sawa fi Jahannam. 29Taʼarfu kadar yibiiʼu tuyuur itneen be riyaal waahid. Wa be da kula, kan waahid minhum yagaʼ fi l-turaab, abuuku Allah yaʼarfah. 30Wa laakin intu, Allah gaaʼid yifakkir fiiku ziyaada lahaddi yaʼarif adad al-suuf al-fi raasku ! 31Khalaas, ma takhaafo. Ayyi naadum minku muhimm ziyaada le Allah min tuyuur katiiriin.
32«Wa ayyi naadum al-yachhad leyi giddaam al-naas, ana kula nachhad leyah giddaam abuuyi Allah. 33Wa ayyi naadum al-yankurni giddaam al-naas, ana kula nankurah giddaam abuuyi Allah.
Taʼab al-muʼminiin
34«Ma tahsubu ana jiit achaan nijiib al-salaam fi l-ard. Ma jibt al-salaam laakin jibt al-seef. 35Ana jiit achaan nikhaalif al-wileed maʼa abuuh wa l-bineeye maʼa ammaha wa l-mara maʼa nasiibitha. 36Wa be misil da, naas beetah yabgo aduuh le l-naadum.
37«Ayyi naadum al-yihibb abuuh walla ammah ziyaada minni, ma waajib leyah yabga tilmiizi. Wa ayyi naadum al-yihibb wileedah walla bineeytah ziyaada minni ma waajib leyah yabga tilmiizi. 38Wa ayyi naadum al-aba ma yichiil taʼab al-saliib#10:38 al-saliib Fi l-zaman daak, al-Roomaaniyiin katalo al-mujrimiin fi saliib giddaam al-naas achaan yiʼayyubuuhum be ziyaada. Al-Masiih gaaʼid yuguul ayyi naadum al-yidoor yitaabiʼah waajib yaʼarif al-naas yitaʼʼubuuh. wa ma yitaabiʼni le l-moot, ma waajib leyah yabga tilmiizi. 39Ayyi naadum al-yidoor yinajji nafsah, yiwaddirha. Laakin al-naadum al-yiwaddir nafsah fi chaani ana, hu da yanja.
40«Wa ayyi naadum al-khibilaaku khibilaani. Wa l-naadum al-khibilaani khibil Allah al-rassalaani. 41Wa ayyi naadum al-yakhbal nabi fi beetah achaan hu nabi, yalga ajur hana nabi. Wa ayyi naadum al-yakhbal raajil saalih achaan hu raajil saalih, yalga ajur hana raajil saalih. 42Wa ayyi naadum al-yanti le naadum min naasi al-sukhaar dool chokhol sakhayyar misil kaas hana almi baarid achaan hu tilmiizi, nuguul leeku al-hagg, ajrah ma yiwaddir abadan.»
Sélection en cours:
Matta 10: ADT19
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Arabe tchadien (alphabet latin) Bible © Alliance Biblique du Tchad, 2019.