1 Yohan 5
5
Yesu sv̀ng kv́m gǿ nø Gvray àngcè í we
1Yesu nø Kristu íe, wa kv́m gǿ nø, Gvray àngcè íe. Àngpè kaq shóngshì gǿ nø, àngcèrì kaq gø shóngshìe. #1Yh. 4:15-16; 1Pt. 1:23 2Gvray kaq shóngshàì nø̀ Àng dvkv́m kàrì sv̀ng cà:nì yv́ngkèní, nøngmaq nø Gvray àngcèrì sv̀ng shóngshàì we sháìe. 3-4Gvray dvkv́mkàrì sv̀ng cà:nì lòng nø Àng sv̀ng shóngshàì we shvkse íe. #Mat. 11:30; Yoh. 14:15,23-24; 16:33 Gvray àngcè kagǿ gø rvgaqtø̀m dvløtlv́m rì sv̀ng jór lúnshì rvtnø̀, Àng dvkv́mkàrì nø cv́n rvzaq we mø̀í. Jòrlv́m yalòng nø nøngmaq kv́mnøt kèní íe. 5Rvgaq sv̀ng jòr gǿ nø kagǿ íe? Yesu nø Gvray Àngcèpè íe wa nø̀ kv́m gǿ wa íe.#1Yh. 4:4
6Tì nvng shvwi taq kení dì daqì pè nø Yesu Kristu íe. Àng nø tì taqkèní wa dì daqì we mø̀í, tì nvng shvwi taq kèní dì daqì. 7Yadang shvkse wàò gǿ nø Pvlàcè íe. Pàwá wani Pvlàcè nø dìng lòng íe. Kadø íe wani yadang shvkse nø vshø̀m pà:ní wàòe. 8Werì nø Shànshér Pvlàcè, tì nv̀ng shvwi íe. Ya vshø̀mpv̀n shvksekà nø vráe. 9Nøngmaqí nø vsv̀ng shvksekà sv̀ng dv́ng vtoìe. Íwe Gvrayò shvksekà nø Àngcèpè dang í rvt, té kv́mv́m vrvme. #Yoh. 5:32; 8:18 10Gvray Àngcèpè sv̀ng kv́m gǿí nø àng nøt vdòng taq shvksekà yalòng vtoòe. Gvrayí Àngcèpè dang shvkse wà daqà kà sv̀ng mvkv́m gǿí nø Gvray kaq vyá dvdu:tnòe. 11Gvrayí nøngmaq sv̀ng dvciqlvpat gø̀nshaq èzí bǿshà nø̀ gø̀nshaq yalòng nø Àngcèpè vdòng taq vle, wa kà nø Gvrayò shvksekà íe. 12Gvray Àngcèpè lú:nò gǿí nø gø̀nshaq lú:noe. Gvray Àngcèpè mvlú:nò gǿí nø gø̀nshaq mvlú:nò.#Yoh. 3:36
Yesu bø̀ng taqkèní røt vsv̀ng lún we
13Gvray Àngcèpè sv̀ng èkv́mnø̀ng rì nàmaq nø dvciqlvpat gø̀nshaq èlún bǿshà we sháshìlv́m dvpvt, ngàí kàru yagø̀m vrongò we íe. #Yoh. 20:31 14Gvray nøt nv̀ng vbóng dø pà røtshàì nìgø, À:ngí ètáaìe. Wervt Àng mv́rdv̀ngø nøngmaq nvrø̀m dvtéshìlv́m vle. #Yoh. 16:23; 1Yh. 3:21-22 15Vrá, kapà røtshàì nìgø, À:ngí ètáaì we sv̀ng nøngmaqí sháì rvt, Àng sv̀ng røt bǿshàrì lún bǿshà we gø sháìe.
16Àngnvm àngchvng tiqgǿí pvlàcè shìlv́m høq màrvnaq we mvrà wàò we la èshánø̀ng nìnø, àng dvpvt jú èrøtnanø̀ng. Wekvt wegǿ sv̀ng Gvrayí gø̀nshaq zí daqòe. Pvlàcè shìlv́m høq rvnaq we mvrà gø tiqpv̀n vle. Wepv̀n mvrà wàò rì dvpvt jú èrøtnanø̀ng, ngà mvwvng. #Mat. 12:31; Heb. 6:4-6 17Mvgvm màshvla bv̀nlì í dv́ngte nø mvrà íe. Ínìgø pvlàcè shìlv́m høq màrvnaq we mvrà gø vle.
Lv̀ngdø̀m kà
18Gvray àngcèrì kagǿ ínìgø mvrà wá mvmvnshì we sv̀ng sháìe. Kadø íe wani àng kaq Gvray Àngcèpèí ga:rò rvtnø̀, Sataní dvlá mvlú:nò. #Yoh. 17:15; 1Yh. 3:9 19Sataní rvgaqtø̀m vsv̀ng shvngbe kaq ø:pmò we ínìgø, nøngmaq nø Gvrayò íshàe, wa sháshàìe. 20Vrá, Gvray Àngcèpè tuq daqì nø cíngrálnøt èzí daqshà rvt, Gvray jǿng sv̀ng shá bǿshà. Nøngmaq nø Àngcèpè Yesu Kristu nv̀ng vzø̀:mì rvtnø̀, Gvray jǿng nv̀ng vzø̀:mì we íe. Àng nø Gvray jǿng í nø̀ dvciqlvpat gø̀nshaq íe. #Yoh. 17:3
21Ngàcèrìé, pvràhangrì kèní èsarshìnø̀ng. #1Kr. 10:14
Sélection en cours:
1 Yohan 5: GSM
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2025 Rvcv́ngcè Kàru Gomidi Kristu Shvngø̀mré. All Rights Reserved.