Эвел 49
49
Якьубди чан баяриз ужʼвал ккун апӀуб
1Якьубди чан баяриз дих гъапӀу:
– ИлтӀикӀай узлан, учвуз фу шулуш, узу учвуз пидизачвуз.
2Якьубдин баяр, багахь йихьай!
Израилихъ, ичв адашдихъ, хъебехъай!
3Рувим – уву йиз сарпир, йиз кьувват,
йиз жилирвалин гужнан сабпи бегьер,
заанвалииндира сарпир, кьувватнииндира сарпир вува!
4Селси мютӀюгъ апӀуз даршлур,
сарун хьидарва уву сарпир,
яв адашдин аьхниъ дахъур,
йиз дахъру йишв кабцӀур!
5Симеонна Левий – чвйир,
дурарин турар инсаф адру яракь ву!
6Дарза дурарин ниятарин иштиракчи,
дарза дурарин мажлисариъ шлур,
хъял гъафиган, адмийир йивну йикӀрудар,
кефназ йицарин табар кьатӀ апӀрудар.
7Балайикк ибшри чпин гьадмукьан пис хъял,
чпин гьадмукьан инсафсуз алархьуб!
Якьубдин баяригъинди гатӀахьидиза чиб,
Израилин насларигъ рагъидиза дурар!
8Ягьуда, гъардшари апӀиди яв тяриф!
Яв хил хьибди душмнарин хяртӀахъ,
яв улихь яв адашдин баяри апӀиди икрам.
9Уву, Ягьуда, йиз бай, жигьил аслан,
хюрч хьтарди хътадакрур.
Дахънайиганра, уву аслан вува!
Шилхьан шул кучуз дидик?
10Ягьудайихь гьарган паччагьвалин маргъ хьибди.
Гьарган дугъан насларихь хьибди думу чумакъ,
дидин Эйси гъяйизкьан –
вари халкьар Чаз мютӀюгъ шлур.
11Дажи дугъу чан кибтӀди тӀумтӀин шилик,
гъудугъ – варитӀан ужуб кюлик.
Дугъу палтар чан урччиди чяхрик,
алабхьруб чан кажабгъиди тӀумтӀин ифдик.
12Улар хьиди дугъан, чяхиртӀан кӀару,
Сппар хьиди дугъан, никктӀан лизи.
13Забулун хьиди яшамиш гъирагъдихъ гьюлин, –
душв хьибди, дерккрушв гимйир.
Сяргьятар думу рукьиди Сидондихъна.
14Иссахар ву гужли дажи,
гъагъарин арайиъ рягьятвал гъадабгъури дабхънайи.
15Рягьятвал гъадабгърушв чан, чаз гъябкъюб ужуйи,
чаз кабалгру чан жил, чаз гъябкъюб уччвуйи,
гьаддиз чан кьял кьяни апӀиди гъагънакк
ва дубгиди азадвал чан.
16Гъабхиди Данди гьюкум тухмиин чан,
фицики мура Израилин саб тухум ву.
17Дан хьиди битӀси, рякъюхъ хъайи,
агъу йивру гюрзеси, жилгъайиъ айи,
гьяйвнин ликариз йивури кӀалам,
кьяляхъинди ахъруси атлу.
18Жан РАББИ, Уву уьрх узу!
Кюмекназ Яв ккилигураза!
19Алархьиди Гаддиин тӀафлар,
хъахъди ликарихъ дурарин думу,
чавра апӀури, тӀафлар тӀараш.
20Ашерин хьибди бегьем хураг.
Паччагьдин суфрайиз лайикь вуйи иццишнар
хрур хьиди думу.
21Нефталим – азадвализ деебтнайи жейран,
бабкан хру бицӀидар уткан.
22Юсуф – шир тӀумтӀин бегьерлу,
булагъдихъ хъайи тӀумутӀ бегьерлу,
цалкан кюлер кидиржнайи.
23Алархьнийи дугъʼин чӀимрар хьайидар.
Дурари гъахьну йивури писди.
24Хъа дугъан чӀимир гъубзну дизигну.
Дугъан гужли хилар зирекди гъузну,
Якьубдин Заанурин, Кьувватлурин кюмек дубхьну,
Израилин Гъарзнан, Марччлихънин кюмек дубхьну,
25яв адашдин Заанурин, яв гъайгъушнаъ Айирин кюмек дубхьну,
Кьудратлурин, уву ужувлакк Ккаърайирин кюмек дубхьну,
ургъбиинди завариан мархьар,
деетбиинди нирар, жилариан удучӀвурайи,
артмиш апӀбиинди наслар, увлан улдучӀвурайи,
тувбиинди мал-марччлин лиж, гьисаб апӀуз даршулайи.
26Яв адашдин ккун апӀурайи ужувлар,
зиина ву дагъларин девлетартӀан,
кюгьне тепйирин бегьерартӀан.
Гъит дурар вари алди ишри кӀулʼин Юсуфдин,
гъардшарин арайиан заан дапӀнайирин унтӀʼин.
27Вениамин ву вягьши жанавар,
гвачӀин хьайизра гъибисуб хътипӀрур,
хюрч хябяхъган пай апӀрур.
28Магьа фицдар вуш Израилин йицӀикьюб тухум ва магьа, ужʼвал ккун апӀури фици гъапнуш чпин адашди: гьардиз, чав лайикь шулайиб, ккун гъапӀнийи дугъу.
Якьубдин аьжал
29Якьубди дурариз гьамциб буйругъ тувнийи:
– Узу йиз абйирихьна гъягъюраза. Узу, йиз абйирихъди, Эфрун кӀуру хеттжвуван хутӀлиъ айи дюрхъяъ кивай, 30Думу дюрхъ Ханаандин ругариин али Мамре кӀурушван багахь хьайи Махпела хутӀлиъ а. Му хутӀил Ибрагьимди хеттжви Эфрундихьан гъийихдар кивуз кӀури масу гъадабгънайиб ву. 31Душваъ кивна Ибрагьимна дугъан хпир Сара, Исакьна дугъан хпир Ребека. Душваъ узу кивназа Лияра. 32ХутӀилра ва душваъ айи дюрхъра хеттарихьан масу гъадагънайидар ву.
33Баяриз буйругъар тувну, Якьуб аьхникк дахъру ва йикӀуру, думу абйирихьна гъягъюру.
Sélection en cours:
Эвел 49: ТабГК
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Институт перевода Библии, 2010, 2013, 2016, 2018, 2023
