Эвел 50
50
1Юсуфди адашдин бедендилан хабар алдагъуру ва, ишури, дукӀнайирин машназ мак гъапӀу. 2Юсуфди чан гъуллугънаъ айи жярягьариз Израилин беден дурубтӀуз мялгьямариан апӀуз буйругъ туву. 3ЯгъчӀвур йигъан, гьаци апӀуз гьадмукьан йигъар гъягъюйи, жярягьари беден мялгьямариан апӀури гъахьи ва ургцӀур йигъан египтари дерд-гъам зигури имийи. 4Саламдин вахт ккудубкӀиган, Юсуфди фяряуьндин багахь хьайи гъуллугъчйирикан гьамци пуб ккун гъапӀу:
– Эгер узу ичв улихь гьюрмат гъазанмиш гъапӀнуш, фяряуьндиз гьамци йипай: 5йиз адашди учв гъачӀиган, улихьдимиди Ханаандиъ чав гьязур дапӀнайи дюрхъяъ кив дупну, узухьди чаз гаф тувуз гъитну. ТӀалаб апӀураза, узу йиз адаш кивуз дина деетуб, хъа, думу кивну, кьяляхъ гъидиза.
6Фяряуьнди ихтияр туву:
– Гъарах, яв адаш кив. Яв туву гаф тамам апӀин.
7Юсуф адаш кивуз гъушу. Дугъахъди фяряуьндин вари гъуллугъчйир, агъсакълар ва Египет жиларин вари аьхюдар, 8Юсуфдин вари хизан, дугъан вари гъардшар, ва вари дугъан тухум гъушу. Гошен ругариин анжагъ мал-къарана бицӀидар гъузнийи. 9Дугъахъди аьрабйир, атлуйир ва кьадарсуз халкь хъайи.
10Иордан нирин тмуну гъирагъдихъ хъайи Горен-Атаддихьна хъуркьиган, дурари варидари зурба ва учӀвру ишуб ккебгънийи – ургуд йигъан дурар Юсуфдин адашдихъ ишури имийи. 11Думу ругариин яшамиш шулайи хананей адмийириз Горен-Атаддиъ айи салам гъябкънийи ва гьамци пуз хъюгънийи:
– Фукьан учӀвруди ишурадарин египтар!
Иордан нирин тмуну гъирагъдихъ хъайи думу йишваз Авел-Мицраим («египтарин ишал») кӀури гъахьи.
12Баяри чпин адаш Якьубдин буйругъ тамам гъапӀнийи: 13дугъан беден Ханаандиз гъубхнийи ва Мамрейихьан ярхла дарди Махпела хутӀлиин али, саб вахтна Ибрагьимди хеттжви Эфрундихьан гъийихдар кивру йишв вуди гъадабгъу, дюрхъяъ кивнийи. 14Якьуб кивбалан кьяляхъ, Юсуф, дугъан гъардшар ва вари хъади гъахьидар Египетдиз кьяляхъ хътаркнийи.
15Гьамус, адаш йикӀбалан кьяляхъ, Юсуфдин гъардшар фикрарик кахъу: «Гьамусра Юсуфдик ухькан хъял кмишул белки, хъа эгер дугъаз, чаз туву дердналан хъял алдабгъуз ккун гъабхьиш, фу шулу?» 16Дурари Юсуфдихьна гьамци йипай кӀури гьаъру:
– Учв йикӀайиз ихь адашди увуз 17гьамциб васият гъапӀнийи: «ТӀалаб апӀураза, гъардшарин гуннагьдилан – увуз дурари гъапӀу писвалилан, хил алдабгъ». Гьаддиз ккун апӀурача, хил алдабгъ учлан, фицики учура яв адашдин Заанурин лукӀар вуча!
Гьаму гафарихъ хъпехъури, Юсуф гъишнийи.
18Гъардшар чибра гъафнийи ва, дугъан улихь жилиинакьан икрам дапӀну, гъапнийи:
– Гьамусдихъантина учу яв лукӀар вуча!
19– ГучӀ мапӀанай, – гъапи Юсуфди, – узу Заанур вуйинхъа? 20Учву узуз писвал апӀуз ккайчва, хъа Заанури думу ужувлаз илтӀибкӀну: гьаддилантина фукьан инсанар гъюрхну! 21ГучӀ мапӀанай. Узу ичвра ва ичв бицӀидаринра гъайгъушнаъ хьидиза.
Му гафари гъардшар сикин гъапӀнийи ва дурар ккаарцнийи.
Юсуфдин аьжал
22Гьамци Юсуф чан багахьлуйирра хъади Египетдиъ ерлешмиш гъахьнийи. Дугъу варжна йицӀуд йисан уьмур хъапӀнийи. 23Дугъаз Ефраимдин худларра кмиди гъяркънийи, дугъу Манасдин балин – Махирин – бицӀидарра чан ликрихъ хъитӀнийи.
24– Багарихьди узу йикӀиди, – гъапи дугъу гъардшариз. – Хъа гьациб йигъ гъибдики: Заанури учву кӀваин апӀиди ва учву мушвʼан Чав Ибрагьимдиз, Исакьдиз ва Якьубдиз гаф тувну улупнайи ругариина гъахидичву.
25Юсуфди, Израилин баярикан Заанури чиб кӀваин гъапӀган, чпихьди Египетдиан чан гъузу кӀурбар гъахуз, чаз – Юсуфдиз гаф тувуб ккун гъапӀнийи.
26Юсуф варжна йицӀуд йисаъ ади гъакӀнийи. Беденра мялгьямариан дапӀну, ишкӀиъ итну, Юсуф Египетдиъ гъитнийи.
Sélection en cours:
Эвел 50: ТабГК
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Институт перевода Библии, 2010, 2013, 2016, 2018, 2023
