Паччагьлугъар-4 17
17
Израилин аьхиримжи паччагь Гьуша
1Ягьудайин паччагь Ахаздин паччагьвалин йицӀикьюдпи йисан Элайин бай Гьуша Самарияйиъ Израилин паччагь гъахьнийи. Дугъу урчӀвуд йисан паччагьвал гъапӀнийи. 2Дугъу РАББИЙИН улариъ писвал апӀуйи, амма учв хьайиз гъахьи Израилин паччгьарисикьан дарди.
3Ашурдин паччагь Шалманасер#17:3 Шалманасер: думу Ашурдин паччагь Тиглат-Паласарин бай вуйи. Гьушайиина дявдиз гъушнийи. Гьуша дугъан гьюкмикк ккахънийи, ва дугъу Шалманасериз харж тувуйи. 4Ашурдин паччагьдиз Гьуша хаинкар вуйивал ашкар гъабхьнийи, гьаз гъапиш Гьушайи Египетдин паччагь Суйихьна чархачйир гьауйи. Ашурдин паччагьдиз дугъу, муганайиз йисʼан йисаз тувруганси, харж тувурдайи. Гьаддиз Шалманасерри думу гъидиснийи ва дустагъдиъ итнийи.
Израил йисирвалиъ абхъувал
5Ашурдин паччагь Израил уьлкейиъ архьнийи, Самарияйиина диш гъахьнийи. Дугъу шубуд йисан Самария кьялаъ апӀну гъибтнийи. 6Гьушайин паччагьвалин урчӀвудпи йисан Ашурдин паччагьди Самария гъадабгънийи ва израилар Ашур уьлкейиз йисирвализ гъухнийи. Дугъу дурар Хавор нирихъ хъайи Халах шагьриъ, гьацира Гузан шагьриъ ва мид халкьдин шагьрариъ дитнийи.
7Гьаму вари ляхнар хьпан себеб чпин Заанур вуйи РАББИЙИЗ къаршуди израилари гунгьар апӀувал вуйи. РАББИЙИ дурар Египетдиан адаънийи, египет паччагь вуйи фяряуьндин гьюкмиккан ккадаънийи, амма дурари бутариз ибадат апӀуйи. 8Дурар РАББИЙИ чибхьан гьутӀуркку халкьарин аьдатарихъди, хъа гьацира Израилин паччгьари ирчу аьдатарихъди гъягъюйи.
9Израилари чпин Заанур вуйи РАББИЙИЗ кьабул даруб апӀуйи. Дурари бицӀи ва аьхю вари шагьрариъ тепйириин гирамишвар тикмиш апӀуйи. 10Дурари гьарсаб ягъли тепейиин ва аьхюди сирин тувру гьарикк гирами гъванар ва Ашерайин мурхьлар дивуйи. 11Гьарсаб гирамишвʼин дурари, чибхьан РАББИЙИ гьутӀуркку халкьариси, ицциб ниъ хъайи шейʼар ургуйи. РАББИЙИК хъял капӀри, дурари пис ляхнар апӀуйи. 12РАББИЙИ «Мици мапӀанай» гъапнушра, дурари бутариз ибадат апӀуйи. 13РАББИЙИ Израилиз ва Ягьудайиз вари пайгъамбрарин ва чпин мелзналан РАББИЙИН гафар инсанарихьна рукьрударин кюмекниинди ихтибарлу хабар дебккри гъахьну: «Пис рякъяриан удучӀвай! Йиз амрар ва тяйинвалар Узу ичв абйириз тамам апӀуз амур гъапӀу ва учвуз Йиз лукӀар вуйи пайгъамбрарин мелзналан туву Къанундиз асас тамам апӀинай».
14Амма дурар хъпехъурдайи ва, чпин Заанур вуйи РАББИЙИХЪ хътругъру чпин абйирси, инкар вуйидар вуйи. 15Дугъан къайдйир, чпин абйирихъди гъийитӀу Дугъан йикьрар, Дугъу дурариз туври гъахьи улупбар дурари ярхла гъапӀнийи. Дурар фукӀа дару бутарихъди гъягъюйи ва чибра фукӀа дарудар гъахьнийи. Израилин ва Ягьудайин агьалйири гургутум айи ва дурари апӀруб апӀуз РАББИЙИ гъадагъа дапӀнайи халкьарихъан мисал гъадабгъуйи.
16Дурари чпин Заанур вуйи РАББИЙИН вари амрар ярхла гъапӀнийи. Чпиз жердюкьярин суратнаъди урзнайи кьюб бут ва Ашерайин мурхьул гъапӀнийи. Дурари вари завун кьушум вуйи ригъдиз, вазлиз, хядариз, гьацира Баализ#17:16 Баал: ханаанарин кӀулин бут, чаз кюгьне вахтари ханаанари ибадат апӀури гъахьи завар рахбан бут. Думу гафнан мяна – «агъа, эйси». ибадат апӀуйи. 17Дурари чпин баяр ва шубар цӀигъ гъурбан апӀуйи. Дурари фал кипуйи, изитӀ апӀуйи, дурар РАББИЙИН уларикк, Дугъак хъял капӀри, пис ляхнариин машгъул шуйи.
18РАББИЙИЗ Израиликан яманди хъял гъабхьнийи, ва Дугъу дурар Чахьан ярхла гъапӀнийи. Анжагъ Ягьудайин тухум гъибтнийи. 19Амма гьятта Ягьудайира чан Заанур вуйи РАББИЙИН амрар тамам апӀурдайи. Дурар Израили ирчу аьдатарихъди гъягъюйи. 20Гьаддиз РАББИЙИ Израилин вари тухмар ярхла гъапӀнийи. Чахьан ярхла апӀайизкьан, Дугъу дурариз жаза тувуйи ва дурар тӀарашчйирин хлиз тувуйи.
21РАББИЙИ Израилиин гьюкум Давуддин тухумдихьан тадабгъиган, дурари Наватдин бай Яравам паччагь гъапӀнийи. Яравамди Израил РАББИЙИХЬАН гъубхнийи, ва дидиз лапра пис гунгьихьна ял гъапӀнийи. 22Израилари Яравамдин гунгьарин рякъюъди гъягъювал давам гъапӀнийи, дурарихьан гьидицундайи. 23Чан гъаравашарин, пайгъамбрарин, мелзналан улихь ккимиди гъапиганси, РАББИ дурарихьан гьидицнийи. Гьаци Израилин халкь чпин уьлкейиан Ашурдиз йисирвализ гъубхнийи, дурар гъира#17:23 Гъира: китаб гъибикӀу вахтнакан кӀура. душваъ ими.
Самарияйиз, яни Израил алди гъабхьи йишвариз, жара халкьар хувал
24Ашурдин паччагьди Вавилондин, Кутайин, Аввайин, Хаматдин ва Сепарваимдин агьалйир хъади гъахнийи ва Самарияйин шагьрариъ израиларин ерина дитнийи. Дурари Самарияйин шагьрариъ бина гъивнийи. 25Дурар душваз кючмиш духьну имиди, дурари гьеле РАББИЙИЗ ибадат апӀурдайи, ва Дугъу дурариина асланар гьауйи. Асланари дурарикан бязидар чӀяргъюйи. 26Дидин гьякьнаан Ашурдин паччагьдиз хабар дебккнийи:
– Уву хъади гъахи ва Самарияйин шагьрариъ диту халкьариз, думу уьлкейин Заанури фу тӀалаб апӀуруш, аьгъдар. Дугъу дурариина асланар гьаъру, асланари дурар терг апӀуру, гьаз гъапиш агьалйириз, думу уьлкейин Заанури фу тӀалаб апӀуруш, аьгъдар.
27Думуган Ашурдин паччагьди амур гъапӀнийи:
– Учву Самарияйиан йисирвализ гъуху Заанурин гъуллугъчйирикан сар дина гьаай. Гъит, думу душваъ яшамиш ишри, ва дурариз думу уьлкейин Заанурин къанунар улупри.
28Самарияйиан йисирвализ гъуху Заанурин гъуллугъчйирикан сар Бет-Элиъ яшамиш хьуз ва, РАББИЙИЗ фици ибадат апӀуруш, дурариз улупуз гъафнийи.
29Амма гьарсаб халкьди чпи бина гъиву шагьрариъ чпин бутарра гъапӀнийи ва Самарияйин агьалйири тепйириин гъапӀу гирамишвариъ дивнийи. 30Вавилондин агьалйири Суккут-Бенут бутдиз ибадат апӀуйи, Кутдин агьалйири – Нергал бутдиз, хъа Хаматдин агьалйири – Ашима бутдиз. 31Авва шагьрин агьалйири Нивхаз ва Тартак бутар гъапӀнийи. Хъа Сепарваим шагьрин агьалйири чпин бицӀидар Адрамелех ва Анамелех бутариз цӀигъ гъурбан апӀуйи. 32Дурари РАББИЙИЗРА ибадат апӀуйи ва тепйириин али гирамишвариъ чпин арайиан жюрбежюр инсанар бутарин гъуллугъчйирди тяйин гъапӀнийи. Дурари душвариин бутариз гъурбнар апӀуйи. 33Дурари РАББИЙИЗ ибадат апӀуйи, хъа чиб кючюрмиш гъапӀу йишвариан халкьарин вари аьдатариинди бутаризра гъуллугъ апӀуйи. 34Дурари гъийин йигъазкьан улихь вахтнан аьдатар уьрхюра. Дурариз РАББИЙИХЬАН гучӀурдар. Якьубдин наслариз РАББИЙИ туву Дугъан тяйинвалар ва рякъяр-ражар, къанунар ва амрар дурари тамам апӀурдар. РАББИЙИ Якьубдиин Израил ччвур иливнийи.
35РАББИЙИ, израиларихъди йикьрар йитӀруган, дурариз амур гъапӀнийи: «Бутариз гьюрмат мапӀанай, дурариз ибадат мапӀанай ва дурариз гъурбнар маханай. 36Зурба кьувватниинди ва аьхю аьламатариинди учву Египетдиан адау РАББИ – магьа Думу, учву Шлиз гьюрмат дапӀну ккундуш. Дугъаз ибадат апӀинай ва Дугъаз гъурбнар аькъинай. 37Дугъан тяйинвалар ва рякъяр-ражар, къанунар ва амрар гьарган тамам апӀинай. Дугъу дурар учвуз гъидикӀну. Бутариз гьюрмат мапӀанай. 38Узу учвухъди гъийитӀу йикьрар кӀваълан магьапӀанай ва бутариз ибадат мапӀанай. 39РАББИЙИЗ, ичв Заануриз, ибадат апӀинай, ва Дугъу учву вари душмнарин хилариккан азад апӀиди».
40Амма Самарияйин агьалйир хъпехъурдайи, ва дурари улихьдин вахтнан аьдатар уьрхюйи. 41Гьятта РАББИЙИЗ ибадат апӀури, думу халкьари бутариз ибадат апӀуйи. Гъийин йигъазкьан дурарин бицӀидари ва худлари чпин абйири гъапӀуб апӀувал давам апӀура.
Sélection en cours:
Паччагьлугъар-4 17: ТабГК
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Институт перевода Библии, 2010, 2013, 2016, 2018, 2023
