Паччагьлугъар-4 16
16
Ягьудайин паччагь Ахаз
1Ремалияйин бай Пекахдин паччагьвалин йицӀиургудпи йисан Ягьудайиъ Ютамдин бай Ахаз паччагьвал апӀуз хъюгънийи. 2Паччагь шлуган, Ахаздин къад йис яш вуйи. Дугъу Ерусалимдиъ йицӀийирхьуд йисан паччагьвал гъапӀнийи. Чан арха Давуддихьан тафавутлу вуди, дугъу РАББИЙИН, чан Заанурин, улариъ дюз вуйиб апӀурдайи. 3Думу Израилин паччгьарин рякъяриъди гъягъюйи. РАББИЙИ израиларихьан гьутӀуркку халкьарихъан хяви мисал гъадабгъну, гьятта чан бай цӀигъ гъурбан гъапӀнийи. 4Дугъу тепйириинра, гирами йишвариъра, аьхю сирин тувру гьарсаб гьариккра гъурбнар апӀуйи ва ицциб ниъ хъайи шейʼар ургуйи.
Ахазди Ашурдикан кюмек ккун апӀуб
5Думуган Арамдин паччагь Рецин ва Израилин паччагь Пеках, Ремалияйин бай, Ерусалимдиина дявдиинди гъушнийи. Дурари Ахаз айи Ерусалим гургутум кьялаъ аънийи, амма думу ккагъуз гъахьундайи. 6Думу вахтна Арамдин паччагь Рецинди Элат шагьур, душвʼан ягьудар утӀурккну, Арамдиз кьяляхъ гъапӀнийи. Элатдиз арамар кючмиш гъахьнийи, дурар гъира #16:6 Гъира: китаб гъибикӀу вахтнакан кӀура.душваъ яшамиш шула.
7Ахазди Ашурдин паччагь Тиглат-Паласарихьна гьамци пуз чархачйир гьаънийи:
– Узу яв гъараваш ва бай вуза. Гъач ва узʼин алархьу Арамдин паччагьдихьан ва Израилин паччагьдихьан узу уьрх.
8Ахазди РАББИЙИН Хулаъ ва паччагьдин гъалайин хазнйириъ гъибихъу вари гъизил ва арс уч гъапӀнийи ва Ашурдин паччагьдиз хътапӀнийи. 9Ашурдин паччагь Тиглат-Паласари Ахаздин хаиш тамам гъапӀнийи: Дамаскдиин алархьнийи ва думу гъибиснийи. Дугъу Дамаскдин агьалйир Кир шагьриз йисирвализ гъухнийи, хъа Рецин аьжлин хлиз тувнийи.
Ахазди Заанурин Хал цӀийи алапӀуб
10Думуган Ахаз паччагь Ашурдин паччагь Тиглат-Паласарихъди гюрюшмиш хьуз Дамаскдиз гъушнийи. Дугъаз Дамаскдиъ гъурбан апӀрушв гъябкънийи. Ахазди Заанурин гъуллугъчи Урияйиз гъурбан апӀрушван шикил ва, думу фици тикмиш дапӀну ккундуш, хъайи-хъайибси улупбар хътаънийи. 11Заанурин гъуллугъчи Урияйи гъурбан апӀрушв Дамаскдиан Ахаз паччагьди хътау улупбариз асас тикмиш гъапӀнийи. Ахаз паччагь кьяляхъ гъяйиз, дугъу думу тикмиш дапӀну ккудубкӀнийи. 12Дамаскдиан дуфну ва гъурбан апӀрушваз дилигну, паччагь дидин багахьна гъушнийи ва дидʼин улучӀвнийи. 13Дугъу вариубгбан гъурбан гъапӀнийи ва уьлер гъурбан гъапӀнийи, гъурбан гъапӀу чяхир удубзнийи. Гьацира демдин гъурбнарин#16:13 Демдин гъурбнар: Му жюре гъурбнар Заанурихъди дюз аьлакьйир уьрхюз ва Дугъахъди албагбан ва цӀийикӀултӀан аьлакьйир хьпан шадлугъар ипӀбар-ухбариинди къайд апӀуз апӀури гъахьну. Убккбахъан гьяйванатдин тялукь пай гъурбан апӀрушвʼин убгуйи; хъа имбу пай гъурбан гъапӀу касди, дугъан хизанди ва Заанурин гъуллугъчийи ипӀури гъахьну. ифи гъурбан апӀрушвак кибчнийи. 14РАББИЙИН улихь дивнайи кемшрин гъурбан апӀрушв хьайи йишвʼхьан гьадабгънийи. Думу цӀийи гъурбан апӀрушван ва РАББИЙИН Хулан арайиъ айи. Гьамус думу цӀийи гъурбан апӀрушван кафари терефнаъ дивнийи. 15Хъасин Ахаз паччагьди Заанурин гъуллугъчи Урияйиз амур гъапӀнийи:
– Аьхю цӀийи гъурбан апӀрушвʼин гвачӀниндин вариубгбан гъурбнар апӀин ва хябяхъдин уьлерин гъурбнар апӀин, паччагьдин вариубгбан гъурбнар апӀин ва дугъан уьлерин гъурбнар апӀин, уьлкейин вари халкьдин вариубгбан гъурбнар апӀин ва дурарин уьлерин гъурбнар апӀин. Гъурбан гъапӀу чяхир душвахь удубз. Вари гъурбнарин ифи гъурбан апӀрушвак кибч. Хъа кемшрин гъурбан апӀрушв, Заанурин кьаст аьгъю апӀбан бадали, узу ишлетмиш апӀидиза.
16Заанурин гъуллугъчи Урияйи вари Ахаз паччагьди амур гъапӀганси дюм-дюзди тамам гъапӀнийи. 17Ахаз паччагьди РАББИЙИН Хулаъ айи аьрабйирилан кьулар аьлчӀягънийи ва дурарилан хилар жикӀрудар алдагънийи. Дугъу кемшрин гьявуз учв дивнайи кемшрин йицарилан алдабгънийи ва думу гъвандин бинайиин дивнийи. 18Ахазди РАББИЙИН Хулахъ султ йигъан инсанар гъягъюз тикмиш дапӀнайи элебкнайишв ва РАББИЙИН Хулахъ чӀатанди паччагь гъюз гургутум тикмиш дапӀнайишв гьадагънийи. Дугъу му ляхин Ашурдин паччагь бадали гъапӀнийи.
Ахаздин аьжал
19Ахазди паччагьвал гъапӀу вахтнан жара гьядисйирикан ва дугъу гъапӀубдикан «Ягьудайин паччгьарин тарихарин китабдиъ» дибикӀна. 20Ахаз чан архйирихъди архаин гъахьнийи ва Давуддин Шагьриъ дурарин багахь накьвдик кивнийи. Хъа Ахаздин бай Хизкьи дугъан ерина паччагь гъахьнийи.
Sélection en cours:
Паччагьлугъар-4 16: ТабГК
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Институт перевода Библии, 2010, 2013, 2016, 2018, 2023