مَتّا 16

آسمانی نشانیئے لۆٹگ

(مَرکاس 8‏:11‏–13؛ لوکا 12‏:54‏–56)

1پَریسی و سَدوکی ایسّائے کِرّا په آییئے چَکّاسگا آتکنت و گوَشتِش: ”مارا آسمانی نشانیے پێش دار.“ 2ایسّایا پَسّئو دات: ”رۆزَردئے وهدا شما گوَشێت: ’هئوا وشَّ بیت که آسمان سُهر اِنت.‘ 3سباها گوَشێت: ’مرۆچی توپّانَ بیت که آسمان سُهر اِنت و جمبران بستگ.‘ شُما آسمانئے رنگ و درۆشُمئے اَندازه جنَگا زانێت، بله دئور و زمانگانی نشانیانی اَندازه جنَگا نزانێت. 4بدکار و زِناکارێن نَسل و پَدرێچ نشانیَ لۆٹیت، بله یونُس نبیئے نشانیا اَبێد، دگه هچّ نشانیے آیان دئیگَ نبیت.“ رندا ایسّایا آ یله داتنت و شت.

پَریسی و سَدوکیانی بدێن هُمیر

(مَرکاس 8‏:14‏–21)

5مُرید مَزَن‌گوَرمئے آ دستا شتنت، بله شمُشتگ‌اَتِش که نگن بزورنت گۆن. 6ایسّایا گۆن آیان گوَشت: ”هبردار! چه پَریسی و سَدوکیانی هُمیرا پهرێز بکنێت.“ 7گڑا آ وت‌مان‌وت هبرا لگّتنت، گوَشتِش: ”پمێشکا چُشَ گوَشیت که ما گۆن وت نگن نئیاورتگ.“ 8ایسّایا زانت که چے گوَشگا اَنت، پمێشکا گوَشتی: ”او کَمباوران! چێا وت‌مان‌وتا گوَشگا اێت که مارا نگن گۆن نێست. 9اَنگت هچّ سرپد نه‌اێت؟ شما آ پنچێن نگن شمُشتگ‌اَنت که پنچ هزار مردما سێرا وارت و شما چه سر آتکگێنان چینچُک سَپْت پُرّ کرت؟ 10یا هما هپتێن نگن که چار هزار مردما وارت و سێر کرت و شما چه سر آتکگێنان چینچُک لَچ پُرّ کرت؟ 11گڑا چۆن سَرپدَ نبێت که من گۆن شما نگنئے هبرا نه‌آن؟ چه پَریسی و سَدوکیانی هُمیرا پهرێز بکنێت.“ 12گڑا مُرید سرپد بوتنت که آ گوَشگا نه‌اِنت چه نگنئے هُمیرا پهرێز بکنێت، گوَشگا اِنت چه پَریسی و سَدوکیانی تالیما وتا دور بدارێت.

پِتْرُسئے گواهی

(مَرکاس 8‏:27‏–30؛ لوکا 9‏:18‏–21)

13وهدے ایسّا کئیسَریَه پیلیپیئے دَمَگا آتک، چه وتی مُریدان جُستی کرت: ”مردم انسانئے چُکّئے بارئوا چے گوَشنت، من کئے آن؟“ 14آیان پَسّئو دات: ”لهتێنَ گوَشیت که تئو پاکشۆدی دئیۆکێن یَهیا ائے، لهتێنَ گوَشیت اِلیاس نبی ائے، دگه لهتێنَ گوَشیت اِرِمیا نبی ائے یا چه آ دگه نبیان یکّے ائے.“ 15گڑا جُستی کرت: ”شما وت منی بارئوا چے گوَشێت، من کئے آن؟“ 16شَمون‌پِتْرُسا پَسّئو دات: ”تئو مَسیه ائے، نمیرانێن#16‏:16 نمیران، بزان هما که هچبرَ نَمِریت. هُدائے چُکّ ائے.“ 17ایسّایا دَرّاێنت: ”او شَمون، او یونائے چُکّ! تئو بَهتاورے ائے، چێا که اے هبر انسانێا#16‏:17 اَسلیگێن یونانی نبشتانکَ گوَشیت: ”گۆشت و هۆن“. په تئو زاهر نکرتگ، منی پت که آسمانا اِنت، آییا زاهر کرتگ. 18ترا گوَشان که تئو پِتْرُس#16‏:18 یونانی زبانا، ”پِترا“ سِنگێن کۆه و تَلارا گوَشنت و ”پِتْرُس“ ڈۆکا گوَشنت. ائے و اے مُهرێن کۆهئے سرا من وتی کِلیسائے بُنیادا اێرَ کنان که مَرکئے زۆر#16‏:18 اَسلیگێن یونانی نبشتانکَ گوَشیت: ”مُردگانی جهانئے دروازگ“. آییئے سرا بالادستَ نبیت. 19من آسمانی بادشاهیئے کلیتان ترا دئیان. هرچے که تئو زمینئے سرا مکنَ کنئے، آسمانا هم مکن کنگَ بیت، هرچے که تئو زمینئے سرا رئوا کنئے، آسمانا هم رئوا کنگَ بیت.“ 20پدا آییا وتی مُرید پرمان داتنت: ”گۆن هچکَسا مگوَشێت که من مَسیه آن.“

وتی مَرکئے بارئوا ایسّائے پێشگۆیی

(مَرکاس 8‏:31‏–33)

21چه هما وهدا و رَند ایسّا گۆن وتی مُریدان تچکا هبر کنگا لگّت، گوَشتی: ”من باید اِنت اورشَلیما برئوان، چه کئومئے کماش و مزنێن دینی پێشوا و شَریَتئے زانۆگرانی دستا بازێن سکّی و سۆریے#16‏:21 سکّی و سۆری، بزان جنجالی، تکلیپ. بسگّان و کُشگ ببان و سئیمی رۆچا زندگ ببان.“ 22پِتْرُسا آ یکّ کِرّے بُرت و هَکّل کنگا لگّت: ”او هُداوند! هُدا چُش مکنات. گۆن تئو هچبر اے پئیما مبات.“ 23ایسّایا چَکّ تَرّێنت و گۆن پِتْرُسا گوَشتی: ”او شئیتان! چه منی دێما دور بئے. تئو منی راها بندگا ائے، تئیی هئیال هُدایی هئیالے نه‌اِنت، انسانی هئیالے.“

ایسّائے رَندگیری

(مَرکاس 8‏:34‏—9‏:1؛ لوکا 9‏:22‏–27)

24نون ایسّایا گۆن وتی مُریدان گوَشت: ”اگن کَسے لۆٹیت منی رَندگیریا بکنت، باید اِنت وتی دِلئے سجّهێن لۆٹ و واهگان بکُشیت و وتی جندئے سَلیبا بَڈّا بکنت و منی رندگیریا بکنت. 25چێا که هرکَس که وتی ساهئے رَکّێنگئے جُهدا کنت، گاریَ دنت و هرکَس که منی هاترا وتی ساها نَدرَ کنت، رَکّێنیتی. 26اگن یکّێا سجّهێن دنیا برسیت بله وتی ساها گار بِدنت، گڑا آییا چِه پائِدگَ رسیت؟ مردم وتی ساهئے بدلا چۆنێن کیمتے داتَ کنت؟ 27انسانئے چُکّ گۆن وتی پتئے مزنێن شان و مڑاها پرێشتگانی همراهیا که کئیت، گڑا هرکَسا آییئے کرتگێن کارانی مُزّا دنت.

28شمارا راستێنَ گوَشان، اِدا لهتێن مردم اۆشتاتگ که تانکه آ انسانئے چُکّا مگندنت که وتی بادشاهیئے تها زاهر اِنت، اے نَمِرنت.“

Sélection en cours:

مَتّا 16: HPKB

Surbrillance

Copier

Comparer