مَتّا 15

دِلپاکی

(مَرکاس 7‏:1‏–23)

1نون چه اورشَلیما آتکگێن لهتێن پَریسی و شَریَتئے زانۆگر ایسّائے کِرّا آتک و گوَشتِش: 2”تئیی مُرید چێا مئے پت و پیرُکی رَسما پرۆشنت و ورگا پێسر دستَ نشۆدنت؟“ 3آیانی پَسّئوا گوَشتی: ”شما چێا په وتی رسمئے دارگا هُدائے هُکما پرۆشێت؟ 4هُدایا گوَشتگ: وتی پت و ماتا اِزَّت بدئے#15‏:4 دَررئو 12‏:20. و هرکَسا که وتی پت یا مات نالَت کرت، آییئے سِزا مَرک اِنت.#15‏:4 دَررئو 21‏:17. 5بله شما گوَشێت: ’اگن کَسے وتی پتا یا ماتا بگوَشیت: ”هما کُمکّ که من باید اِنت شمارا بداتێن، آ من هُدائے راها کُربان کرتگ،“ 6نون اجازت نه‌اِنت که آ وتی پت و ماتا کُمکّ بکنت.‘ شما په وتی رسمئے دارگا هُدائے هبرا هلاس و ناکارَ کنێت. 7او دورو و دوپۆستێن مردمان! اِشئیا نبیا شمئے بارئوا شَرّ گوَشتگ:

8 اے مردم دپا منا اِزّتَ دئینت،

بله دلِش چه من سکّ دور اِنت.

9 اے مُپتا منا پرستشَ کننت و

مردمانی راه و رَهبندانی تالیما اَنچُشَ دئینت

که گوَشئے هُدایی هُکم اَنت.“#15‏:9 اِشئیا نبیئے کتاب 29‏:13.

10ایسّایا مردم وتی کِرّا لۆٹاێنت و گوَشتنت: ”گۆش بدارێت و سرپد ببێت. 11چیزّے که دپا رئوت، مردما ناپاکَ نکنت، بله هما چیزّ که چه دپا درَ کئیت، مردما ناپاکَ کنت.“ 12نون مُرید آییئے کِرّا آتکنت و گوَشتِش: ”تئو زانئے که تئیی اے هبران پَریسی تئورێنتگ‌اَنت؟“ 13ایسّایا پَسّئو دات: ”هر نِهالے#15‏:13 نهال، بزان نۆک کِشتگێن درچک. که منی آسمانی پتا نکِشتگ، گوَجگَ بیت. 14شما آیان بِلّێت. آ، کۆرانی کۆرێن رَهشۆن#15‏:14 رَهشۆن، بزان رَهبر، سَرۆک، رهدَربر. اَنت، وهدے یکّ کۆرے دومی کۆرئے رَهشۆنَ بیت، دوێن کَنڈا کپنت.“

15پِتْرُسا گوَشت: ”اے مِسالئے مانایا مارا سرپد کن.“ 16ایسّایا گوَشت: ”شما اَنگت هم اینچُک ناسرپد اێت؟ 17نزانێت هرچے که دپا رئوت، لاپا مانَ بیت و پدا چه رۆتان درَ کئیت. 18بله هرچے که چه دپا درَ کئیت، چه دلا چِستَ بیت و همے چیزّ انسانا سِلّ و ناپاکَ کنت. 19چێا که بدێن پِگر و هئیال، هۆن و کۆش، زِنا، بێننگی، دُزّی، درۆگێن شاهدی و کُپر چه دلا چستَ بنت. 20همے چیزّ اَنت که مردما ناپاکَ کننت، گۆن نشُشتگێن دستان وراک ورگ مردما ناپاکَ نکنت.“

درکئومێن جنێنێئے ایمان

(مَرکاس 7‏:24‏–30)

21ایسّایا آ جاگه یله دات و سور و سئیدونئے دمگا شت. 22کَنهانی جنێنے که همۆدئے مردمے اَت، آتک و کوکّاری کرت: ”او هُداوند، او داوود بادشاهئے چُکّ! منی سرا رَهم کن. منی جنکّا جِنّے پِر و جنِکّ سکّ اَزاب اِنت.“ 23بله ایسّایا هِچّ نگوَشت. مُرید ایسّائے کِرّا آتکنت و دَزبندی‌اِش کرت: ”اِشیا رُکست کن، کوکّار کنانا مئے رَندا کپتگ.“ 24ایسّایا دَرّاێنت: ”من بَسّ په بنی اِسراییلئے گارێن مێشان راه دئیگ بوتگان.“ 25گڑا جنێن آییئے پادان کپت و گوَشتی: ”او هُداوند! منا کُمکّ کن.“ 26گوَشتی: ”چُکّانی نگنئے پَچ گِرگ و کُچکّانی دێما دئور دئیگ شَرّ نه‌اِنت.“#15‏:26 ایسّائے مکسد اِش نه‌اَت که اے جنێن ناپاک اِنت. آییئے مکسد اِش اَت که جنێنئے باور چه یَهودیانی باوَرا گێش اِنت. 27جنێنا گوَشت: ”هئو، او هُداوند! بله کُچکّ هم نگنئے هما چُنڈانَ ورنت که چه آیانی واهندانی پرزۆنگانَ کپنت.“ 28گڑا ایسّایا آییئے پَسّئوا گوَشت: ”او بانُک! تئیی ایمان مُهر و مُهکم اِنت، هما ڈئولا بیت که تئو لۆٹئے.“ هما دمانا آییئے جنکّ دْراه بوت.

ایسّا بازێنے دْراهَ کنت

29ایسّایا آ جاگه اِشت و شت، چه جَلیلئے مَزَن‌گوَرمئے لَمبا گوَست و یکّ کۆهێئے سرا سر کپت و نِشت. 30بازێن مردمے آییئے کِرّا آتک. لَنگ، کۆر، مُنڈ، گُنگ و دگه هر پئیمێن ناسلامتێن مردمِش ایسّائے کِرّا آورتنت و آییا دْراه کرتنت. 31وهدے اسراییلیان دیست که گُنگ هبر کنگا اَنت، مُنڈ دْراه بئیگا اَنت، لَنگ تَرّگا اَنت و کۆر گِندگا اَنت، گڑا هئیران بوتنت و وتی هُدائے ستا و سنااِش کرت.

چار هزار مردما وراک دئیگ

(مَرکاس 8‏:1‏–10)

32ایسّایا وتی مُرید لۆٹاێنت و گوَشتنت: ”منا اے مردمانی سرا بَزّگَ بیت، سئے رۆچ اِنت که منی کِرّا اَنت و په ورگا هچِّش نێست. منَ نلۆٹان که اِشان گۆن شدیگێن لاپے رُکست بکنان. چۆ مبیت که راها بتُسنت و بکپنت.“ 33مُریدان درّاێنت: ”اے گیابانا ما اینچُک نان چه کجا بیارێن که اے مردم سێر بکننت؟“ 34گڑا ایسّایا چه مُریدان جُست کرت: ”شمارا چُنت نگن گۆن؟“ گوَشتِش: ”هپت نگن و لهتێن کسانێن ماهیگ.“ 35آییا گۆن مردمان گوَشت: ”زمینئے سرا بنندێت.“ 36هپتێن نگن و ماهیگی زرتنت، هُدائے شُگری گپت، نگن و ماهیگی چُنڈ چُنڈ کرت و مُریدانا داتنت و مُریدان مردمانا داتنت. 37سجّهێنان سێرا وارت و چه سر آتکگێن چُنڈان مُریدان هپت لَچ#15‏:37 لَچ چه پیشّ یا دگه تاکان جۆڑ کرتگێن مزنێن دَرپے. پُرّ کرت. 38جنێن و چُکّان ابێد، چار هزار مردێنا وراک وارت. 39مردمانی مُچّیئے رُکست کنگا رَند، ایسّا بۆجیگا نِشت و مَگَدَنئے دَمَگا شت.

Sélection en cours:

مَتّا 15: HPKB

Surbrillance

Copier

Comparer