Galuega 3
3
O le Pipili ‘ua Fa‘amālōlōina
1‘Ua ō a‘e fa‘atasi Peteru ma Ioane i le malumalu i le itū aso e fai ai le tatalo, o le itūlā e tolu i le aoauli lea. 2‘Ua ‘ave fo‘i le tasi tagata ‘ua pipili talu ‘ona fānau mai, ‘ua tu‘uina ifo o ia e i latou i aso fai so‘o i le faitoto‘a o le malumalu ‘ua igoa i le Matagofie, e fa‘atoga atu i se mea alofa i ē ulu atu i le malumalu;#Galu 14.8; Ioane 9.1 3‘ua iloa mai e ia e Peteru ma Ioane o ulu atu i le malumalu ‘ona fa‘atoga lea o ia i se mea alofa. 4‘Ona pulato‘a lea o Peteru ma Ioane ‘iā te ia, ‘ua fa‘apea atu, “Va‘ai mai ia ‘iā te i mā‘ua.” 5‘Ona naunau mai lea o ia ‘iā te i lā‘ua, e peiseaī e fia maua se mea mai ‘iā te i lā‘ua. 6‘Ona fai atu lea o Peteru, “E leai sa‘u ario po o sa‘u auro; a o le mea ‘ua ‘iā te a‘u, ‘ou te avatua ‘iā te oe, o le suafa o Iesu Keriso o le Nasareta, ‘inā tu ia i luga, ‘inā savali.”#Galu 3.16 7‘Ua tago atu fo‘i o ia i lona lima taumatau, ‘ua fa‘atū ‘iā te ia i luga; ‘ona fa‘amalosia loa lea o ona vae ma ona tapuvae. 8‘Ua oso o ia i luga ma tu, ‘ua savali fo‘i, ‘ua ulu fa‘atasi fo‘i ma i lā‘ua i le malumalu, o lo‘o savali o ia ma oso, ma vivi‘i atu i le Atua.#Ioane 5.14 9‘Ua iloa mai fo‘i e le nu‘u uma o ia o lo‘o savali ma vivi‘i atu i le Atua. 10‘Ua latou iloa o ia lava sa nofo i le faitoto‘a o le Matagofie o le malumalu, ma fa‘atoga atu i mea alofa; ‘ua matuā ofo i latou, ‘ua segia o latou mauli#3.10 ‘ua segia o latou mauli: po o ‘ua matuā latou tēte‘i lava: po o ‘ua latou ofo tele. i le mea ‘ua o‘o ‘iā te ia.
O le Lauga a Peteru i le Malumalu
11‘Ua pipi‘i atu ‘iā Peteru ma Ioane le pipili ‘ua fa‘amālōlōina, ‘ua tamomo‘e mai le nu‘u uma lava ‘iā te i latou i le fa‘apaologa e igoa i le fa‘apaologa o Solomona, ‘ua ofo tele.#Galu 5.12 12‘Ua iloa e Peteru, ‘ona fai atu lea o lana lauga i le nu‘u, “Sema e, o ‘outou Isaraelu e, se a le mea tou te ofo ai i lenei mea? Se a fo‘i tou te pulato‘a mai ai ‘iā te i mā‘ua, peiseaī o so mā‘ua mana, ma se mā amio atua ‘ua savali ai o ia nei? 13O le Atua o Aperaamo, ma Isaako, ma Iakopo, o le Atua ō tatou tamā, ‘ua tu‘uina atu e ia le mamalu i lana ‘Au‘auna o Iesu; o ia na ‘outou tu‘uina atu, ma ‘outou fa‘afiti ‘iā te ia i luma o Pilato, a ‘ua manatu o ia e tatalaina atu ‘iā te ia.#Eso 3.15; Galu 5.30; Isai 52.13; 53.11; Galu 2.23 14Peita‘i ‘outou, ‘ua ‘outou fa‘afiti atu le Pa‘ia ma le Amiotonu, a ‘ua ‘outou fai atu ‘ia tu‘uina mai ‘iā te ‘outou le fasioti tagata.#Mata 27.15-23; Mare 15.6-14; Luka 23.13-23; Ioane 19.12-15 15‘Ua fasioti fo‘i e ‘outou le Ali‘i o le ola, o ia ‘ua toe fa‘atūina e le Atua nai ē ‘ua oti; o molimau i matou nei i lenā mea.#Galu 4.10; 5.31; Epe 2.10 16O lona suafa fo‘i, ‘ona o le fa‘atuatua i lona suafa, ‘ua fa‘amalosia e ia lenei tagata ‘ua ‘outou va‘ava‘ai i ai, ma ‘outou iloa; o lē fa‘atuatua mai ‘iā te ia, ‘ua foa‘i atu ai ‘iā te ia lenei fa‘amalosi o lona tino i o ‘outou luma lava.
17“O lenei, le ‘au uso e, ‘ua ‘ou iloa na faia e ‘outou ma le lē iloa, e fa‘apea fo‘i o ‘outou ali‘i.#Luka 23.34; 1 Timo 1.13 18A o ia mea na mua‘i fa‘ailoa mai e le Atua i fofoga o ana perofeta uma lava, e tigā le Keriso, ‘ua fa‘apea lava ‘ona fa‘ataunu‘uina e ia. 19O lenei, ‘inā salamō ia ‘outou ma ‘outou liliu, ‘ina ‘ia sōloi‘esea a ‘outou agasala, ‘ina ‘ia o‘o mai ai o tausaga e filemū ai mai luma o le Ali‘i; 20‘ina ‘ia ‘auina mai fo‘i e ia lē na mua‘i tala‘iina ‘iā te ‘outou, o Iesu Keriso lea. 21E tatau ‘ona nofo o ia i le lagi se‘ia o‘o i tausaga e toe fuata‘i ai mea uma lava ‘ua fetalai mai ai le Atua i fofoga o ana perofeta pa‘ia uma lava talu mai anamua. 22Auā na fai mai lava Mose i o tatou tamā, ‘E fa‘atūina e le Ali‘i lo ‘outou Atua le perofeta mo ‘outou o so ‘outou uso, e fa‘apei o a‘u nei; tou te fa‘alogo ‘iā te ia i mea uma lava na te fai mai ai ‘iā te ‘outou.#Teu 18.15; Galu 7.37 23E i‘u fo‘i ‘ina fa‘aumatia le nu‘u o tagata uma lava o ē lē fa‘alogo i lenā perofeta.’#Levi 23.29 24O perofeta uma fo‘i ē na fai mai, e āfua ‘iā Samuelu, ma ē na mulimuli mai, o i latou uma lava, ‘ua mua‘i fa‘ailoa mai i latou i nei aso. 25O fānau ‘outou a le au perofeta, ma le feagaiga sa faia e le Atua ma o tatou tamā, ‘ua fa‘apea mai ‘iā Aperaamo, ‘o so lau fānau fo‘i e manuia ai ‘āiga uma lava o le lalolagi.’#Kene 22.18; Kala 3.8 26O le Atua fo‘i, ‘ua na fa‘atūina mai lana ‘Au‘auna o Iesu, ‘ua ‘auina mai o ia e muamua mai ‘iā te ‘outou, e fa‘amanuia mai ‘iā te ‘outou i le fa‘aliliu‘esega ‘outou ta‘itasi ‘iā ‘outou amioleaga.”
اکنون انتخاب شده:
Galuega 3: RSCB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Revised Samoan Catholic Bible © Bible Society of the South Pacific, 2010.