Matio 2
2
Yɛmbaŋnema Mine Naŋ Yi Sapare A Wa Ka Ba Puori A Yeezu
1 #
Luk 2:1-7
A Naa Hɛrɔd naaloŋ saŋ, ba naŋ da dɔge a Yeezu Bɛtelɛhɛm naŋ be Gyudiya paaloŋ poɔ, a lɛ puoriŋ, yɛmbaŋnema#2:1 Yɛmbaŋnema: A yɛmbaŋnema ŋa da waa la noba naŋ taa bammo, a maŋ toɔ̃ kaa ŋmarbie kyɛ baŋ yɛlɛ naŋ na e. mine da yi la sapare wa Gyeruzɛlɛm, 2#Sɔr 24:17 a wa soorɔ, “Yeŋ la ka ba dɔge a bie na naŋ waa a Gyuumine Naa? Bonso, te nyɛ la a O ŋmarbiri pur-yiibu a sapareŋ, a wa ka te puori O ne emmo.” 3A Naa Hɛrɔd naŋ da wa woŋ a yɛlɛ ama, o ne a Gyeruzɛlɛm deme zaa pɔlle da teɛɛ la. 4Ka o da boɔle a Naaŋmen bagmaalkare ane a Naaŋmen bege wulwulibo lantaa a peɛre ba ka o baŋ zie na ba naŋ na dɔge a Kirista. 5#Mae 5:1; Gyn 7:42 Ka ba da yeli ko o, “Bɛtelɛhɛm teŋɛ naŋ be Gyudiya paaloŋ poɔ la, bonso, lɛ la ka a Ŋmen-yelmanneba da sɛge biŋ:
6 #
Mae 5:2
‘Fõõ, Bɛtelɛhɛm naŋ be Gyuda paaloŋ poɔ,
fo ba waa a Gyuda namine zaa poɔ bile soba;
bonso, fo poɔŋ la ka naa na yi,
ona la na kyẽẽ a N boorɔ noba Izerayɛl.’ ”
7Lɛ la ka a Naa Hɛrɔd sɔgle boɔle a yɛmbaŋnema a soore ba nɛnɛ ka o baŋ a saŋ na ba naŋ nyɛ a ŋmarbiri. 8Lɛ la ka o pãã da toŋ ba Bɛtelɛhɛm a yele, “Yɛ gaa te bɔ a bie nimizeɛ zaa, ka yɛnee wa nyɛ o, yɛ leɛ wa yeli ko ma ka N meŋ gaa te puori O ne emmo.” 9Ba naŋ da wa woŋ a naa noɔre yɛlɛ baare, ba da yi gɛrɛ la, ka a ŋmarbiri na ba naŋ da nyɛ a sapareŋ la lɛ, a wa de ba weɛ̃, a gɛrɛ te kyulli are a zie na a bie naŋ be. 10Ba naŋ da nyɛ a ŋmarbiri ka o are, ba poore da pɛle la yaga zaa a ba taa mannoo. 11#Yiel 72:10; 72:15; Aza 60:6 Ba naŋ wa te kpeɛrɛ a die, ba da nyɛ la a bie ne O ma Maria, ka ba da gbi dumo a puori O ne emmo, kyɛ yuo ba woore a ko O kyɔɔtaare; salema, ensɛnse ane turaali. 12Kyɛ Naaŋmen naŋ da kpãã ba ba zannoo poɔ, ka ba ta wa leɛ gɛrɛ a Hɛrɔd zie zuiŋ, ba da tu la so-yuo a gaa ba teŋɛ.
A Igyipiti Teŋɛ Zo Gaabo Yɛlɛ
13A yɛmbaŋnema naŋ da wa gaa baare, a Daana Maleke da wa la Gyosɛf zie o zannoo poɔ, a wa yeli ko o, “Iri de a bie ne O ma zo gaa ne Igyipiti teŋɛ a te kpeɛrɛ be a te ta saŋ na N naŋ na yeli ka fo leɛ wa, bonso, Hɛrɔd nara la ka o bɔ a bie a ko.” 14Lɛ la ka a Gyosɛf iri de a bie ane O ma yi ne tensogɔ saŋ gaa ne a Igyipiti teŋɛ, 15#Hoz 11:1 a te bebe te ta saŋ na a Hɛrɔd naŋ wa kpi. A ŋaa da eɛɛ la ka ka a Daana yelbiri na O naŋ tu a Ŋmen-yelmanna zie yeli na tu a tuubu, “N boɔle la a N Bidɔɔ ka O yi a Igyipiti teŋɛ poɔ.”
A Bibiiri Koobo Yɛlɛ
16A Hɛrɔd naŋ da wa nyɛ ka a yɛmbaŋnema bɛlle o la, o suuri da iree la yaga zaa. Lɛ la ka o toŋ ka ba te ko bibiiri na zaa naŋ ta yuomo ayi kyɛ sigre, a Bɛtelɛhɛm ane o tembilii poore. A yi o naŋ da peɛre a yɛmbaŋnema nɛnɛ a te baŋ a bie dɔgebo saŋ zuiŋ la ka o da ko a bibiiri bama. 17#Gyɛ 31:15 A yɛlɛ ama da eɛɛ la ka ka a Ŋmen-yelmanna Gyɛremaaya yelbie na tu a tuubu, aŋa lɛ o naŋ da yeli:
18 #
Gyɛ 31:15
“Ba da woŋ la neɛ kaŋ kɔkɔre naŋ yire Rama poɔ,
neɛ kaŋ naŋ ŋmeɛrɛ kpɛlle erɛ nemba-yɛlɛ,
Rakɛɛl kono hiine la o biiri yɛlɛ,
a ba sage ka ba mɔgle o, bonso, a o biiri ba la kyebe.”
A Igyipiti Teŋɛ Leɛ Yi Waabo Yɛlɛ
19A Hɛrɔd kũũ puoriŋ, a Gyosɛf naŋ da naŋ be a Igyipiti teŋɛ poɔ, a Daana maleke da wa la o zie zannoo poɔ, a wa yeli: 20#Yiib 4:19 “Iri taa a bie ne O ma ka yɛ leɛ gaa Izerayɛl teŋɛ, bonso, a banaŋ naŋ da boɔrɔ a bie koobo kpie la.” 21Lɛ la ka Gyosɛf da iri de a bie ne O ma leɛ gaa ne a Izerayɛl teŋɛ. 22Kyɛ o naŋ da woŋ ka Akyilɔs la leɛre o saa Hɛrɔd zu a di a Gyudiya naaloŋ, a Gyosɛf da zoro la dabeɛ̃ ka o gaa a be. Kyɛ ba naŋ da kpãã o, o zannoo poɔ zuiŋ, o da de la a bie ne O ma a leɛ gaa ne Galili paaloŋ. 23#Luk 1:26; 2:39; Gyn 1:46; Aza 11:1; 53:2 Be ka o da gaa te kpeɛrɛ tembile kaŋ ba naŋ boɔlɔ Naazɛrɛ. A ŋaa da eɛɛ la ka a yelbie a Ŋmen-yelmanneba naŋ da yeli na tu a tuubu, “Ba na boɔlɔ O la Naazɛrɛ Bie.”
اکنون انتخاب شده:
Matio 2: DGA
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Dagaare First Bible © The Bible Society of Ghana, 2025.