Iŋɛ́nínɛ yi Isáaŋ 2
2
Ɔmbɔp ú kutúmɛn Ɔlɔŋ ú peétépí pé Yésus, Ifɛ́ɛs
1Ɔ́ŋɛ́n Éŋele u Ɔlɔŋ ú peétépí pé Yésus Ifɛ́ɛs, ɛɛlɛ́ kɛ́ɛ́yɛ́ ɛ́ɛ́:
Ewú unyɛɛ́ asamánán muótíótio mútíndátɔ́neémue kɛ́ɛ́yɛ́ kɔ́ ɔmbɔ́k wɔɔnɛ́m,
woond wɛndɛ ɛ́ kikɛtɛ́kɛtɛ́ɛ kí atálɛ́n mulámba mú kóol átíndátɔ́neémue, ɛ́ɛ́pí ɛ́ɛ́:
2Yeémenyen puólí ɛɛlɛnɛ́ɛ ne muyú ɔkɔ́lɔnɛ́ɛ na aná apílúndaninɛ́ɛ,
Yeémenyen ɛ́ɛ́ aápíkása pefílefile.
Ɔɔ́pítɛ́n epé pɛ́ɛlɛnɛ́ ɛ́ɛ́ pɔ́ pányɛ petúmí, pɔ́ kɔk tɛ pɛ́ɛ,
oond ɛkɛɛ́n ɛ́ɛ́ pányɛ pasupúsɔp.
3Aápílúndanɛn:
Ɛɛ́n muyú káámɛ ó pusíó tɛ ɛ́ɛ́ óot nuɔ́lɛ́ɛ.
4Maná indipá iŋuɔ́pinɔn peseé á puandá púmoómí púnyiɛ́ ɛ́ɛ́ atikápá and kuŋɔyɔ anɛ metúk mákutúan.
5Pítákɛ́t kɔɔ́mɔ áányíípɛ́ kuɛfɔ́k aakua.
Núki, óond ɛ́ kuɛl kúáwɔ kú insúá.
Índɛ kútipá nɔ, yoókólon,
yeéli nitálɛ́n ilámba níáwɔ kɔɔ́mɔ nínyɛɛ́.
6Maná, puandá púmoómí nyɛ peseé kááwɔ: Niaŋ níámɛ, atipá ɔɔyɔ meelíe mé Penikolayíit.
7Ewú unyɛɛ́ ni itú úpítɔ́likɛn epú Emfúnukufúúmɛ ɔ́ɔ́yɔɔnɛ́ɛ kɔ́ Ɔlɔŋ ú peétépí pé Yésus.
Epé páányípíányinɛɛ́ yeényéeki pɔ́, pányáan, insamɔ́ sí putɛ́ pú kusɔ́t púnyɛɛ́ é kisíén kí Támbák.
Ɔmbɔp ú kutúmɛn Ɔlɔŋ ú peétépí pé Yésus, Isimilíin
8Ɔ́ŋɛ́n Éŋele u Ɔlɔŋ ú peétépí pé Yésus Isimilíin, ɛlɛ́ kɛ́ɛ́yɛ́ ɛ́ɛ́:
Ewú unyɛɛ́ Túmínikɛ́ɛ́yɛ ne Súkínikɛ́ɛ́yɛ, ewú umeékú, waand kuond ɔ́ kusɔ́t ɛ́ɛ́pí ɛ́ɛ́:
9yeémenyen muyú múáwɔ nɔ ɔsɔ́k wááwɔ, aŋúɛ kɔk inɛ́m!
Yeémenyen aná pɛɛnd pɛ́ɛlɛnɛ́ɛ ɛ́ɛ́ pɔ́ pányɛ Pɛyúútɛn óóleé pɔ́kuyɔ́lɔ,
pɔ́ kɔk kati Yúútɛnɛ: pányɛ ɔlɔŋ ú Sáátan.
10Etitíín muyú mú kuóloniné.
Okóyikoy kɔnuɔ́pitɛn, útɔ́ɔt pɔsɔ́k pómotí káánɔ́ ɔ́ kiɔ́p á kiansi kí imbíne,
nukoond núpia inséésítényí i metúk máát.
Pá nulátát kuám é nikú, pinamá yeényíkuekié: Kusɔ́t kú teeníík.
11Ewú unyɛɛ́ ni itú úpítɔ́likɛn epú Emfúnukufúúmɛ ɔ́ɔ́yɔɔnɛ́ɛ Ilɔŋ sí peétépí pé Yésus.
Epé páányípíányinɛ́, nikú ní káándíɛ tiɔ́nyipíkɔ́ɔ́tɛ́n pɔ́.
Ɔmbɔp ú kutúmɛn Ɔlɔŋ ú peétépí pé Yésus Pɛlɛkáam
12Ɔ́ŋɛ́n Éŋele u Ɔlɔŋ ú peétépí pé Yésus Pɛlɛkáam, ɛɛlɛ́ kɛ́ɛ́yɛ́ ɛ́ɛ́:
Ewú unyɛɛ́ ni imfak i pitíí ifaátá, isɛ́kɛ́ piáyí piim píándɛ́, ɛ́ɛ́pí ɛ́ɛ́:
13Yeémenyen kɔɔ́mɔ ɔnyɔ́mbitɔnɛ́ɛ: kɔ́ɔkɔ́ indáŋa i Sáátan nyɛɛ́.
Eékimbílétileti, atiímbísáŋɔn,
tɛ é kipénéŋ Antipáasɛ, etétúnyí waamɛ u nulátát pɔ́mɔɔ́n wɔ́ kuanɔ́, kɔɔ́mɔ Sáátan nyɔ́mbitɔnɛ́ɛ.
14Maná, indipá iŋuɔ́pɔnɛn peseé á maandá mómotí: anyɛ nɛ pɛɛnd kuawɔ pɔ́ɔŋɔnɛ́ɛ kí iŋónyítónyí i Pálam umaápá uliikesi Palákɛ ɛ́ɛ́ útámba paán pí Ísilayɛ́ɛl ɛ́ɛ́ pányáan maányi pámányipífuúnán pifɛ́lɛfɛ́lɛ póond pɛ́ɛndɛ musɔm.
15Pɛɛnd nyɛ andíkɛ́k kuawɔ pɔ́ɔŋɔnɛ́ɛ kí iŋónyítónyí i punya Nikolayíit.
16Núkí kusɔ́t.
Kati nɔ, yáasikuámɛ́n pɛkɛtɛpɛkɛt,
ínuenesi pɛɛnd pakáánɛ́ ni imfak i pitíí yiiŋámanɛ́ɛ é niít.
17Ewú unyɛɛ́ ni itú úpítɔ́likɛn epú Emfúnukufúúmɛ ɔ́ɔ́yɔɔnɛ́ɛ Ilɔŋ sí peétépí pé Yésus.
Epé páányípíányinɛ́ɛ yeényéeki pɔ́ múkunyá muunɛmbɛ́n pápílanɛ́ ɛ́ɛ́: «máan», yoond yeeki siki mɔɔndɛ kɔ́ɔ́p kɔ́ ɔlɔŋ nitányí niifúmfɛ́ɛ nɛ kisiɛ́n kiikɔ́si kiɔ́ŋɔ́n á nɛ́ɛ mɔɔnd olotí tiányípá umenyen, ɛsiɛ́ ewú úmányipiá nɛ́ɛ.
Ɔmbɔp ú kutúmɛn Ɔlɔŋ ú peétépí pé Yésus Tiatíil
18Ɔ́ŋɛ́n Éŋele u Ɔlɔŋ ú peétépí pé Yésus Tiatíil, ɛɛlɛ́ kɛ́ɛ́yɛ́ ɛ́ɛ́:
Muɔ́nɔ́ u Támbák,
ewú eŋís yɛ́ɛ́yɛ́ punyanɛ́ɛ ɛlɛɛ́ yiik, pikɔ́nd píɛ́yɛ́ muɛnyɛ ɛlɛɛ́ pilééŋú,
ɛ́ɛ́pí ɛ́ɛ́:
19Yeémenyen aná ɔkɔtɔnɛ́ɛ, iŋɔyɔ yaawɔ, kuátap kúáwɔ ne kupíeki kúáwɔ ó puólí, na kupílúndɛn kúáwɔ; yeémenyen ɛ́ɛ́ puólí púáwɔ pú ínanɔ áátápukan pú kuetúm.
20Maná, indipá iŋuɔ́pinɔn peseé aná ɛpímɛmɛnɛ́ɛ akáandɔ́ pápílanɛ́ ɛ́ɛ́ Sesapɛ́lɛ,
wɛɛ́kɛl ɛ́ɛ́ unyɛ eŋémímoónyi má Támbák, unenesi peelímoólí páámɛ, uliikesi pɔ́ ɛ́ɛ́ pɛ́ɛndɛ musɔm póond pányáan maányi pásaápífuunan pifɛ́lɛfɛ́lɛ.
21Yeékí wɔ́ kisikɛl ɛ́ɛ́ únúki kusɔ́t, kúúkɔ́ utiányípá waamba ɛ́ɛ́ úyap ɛŋɛnd ú musɔm.
22Púúpɔ́ iŋaányítɔ́ɔt wɔ́ á nipɛ́t ní muyú,
pɛɛnd wɛɛndɛnɛ́ɛ musɔm nɔɔpɔ́, pɔ́ kɔ́kɔ́ɔ́p iŋeséésitenyi pɔ́ na pukaaka,
péen kuyap kusɔ́t Sesapɛ́l óónyonyée pɔ́.
23Iŋoond yɔ́ɔ́n paán pɛ́ɛ́yɛ́;
kɔ́ɔ́kɔ́ Ilɔŋ sí peétépí pé Yésus kitikit keényímenyi ɛ́ɛ́ inyɛ ewú umenyenée imbítáákítɛ́n sí pɛɛnd na pilɔŋ píɔ́p;
siki mɔɔndɛ waányípia pinamá pí meelíe mɛ́ɛ́yɛ́.
24Panɔ́ epé nunyɛɛ́ Tiatíil, núɛ́nyɛɛ́lɛ́ nutiɔŋɔ́ ɔ́ kilɔk kí iŋónyítónyí kikáánɛ́, nuond nuen kupíónyitonyi epú pɛɛnd pakáánɛ́ pílanɛ́ɛ ɛ́ɛ́: «insípít sí kuyuum sí Sáátan», yɛɛ́pí káánɔ́ ɛ́ɛ́:
indipá inuɔ́yikɔnɛn puandá púlotí nuɛsikɛnɛnɛ́ ɛ́ɛ́ núɛl.
25Maná, epú nukanyɛɛ́ pasamánán, ánusamán púu na pukaaka kuám aká yaányáásiámánɛ́ɛ.
26-28Epé páányípíányinɛ́ɛ póond póówóónyosi epú yɔɔyɔnɛ́ɛ kuám á kuamaná, yeényéeki pɔ́ pukaaka iŋúɛ kákáámɛ Taatá miímfá; yeényéeki pɔ́ pukaaka pú kupian pitɔŋ, péendesi pɛ́ɛ na pukaaka, pásána pɛ́ɛ yá aná pásánanɛ́ɛ musényí. Yeényéeki pɔ́ andíkɛ́k yoótíótio í emfúnupálɛ. 29Ewú unyɛɛ́ ni itú, úpítɔ́likɛn epú Emfúnukufúúmɛ ɔ́ɔ́yɔɔnɛ́ɛ Ilɔŋ sí peétépí pé Yésus.
اکنون انتخاب شده:
Iŋɛ́nínɛ yi Isáaŋ 2: yav
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2026, CABTAL