Filipiɛ́ŋ 3
3
Nunamá nuutámb á kupá indɛ́ndɛ́nɛ ke eŋis yá Támbák
1Ninuan kɔk paandimán, ánuyayáápá kɔ́ Ɔkɔ́n. Pútipá púnúséésenyi ɛ́ɛ́ ínúɔ́ŋɔn mɛɛ́tɛ maandá mómoómí, ó pusíó púánɔ́ púnyɛ ilúndɛ. 2Ánupíkáláká pilɔk pí peelímoólí pɛ́nyɛɛ́ ɛlɛɛ́ imbua sí ɛɛm, nupikeŋenyesi pɔ péékúmesi puansá púnyɛɛ́ sɛ́kísɛ́k. 3Á kiákí kémuémue paaŋansán pɔ́ pɛ́nyɛɛ́ pasúɛ, tukúmesíé Támbákɛ́ɛ kɛ́ɛ́yɛ́ é kiliínditíe, tuákanɛ́ɛ anyamɔ́ waasɔ́ é Yésus Kilíis tutipá tupíóndonyi ɔtɛ́m káásɔ́ ɔ́ pinɔ́k pí meelíe 4Naánɛ́ kɔk ɛ́ɛ́ yaápian ipán á kupian pipíóndínyí ɔtɛ́m kaamɛ niŋú muɛt. Índɛ olotí áápítááka kupian pipíóndínyí ɔtɛ́m kɛ́ɛ́yɛ́ wɔ́ muɛt, niŋúɛ yaákand apian nɔ́ɔ kutápɔk 5Pámiŋansá ɔ́ puɔ́s pú kanamaníɛ, imbiéne imbiéne yi isiyaɛl, é nisipi ni pɛnsamɛ, epele muɔ́nɔ́ u epele; inɛkɛn kikotí ɛlɛɛ́ falisiɛ́ŋ waatámb. 6Imapa nuɔ́l kuwa é kuséésenyi ɔlɔŋ ú peétépí, kí indɛ́ndɛ́nɛ yoólinonée ó kikotí indimapian kipansá. 7Maánda makáánɛ́ kitikit káámɛ maápá pinamá, nínuan yɛɛ́kɛɛ́nɛn mɔ sɛ́kísɛ́k é Kilíis. 8Púnyɛɛ́ yɛɛ́kɛɛ́nɛn makaána kitikit nánaánɛ á kiandá kí peseé kínyɛɛ́ kumenyi Yésus Kilíise Ɔkɔ́n waamɛ. Ó pusíó púɛ́yɛ́ yaátáp ɛ́ɛ́ yaáyɛn puum, yóond yɛ́ɛ́nɛn pukáánɛ́ ɛlɛɛ́ pikuti ɛ́ɛ́ indáŋap Kilíise. 9Ɛ́ɛ́ imbá kɛ́ɛ́yɛ́, indɛ́ndɛ́nɛ yaamɛ tiólínón ó kikotí, maná á kuátap Kilíise, indɛ́ndɛ́nɛ yoólinonée á Támbák yoond ipíɛ́tikɛnin á kuátap. 10Epú yaambanɛ́ɛ púnyɛɛ́ imenyi Kilíise, wúú na pukaaka púɛ́yɛ́ pú kuám á pilɔ́ŋ, iŋɔ́lɔ niap kɛ́ɛ́yɛ́ kí inséésítényi, yɛ́ɛ́yí meketi mɛ́ɛ́yɛ́ kɛ́ɛ́yɛ́ é niku. 11Akáánɛ́ índɛ púsiɛ́nɛk, iŋɔ́l niap á kuám á pilɔ́ŋ. 12Indipá kuɔyɛt ɛ́ɛ́ yaámán kuám á nukamá, kúnyáánɛ iŋanyi tɛ kipalalá; Maná yanuanan ɛ́ɛ́ yaám á nukamá, á kiákí Kilíis Yésus áámaná kuuyɔ́ɔn. 13Paandimán, yaápítááka ɛ́ɛ́ imanyi indiám á nukamá. Púmoómí, yeépíelitenyi ɛŋɛnd yaányímaná kuɛndɛt, kusuŋɔn nó pusíó kú kúnyɛɛ́ ɔ́ niɔlɔ́, 14Yaákaáman á nukamá ɛ́ɛ́ imbia pinamá kɔ́ ɔmbílíkínɛ́n u Támbák mɛnɛ́mɛnɛ́ɛ é Yésus Kilíis. 15Pasɔ́ peem tunyɛ peétépí paakúnínán tusɔ́tɔn kɔɔk anakáánɛ́, índɛ kɔk tutimɔsɔ́tɔn anakáánɛ́, Támbák katúfá kisie kɔ́ɔk. 16Maná kɔk ke etényí túányímáná kuám á wɔ, túɛndɛ ɛ́ɛ́ yɛɛ́tɛ iŋilí imoómí. 17Panɔ́ peem ɔ́nukɔ́l pulinsí kaámɛ paandimán, núond nútémbi eŋis é peepe pɛ́ɛndɛnɛ́ɛ é nuketi numaápiá káásɔ́. 18Imapá inúɔ́yɔn, yoond yaand ɔnúɔ́yɔn mɔ na andilɛ́ ké eŋis, puólílóoli ɔ́sɔ́tɔn ɛlɛɛ́ pokóyikoy pó kolóse u Kilíis. 19Punyím púnyɛɛ́ kúɔ́p kuamaná; Nipundi níɔ́p nínyɛɛ́ Támbákɛ́ɛ wɔɔpɔ́, nukúm núɔ́p núnyɛɛ́ ɛtɔ́ kunúa wɔ́ɔ́p, páákaákan maandá mé kúúsí meéŋényí ɔ́ niɔlɔ́. 20É kémuémue pasɔ́ kiták kíásɔ́ kí kitɔŋ nyɛ mɛnɛ́mɛnɛ́ɛ, kɔɔ́mɔ tupéétenyée oŋokí waasɔ́, Ɔkɔ́n Yésus Kilíise. 21Weényínúkesié nuɔ́l núásɔ́ nú tɔlitɔli núond ɛlɛɛ́ nuɔ́l núɛ́yɛ́ nú nukúm, ni imbekí inyɛ ɛ́ɛ́ puandá kitikit ɔ́ɔ́pinɔn wɔ.
اکنون انتخاب شده:
Filipiɛ́ŋ 3: yav
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2026, CABTAL