Efesiɛ́ŋ 2
2
Kuatɔk é nikú ó kuond ɔ́ kusɔ́t
1Panɔ́ numaápá pekuén insúá ó pusíó pú pipínanɔ na pifal píánɔ, 2numapá nusɔ́tɔn niaŋ ni pɛɛnd pé kúúsí pátiányípá pemenyen Támbákɛ́ɛ, nuɔ́pínɔɔ́n efuŋ u pilɔk pí piliínditíe unyɛɛ́ é kietélíe, pukaaka pú kiliínditíe kikáánɛ́ púkɔtɔnɛ́ɛ nínúan é péepé pénuenesie Támbákɛ́ɛ. 3Tumapá insúá pasɔ́ peem niaŋ níɔ́p, tusɔ́tɔn ɔ́ pilɔk pí pilɔ́ɔ́ŋɛ́t pí nuɔ́l núásɔ́, túɛlɛ epú nuɔ́l núásɔ́ mɔɔ́pílɔ́ɔ́ŋɔ ni imbítáákítɛ́n síásɔ́, á kupá kúásɔ́ kukánɛ́, tumɛ́ɛ́síkɛ́n kákáásɔ́ ɛ́ɛ́ ilópi i Támbák túkɔɔn niaŋ níɔ́p. 4Maná Támbák nyɛ owóónón nɛ niɛ́nɔsúkɛ, woond utúɔ́yɔ puólíkoóli. 5Púpukáánɛ́, pasɔ́ epé tumaápá pekúén ó pusíó pú pipínanɔ́ píásɔ́, waand atúfá kusɔ́t ne Kilíis. Umonúsótí kɛ́ɛ́yɛ́ kɔ ɔtɛ́m peseé. 6Káásɔ́ á nilat ne Yésus Kilíis, Támbákɛ́ɛ weetúenyi á pilɔ́ŋ ɔlɔŋ nɛɛyɛ́, wootúnyómbiti mɛnɛ́mɛnɛ́ɛ ɔlɔŋ nɛɛyɛ́. 7Kɛ́ɛ́yɛ́ kɔ́ ɔtɛ́m peseé umeétútíínyí á nipílat níásɔ́ ne Yésus Kilíis, Támbák maambá kutíínyi é metúk móólonée punɛ́m pú kati iŋetíe pú ɔtɛ́m peseé wɛ́ɛ́yɛ́. 8Kɔ́ ɔtɛ́m peseé wɛ́ɛ́yɛ́ Támbák óónúsótí, á kiákí ɛ́ɛ́ nuákaátapan. Pútipá púólinon káánɔ́, maná púnyɛ nupoo nú támbák. 9Kisótio kikáánɛ́ tipá kíólinon é meelínyée máánɔ́, tɛ mɔɔnd kɔk tipá ukúpíkitit kisas. 10É kémuémue Támbákɛ́ɛ umáátúluŋa, umatúluŋá á nipílat níásɔ́ ne Yésus Kilíis, ɛ́ɛ́ túɛlɛ masɔ́m mé peseé umɔɔ́pɔ́kɔ́ insúá.
Peem papílatá é Kilíis
11Ánupítáákɛ́t epú numaápá insúá! Nutipá imbíéne imbíéne sí Pɛyúútɛn; Pɛyúútɛn ɔ́ɔ́núkɔ́lɔn asi pɛɛnd pɛ́nyɛɛ́ no pilók, pɔ́ pápípílan ɛ́ɛ́ pányɛ paansán, ɛ́ kuɛl ɛ́ɛ́ pámásúmb pɔ́ kilók. 12Ánupítáákɛ́t ɛ́ɛ́ á kisikɛl kikáánɛ́, numapá kaáyɛ́ɛ ne Kilíis, numapá peenyí, nutimapá na niap é nikúli ní Ísilayɛ́l nutimapian niap ká akál eyí Támbák maátán ne nikúli níɛ́yɛ́, nutimapian tɛ pipíóndínyí ɔtɛ́m, nusɔ́tɔn e kúúsí kati Támbákɛ́ɛ. 13Maná nínúan, é Yésus Kilíis panɔ́ numaápá kaáyɛ, nukanyi mekúye na Támbák ó pusíó pú manɔ́ŋ mé Kilíis. 14É kémuémue Kilíise wɔ́ muɛ́t unyɛɛ́ kiyeéwe kíásɔ́, waalat nɛ Pɛyúútɛn na pá kati pɛyúútɛnɛ nikúli nímoómi. Ne nikú níɛ́yɛ́ ó kolóse Kilíise wakat pukít pú nikoyi pú maátúná pɔ. 15Wenyúkusit kikotí kí Pɛyúútɛn, ne pilití nɔ pitɔ́k pí kikotí kíɔ́p kikáánɛ́; umɛlɛ́ anakáaní ɛ́ɛ́ nɛ Pɛyúútɛn na pákati pɛyúútɛnɛ pá nikúli nímoómí nikɔ́siɔkɔ́siɛ á nipílat nɛɛyɛ́, yá anakáaní umaák kiyeéwe ɛ́ kikɛtɛ́kɛtɛ́ɛ kíɔ́p. 16Ne nikú níɛyí ó kolóse, Kilíise walat ne Pɛyúútɛn na pákati pɛyúútɛnɛ ɔ́ nuɔ́lú númoómi, wɛkɛɛyɛn pɔ́ na Támbák; no kolóse, wakat nikoyi. 17Kilíis moóló ɔ kuɔsiɔyít insɔ́m yí indámb i kiyeéwe á panɔ́ numaápá kaáyiɛ́, ne epé pámaápá mekúye. 18púnyɛ kɔk ɛ́ɛ́, é Kilíis pasɔ́ peem tunyɛɛ́ pékupísíítin Támbákɛ́ɛ Síí, na pukaaka pú wɛɛ́tɛ Emfúnkufúumɛ omoómí. 19Akáánɛ́ kɔk, nutikápá peenyi, tɛ pióloólo, maná nukayi ké embúlu na pifúmak pí Támbák, nukanyi ke embúl ú paán pá Támbák. 20Nunyi nusáyíkánán á nuwáak enú petúmí ne peémímekélíé má Támbák nyɛ́ indimb, Yésus Kilíise wɔ́ muɛ́t nyɛ ɛtɛ́n ú kiansi. 21Wɔ́ wɛɛlɛnɛ́ ɛ́ɛ́ nuwaák pílúndɛn, númákatan núɛ́yi kitamb kí Támbák, kinyáŋúnán ó pusíó pú Ɔkɔ́n. 22Á nipílat ne Yésus Kilíis panɔ́ kakanú nunyɛ á nuwák ɛ́ kúɛ́yɛ́ ɔlɔŋ nɔ pɔsɔ́k peem á pukaaka pú Emfúnukufúúmɛ kiansi kí Támbák.
اکنون انتخاب شده:
Efesiɛ́ŋ 2: yav
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2026, CABTAL