2 Tesalonik 1
1
Imbíkélie
1Niŋúɛ Póole na Sílas ne Timoté yɔɔ́ŋɔnɛ́ kitamb kí Támbák kinyiɛ́ Tesaloníík kíɔ́pinɔn Támbákɛ́ɛ Síí wasɔ́ nɔ Ɔkɔ́n Yésus Kilíis. 2Ɛ́nyɛlɛ́ Támbákɛ́ɛ Síí ne Yésus Kilíis nútíínyi ɔtɛ́m peseé wuɔ́p póond pénúeki kiyeéwe.
Kuátap ɛ́ kikɛtɛ́kɛtɛ́ɛ kí muyu
3Paandimán, tuápianɛ ɛ́ɛ́ túekenyi Támbákɛ́ɛ ilémbie kisikɛl kitikit káánɔ́ ó pusío, púnyi indɛ́ndɛ́nɛ ɛ́ɛ́ túɛlɛ nɔ́, á kiákí ɛ́ɛ́ kuátap kúánɔ áakuman táásɛ, ni iŋɔyɔ eyí nupianɛ́ɛ panúɛ na panúɛ ɔ́píɔ́yikɔnɛn á siki mɔɔnd káánɔ́ kɔ́ ɔlɔŋ. 4Tɛ ɔ́kɔɔ́pɔn tuénúpísimesi á pitamb pí Támbák, ó pusíó ɛ́ɛ́ kuésepenyíeyi á kuátap tɛ aná nunyiɛ́ ɔ́ muɔ́pítín ne muyu. 5Muyú nuɔ́pikɔnɛ́ étinyenyi ɛ́ɛ́ Támbák ósososi kí indɛ́ndɛ́nɛ, púnyiɛ́ muyú mukáaní kɛɛl ɛ́ɛ́ núpá epé pɛ́sikɛnɛnɛ́ ne pufuŋ pú Támbák epú nuɛ́nɛnɛ́ muyú apúɔ. 6Támbák nyɛ indɛ́ndɛ́nɛ wónínúpíondinyi épéepé pénúsésenyié, 7panɔ́ epé pénúsésenyíé waányínúfá kiwokitio ɔlɔŋ naasɔ, á kisikɛl Ɔkɔ́n Yésus ónyiólinoné mɛnɛ́mɛnɛ́ɛ ɔlɔŋ ne Peéŋele pɛ́ɛ́yɛ́ pá pukaaka, 8ɛ́ kikɛtɛ́kɛtɛ́ɛ kí yiik í puŋuminené, ɛ́ɛ́ wésisésítényí epé pátiányípá pémenyen Támbákɛ́ɛ ne péépé pátiányípá pɔ́ɔ́pinɔn insɔ́m yi indámb yi Ɔkɔ́n Yésus. 9Insésítényí yɔɔpɔ́ ányípá punyím pú tenííkée, kaáyíɛ́ nɔ Ɔkɔ́n, ne nuúmu nú pukaaka púɛ́yípúɛyí. 10Aká wuónyíóloné puɔ́s pukáani, ɛ́ɛ́ epé pɔ́ɔ́pinɔnɛ́ɛ wɔ́ ne epé páátapanɛ́ wɔ́ é kuesíkúmési wɔ na kuasiyíkíná wɔ, nuányípá panɔ́ muɛ́tímumátiɛ ɔlɔŋ nɔɔpɔ́, á kiákí ɛ́ɛ́ numaátáp nukál tumaanutian. 11Púpukáanɛ tupísókolonyié kisikɛl kitikit káánɔ́ ó pusíó ɛ́ɛ́: Támbákɛ́ɛ waasɔ́ núak epé pɛ́sikɛnɛnɛ́ nɔ kusɔ́t ekú umaanupilikin akuɔ, tuɔŋoŋ wɔ́ ɛ́ɛ́ kɛ́ɛ́yɛ́ á pukaaka únúɔ́yikinin ɛ́ɛ́ núwónyi pilɔ́ɔ́ŋɛ́t píánɔ pí kuɛlɛ peseé woond wák kuátap káánɔ́ ó puólí. 12Akáaní nú keényíkúmésí kisiɛ́n kí Ɔkɔ́n Yésus, wɔ́ unúkúmesi kɔ́ ɔtɛ́m peseé ú Támbákɛ́ɛ waasɔ́ nɔ Ɔkɔ́n Yésus Kilíis.
اکنون انتخاب شده:
2 Tesalonik 1: yav
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2026, CABTAL