Ruma 4
4
Ibərahima ala ma ɗal awa
1Anawatsə həji azlap ata jiji takwa Ibərahima, avaŋga? Səkən ndə a lima ana sha tə abə ha tə veme? 2Andza Ibərahima taɗa ala ma dəlili atama Bizlaf dawna zlən tə ndə a ɗalə ci, azha, həna kula a ghav, ama atama Bizlaf tasaɓ ikwa səku. 3Ara ndə a ɗa, tsakwa ana zlap ataa Ɗerewal ma ghwaɗeɗe: Ibərahima taɗalanə awa a Bizlaf, azha Bizlaf tabəw ka andza ala ma dəlili, dawna ɗal awa tə . 4Ndə ala a kaləm a ŋcah aska a lima wəda zlən tə, a lima, a ɗa sənma ndə a lima ɓəlaakaka səku, a ɗa səkən ndə həji kaavəlanə kuluk. 5Aɓa azha ci, andza ala tatsa deŋ aka ata zlən tə akas, ama taɗalanə awa a Bizlaf ma kabəw həji mpət aagi a həji ma dəlili aagi ci, Bizlaf ana ma kataŋ ɗal awa ataa ala aska a bəw ka a ɗa ala ma dəlili. 6Andza ikwa yəm abə Dawda a ya dərəf ta həmən ha tə, zəghay ana ala ndə Bizlaf a bəw ka a ɗa ala ma dəlili, kwa andza tatsa deŋ ata zlən tə aka səku:
7 Ɓas ara həji ndə Bizlaf a pəlatana gəy ma ta ka abə mpət ta aagi ka.
8 Ɓas ara ala ndə Bizlaf a ŋkula ŋgəɗ mpət tə.
9Ɓas watsa ci, a ɗa ataa Yahuda aagi gagagha vəw, aka səku ataa həji ma ŋkula ɗa Yahuda aagi yəm vəw? Həji tazlap, həji iŋgaya: Ibərahima taɗalanə awa a Bizlaf, Bizlaf tabəw ka andza ala ma dəlili, dawna ɗal awa tə. 10Ama abə vepe abə Bizlaf sən ka andza ala ma dəlili? A diwzha zla mazhemter tə vəw, aka səku tiɗa awli a zla mazhemter vəw? Aŋghə, a diwzha tə səku, tiɗa awli! 11Tiɗa ndə Ibərahima tanaka a zla mazhemter səku ci, a ɗa ala ma dəlili atama Bizlaf, ara ndə a kaɗalanə awa. A diwzha tə talima veviɗ la zla mazhemter, səkən watsə aagi aa ghal ci, Bizlaf tasənə andza ala ma dəlili, dawna ɗal awa tə. Ikwa abə Ibərahima a bəw tə a ɗa jiji ataa həji aagi ma kaɗalanə awa a Bizlaf aagi tiwtiw, kwa tiɗa ndə aa awli a zla mazhemter kwagwa. Həji watsa aagi, Bizlaf tasənata andza həji ma dəlili aagi. 12A ɗa jiji ataa həji ma zla mazhemter aagi yəm. Sa may a zlap ata həji ma zla zli zlikusəm ta aagi bəza gagagha səku, ama ata həji ma kaɗalə andza jiji takwa Ibərahima aagi: sha, a ɗalanə awa a Bizlaf tiɗa awli kwagwa a zla mazhemter.
13Ara ndə a ɗa, Bizlaf taghalanə ka a vəlanə a Ibərahima abə mbəw dəməs tə aagi, aagi alima manahayak a ɗa aŋta. Ama səkən ndə Bizlaf a ghal ka a vəlanə a Ibərahima watsa ci, dawna ndə a njin ma ma garagar bəza səku, ama a ɗalə dawna ndə a sən Ibərahima andza ala ma dəlili mavəy ɗal awa tə. 14Andza dawna ma ma garagar abə həji alima təf a zəm jak ma ghal aka a vəla ci, mbara həna kat ɗal awa akas, azha səkən ndə Bizlaf a ghal ka a vələ ci, abə sləf akas. 15Ara ndə a ɗa, ma ma garagar a kadaaha ghuɗek Bizlaf, ama andza ma ma garagar aka səku, gəy ma a ma ma garagar aka səku. 16Mavəy ma watsə meni, abə ɗal awa abə həji alima səkən ma təwah ma ghal ka a vəla, a ɗa ŋter səkən ta vəla ɓəlaakaka. Azha səkən ma ghal aka a vəla watsa, a ɗa ataa shiŋ jiji Ibərahima aagi tiwtiw, a həji ma kanjin ma ma garagar aagi gagagha səku, ama a həji ma kaɗalanə awa a Bizlaf aagi, andza Ibərahima ma ɗa jiji takwa tiwtiw. 17Andza ndə a kazlap a Ɗerewal ma ghwaɗeɗe, iŋgaya: Sa tatsahu ka a hwa a ɗa jiji ataa həji aagi vərəm. Sha ana vava takwa atama Bizlaf ndə a ɗalanə awa, Bizlaf ma kavəla miɗ a həji ma bazl ta aagi, ma kayaha səkən ma ŋkula ndza aka aska a ndza aka. 18Kwa həji abə deŋ a heɗe akas, ama ataa Ibərahima ci, tatsa deŋ a heɗe. Taɗalanə awa a Bizlaf, sha ana ndə a bəw tə a ɗa jiji ataa həji aagi vərəm. Ɗerewal ma ghwaɗeɗe tazlap, iŋgaya: shiŋ kwa a aɓin a ɗa vərəm iy kəsha. 19Ɗal awa Ibərahima ndza tə ɓərɓər, kwa abə ndə ŋgəl tə, va tə huk abəra teemeri. A kasənə zlikusəm tə a ndza andza ala ma mca tə, azha Saratu yəm taŋgəl tə dəy, kula zhana a ji dəməs a mbəwha mbə zhana səku. 20Ata ma ndə Bizlaf a ghalanə ka a vəlanə ya, taŋga ŋkwaɓ akas. Aɓa azha ci, ɗal awa tavəlanə ŋgalaŋ, azha tatsanə sləf a Bizlaf. 21A kasənə ŋter ci, Bizlaf abə ɓərɓər a ɗal səkən ndə a ghal ka a vələ. 22Dawna sha, abə Bizlaf a sənə Ibərahima andza ala ma dəlili. 23Taŋtiraya a Ɗerewal ma ghwaɗeɗe, iŋgaya: Bizlaf a sən Ibərahima andza ala ma dəlili dawna sha, ma watsa dawna Ibərahima gagagha səku. 24Ama dawna ŋkwa yəm, Bizlaf a deŋ ka ata ɗal awa takwa, ara ndə həji kaɗalanə awa, sha ma garazə Bay Madagal takwa Yesu a bəza a jiɓ. 25Tavəlaya a mci dawna mpət takwa, azha Bizlaf tagarazə a wəzəm a jiɓ aska həji a ɗa həji ma dəlili aagi.
اکنون انتخاب شده:
Ruma 4: GOU
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید