Ruma 16
16
Zlapzatana a həji aagi
1Sa kazlənahuni Febe, həla mama takwa, sha ana ma kaɗalatana zlən a dzam həji Kərist ma ndza a Keŋkereya aagi. 2Huni lamzə ata zləm ataa Bay Madagal, andza ndə həji Kərist aagi kazhiva a ɗalə, huni lamzə a zlən ndə a kaaɓin a ɗiwi ara huni aagi tiwtiw. Sha abə ha tə tava a lamzə həji aagi vərəm, talamzaka yəm.
3Huni zlapzatana ka a tiw Piriskila abə Akilas, həji ndə ni kaɗal zlən dzəv abə təmta aska Yesu Kərist aagi: 4Aa ɗiw a bazl ta dawna sa, aska a reh miɗ naka, sa ŋtaɗ naka ana ma kaɗalatana wasiy gagagha səku, ama abə ladzam həji Kərist ma ŋkula ɗa Yahuda aagi tiwtiw yəm. 5Huni zlapzatana ka a ladzam həji Kərist ma dzam ta ka a wata tiw Akilas abə Piriskila aagi yəm. Huni zlapzanə ka a ŋgwanambə naka Epaynetus sha ana ma diw a ɗalanə awa a Kərist a hayak Asiya. 6Huni zlapzanə ka a Mariyama ma vəla ha tə ka a ɗalahuni zlən dagala. 7Huni zlapzatana ka a Andərunikus abə Yuniyas, vən naka aagi, ndə ni tandaha a jak ta sa yaka abə təmta aagi. Aa ɗa həji ta zlən ndə sləf ata təmta aagi, təmta ana ma diw a ɗal awa a Kərist mpər aha sa aagi. 8Huni zlapzanə ka a Ampiliyatus ma ɗa ŋgwanambə naka gwara ara Bay Madagal. 9Huni zlapzanə a Urbanus, ala ndə həji kaɗal zlən abə sha dzəv a Kərist, abə ŋgwanambə naka Istakis. 10Huni zlapzanə ka a Apeles, ma ghalatana ɗal awa tə ma ndza a Kərist a həji aagi. Huni zlapzatana ka a həji ma ndza a wata ataa Aristubul aagi. 11Huni zlapzanə ka a Herudiyuŋ ma ɗa vən naka. Huni zlapzatana ka a həji ma ndza a wata Narsis ma ɗal awa a Bay Madagal aagi. 12Huni zlapzanə ka a Tiryfena abə Tiryfusa ma vəla ha ta ka a Bay Madagal aagi. Huni zlapzanə ka a ŋgwanambə naka Persis, wala ma vəla ha tə ka dagala a ɗalanə zlən a Bay Madagal. 13Huni zlapzanə ka a Rufus, ala ndə Bay Madagal a mayə, abə mamən, ma ɗa mana yəm. 14Huni zlapzatana ka a tiw Asiŋkirit abə Fleguŋ abə Hermes abə Patrubas abə Hermas abə zlina mama ma ndza abə təmta aagi. 15Huni zlapzatana ka a tiw Filulugus abə Yuliya abə Neriyus abə həla mamən, Ulimpas abə həji ma ji ma Kərist ma ndza abəra təmta aagi tiwtiw. 16Huni zlapzanə ka a ha kuni ŋtaguleŋ ŋtaguleŋ abə ɓas andza ŋgwanambə ma ŋtan aagi. Dzam həji Kərist ma ndza a ɗi aagi tiwtiw aa kazlapzahuni ka.
17Sa kaghalahuni, zlina mana aagi, huni mbəla ŋkwaɓ ara həji ma kagas a ɓizh dzəv həji aagi ka. Aa ɗiw a ndəv həji aagi ka abə ma ndə aa kazlap, ndə aa ŋkula ji səkən ndə huni sərək aagi. Azha huni kərəɗ kuni a bəza abəra təmta. 18Ara ndə a ɗa, shiŋ həji watsa aagi aa kaɗalanə zlən a Kərist ma ɗa Bay Madagal takwa akas, aa gas bəra ta, aa vas ma ma təwah təwah aagi abə ma ta ɓas aagi aska a ghut həji ma ŋkula sən səkən aagi. 19Həji aagi kasənə haw ndə huni kahawanə a Bay Madagal tiwtiw. Mbara sa abə ɓas ata ma kuni, sa may ci, huni aɗa həji ma kasən səkən aagi abə ɗal səkən ma ŋtan, mba ndə huni kaaɗa həji ma kasən a ɗal səkən ma gamak aagi. 20Bizlaf ma ndza abə təwah a aɓin a ndəraɗahuni Gətili aka aska ŋgas kuni. Sənma ataa Bay Madagal takwa Yesu Kərist mandza abə huni.
21Timuti, ala ndə ni kaɗal zlən abə sha, a kazlapzahuni ka, abə Lusiyus, Yasun abə Susipater, həji ma mbəwaka aagi. 22Sa kazlapzahuni, sa Tertiyus, ma ŋtir ɗerewal watsə, ata zləm ataa Bay Madagal.
23Gayus ala ndə sa kandza a wata tə, ndə aa kadzam a wata tə ana ladzam həji Kərist aagi tiwtiw, a kazlapzahuni ka. Erastus, ma mbəla dala ataa hayak ma dzamadzam, a kazlapzahuni ka, zlina mama takwa Kawartus a kazlapzahuni ka yəm [24].
Sləf ci, a ndzanə ataa Bizlaf ŋtaɗ tə
25Huni həmənaŋkwa Bizlaf, sha ana ma ndza abə dagal a vəlahuni ɓərɓər a wəzaha a ɗal awa, andza Ma wiyə ma təwah ndə sa kaɗafə, ma ndə sa kaɗafə ata Yesu Kərist, gwara ara Ma wiyə watsa, Bizlaf taghalahəji səkən ma ɓaha ka ambəɗa tə. 26Ama anawatsə, taghalatana ka a həji ma ŋkula ɗa Yahuda aagi tiwtiw, ata la ma ghwaɗeɗe gwara a ɗerewal ataa həji ma ɗaf ma ndə aa zlimazə ara Bizlaf aagi, andza ndə Bizlaf ma ndza aka kwa vepiy a garatana ma watsa ka, aska a həji aagi ahawanə tiwtiw abə ɗal awa. 27Bizlaf ŋtaɗ tə ana ma kasən səkən, ataa aŋtə ana sləf, gwara ara Yesu Kərist, kwa vepiy! Amen.
اکنون انتخاب شده:
Ruma 16: GOU
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید