Ruma 14
14
Hwa ɗiw a zanə mpət a zlinahw səku
1Huni lamazə həji ndə ɗal awa ta a ɗa ɓəraŋ aagi, ara huni a ɓas ata zlap ta. 2Ɗal awa ma ndza a ꞌunəf ataa ala minja ya, a pəlanə təf a zəm səkən aagi tiwtiw, ama, ataa ala ndə ɗal awa tə a ɗa ɓəraŋ ya, a zəm wiri vajiɗ gagagha. 3Ala ma kazəm səkən aagi tiwtiw, a ɗiw a ghav ata ala ma ŋkula zəmə səkən aagi tiwtiw səku, ala ma ŋkula zəm səkən aagi tiwtiw, a ɗiw a ghav ata ala ma kazəm səkən aagi tiwtiw səku, ara ndə a ɗa, Bizlaf talamzə. 4Hwa ɗa vaya, ndə hwa kazla guma ata ala ma ɗal zlən ataa ala minja? Kwa a ɗa ata lagar, aka səku, tandəv tə, watsa ya, a ɗa zlən ataa madagal tə. Azha, a agar mkper, ara ndə Bay Madagal abə dagal ta gar ka mkper. 5Ala minja a kadeŋ ka ci, vah minja dəy aha vah ndiɓi aagi, ama ara ala minja ya, vah aagi aa ɗa tiwtiw ma ŋtaguleŋ. Kwa vaye mambəla ŋkwaɓ ata səkən ndə a kadeŋ a ɗalə. 6Andza ala a gəra vah ma ŋtaguleŋ dəy aha ma vərəm tə aagi ci, a ɗalə aska a hawanə a Bay Madagal. Ala ma kazəm səkən aagi tiwtiw, a ɗalə aska Bay Madagal, ara ndə a kaɗalanə wasiy a Bizlaf. Ala ma ŋkula zəm səkən aagi tiwtiw ci, a ɗalə aska Bay Madagal, sha tə yəm a ɗalanə wasiy a Bizlaf. 7Ara ndə a ɗa, kwa ala ma kandza abə nja dawna ha tə akas, azha ala ma kamca dawna ha tə akas. 8Ara ndə a ɗa, kwa həji kandza abə nja, həji ndza abə nja aska Bay Madagal, kwa həji mca, həji mca aska Bay Madagal: Kwa a ɗa həji ndza abə nja, kwa a ɗa həji mca, həji ɗa ataa Bay Madagal aagi tiwtiw. 9Ara ndə a ɗa, Kərist a mca tə, tagara tə a wəzəm a jiɓ, aska a ɗa Bay Madagal ataa həji ma mca ta aagi, abə həji ma ndza abə nja aagi. 10Ama hwa, hwa zanə mpət a zlinahw ava? Hwa, hwa ŋkalzə nja zlinahw ava? Ara ndə a ɗa, həji anda atama Bizlaf tiwtiw aska a zla guma ata həji. 11Andza ndə a ŋtiraya a Ɗerewal ma ghwaɗeɗe, iŋgaya: Sa Bay Madagal ma ndza abə nja, sa kaghalə: həji aagi agəliɓ tiwtiw atama naka, həji aagi tiwtiw aagi ahəmən sləf Bizlaf. 12Ikwa ci, kwa vaye a aghalanə səkən ndə a ɗalə abə ha tə a Bizlaf ma vah watsa.
13A ndza andza ikwa meni, ara həji a zatana mpət a həji ndiɓi aagi. Aɓa azha ci, huni tsa deŋ, ara ala a kaɗal səkən ma kadza zliŋgin a ŋtsuꞌun a ndəv a ɗal səkən ma gamak. 14Sa kasənə, andza ndə Yesu a ghalaka: kwa səkən zəm a kabəw ala a ɗa gamak akas. Ama andza ala tadeŋ ka, səkən watsə gamak, a aɗalanə gamak andza sha. 15Andza ꞌunəf zlinahw tahuɗek tə dawna səkən ndə hwa kazəm ci, hwa tanda andza ndə mayha a kaɗiwi akas. Hwa ɗiw a fəcak zlinahw bəza dawna səkən ta zəm gagagha səku, ara ndə a ɗa Kərist tamca tə dawna ala watsa. 16Səkən ma ŋtan ata nja kuni ci, ara bəw tə a səkən ma gamak ata nja həji ndiɓi aagi. 17Ara ndə a ɗa, La ndza bay Bizlaf taɗalha aska səkən ta zəm abə səkən ta sa səku, a ɗa dəlili, təwah abə lawaɗ ma vəlaha gwara ara Miɗ ma ghwaɗeɗe. 18Ala ma kaɗalanə zlən a Kərist ikwa ci, təwahanə a Bizlaf, a ɗa ala ma ŋtan ata nja həji aagi. 19Mbara huni gasaŋkwa səkən ma kadaaha təwah, abə dzəv ha aska həji alima ŋgalaŋ a walaŋ takwa a wəzaha a ɗal awa. 20Huni ɗiw a safay zlən Bizlaf aka dawna səkən ta zəm səku, səkən aagi tiwtiw aa kadək, ŋter, ama dadawər ana səkən ta zəm ndiɓi aagi, ara ndə a kaajaɓ həji ndiɓi aagi ka a ɗal mpət. 21Səkən ma ŋtan ci, galaɓa hwa ŋkal a zəm zli, galaɓa hwa ŋkal a sa mavə, ara ndə hwa kajaɓ zlinahw aka a ɗal mpət. 22Ma ndə hwa kadeŋi a ɗalə atama watsə meni, mbəl ka a ꞌunəf kwa atama Bizlaf. Təwah a ɗal ata ala ndə ꞌunəf tə ŋkula zla ata səkən ndə a kaɗalə. 23Ama ala ma kazəm səkən, ama a kadeŋ a ɗa səkən ma gamak ya, mpət tambəl bəza, ara ndə a ɗa, taŋga ŋkwaɓ ndza tə ka ata ɗal awa səku. Kala səkən ma ŋkula ndza abə ŋkwaɓ gbak gbak aka ata ɗal awa ci, a ɗa mpət.
اکنون انتخاب شده:
Ruma 14: GOU
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید