Ruma 11
11
Bizlaf taŋkalzə həji Isərayila aagi akas
1Sa kaɗiwzə azha: Bizlaf taŋkalzə həji tə aagi vəw? Aŋghə tep andza ikwas! Ara ndə a ɗa, sa abə ha naka, sa ndə Isərayila shiŋ ataa Ibərahima, sa vən ataa Benyamin. 2Bizlaf takwiy həji tə ndə a dəmata ambəɗa tə aagi bəza akas. Huni tazlimazə ma ma ŋtiraya a Ɗerewal ma ghwaɗeɗe, ndə Iliya a kahan ara həji Isərayila aagi atama Bizlaf. Huni kasən ma tə aagi katkadək. 3A kazlap, iŋgaya: Bay Madagal, aa tabazl həji ma ɗaf ma ndə aa zlima ara hwa aagi ka, zah aagi pasla kwa ka, sa mba ka ŋtaɗ naka, azha aa kagas a dzaka ka! 4Ama Bizlaf a zhinanə avaŋga? Sa tatsa həji naka aagi ka bəluk ŋshiliɗ, həji ma ŋkula va a gəliɓzə kusəm atama takun ndə aa kayə Baal. 5Akacihwa a ndza andza sha, finha kajik ikwa ana həji ma dəmadəm aagi gwara ara sənma ataa Bizlaf. 6Ama andza a dəmata gwara ara sənma ci, taɗa dawna zlən ta ndə aa ɗal aagi səku, aka səku ci, həna sənma Bizlaf ya, a kaaɗa sənma ma ɓəlaakaka ŋter səku. 7Ma watsə a may avaŋga? Səkən ndə həji Isərayila aagi kagasə ci, aa talima səku. Ama həji ndə Bizlaf a dəmadəm aagi talima səkən ndə aa kagasə. Ataa həji ndiɓi aagi ya, aa taji a zlima səku, 8andza ma ma ŋtir aka a Ɗerewal ma ghwaɗeɗe, iŋgaya: Bizlaf tadərnəhatana ŋkwaɓ ta ka aska ŋkula sən səkən, abə nja ta a ŋkula gəra la, abə zləm ta aska ŋkula zlima zlima, a vaŋ akacihwa. 9Dawda tazlap yəm, iŋgaya: La zəm səkən ta ya, maɗa kilŋga ma ndza aska təmta, maɗa wəli ndə aa kaandəv a mən, maɗa səkən ma kadza ta a ŋtsuꞌun, aa malima ŋgəz! 10Nja ta mawələf tə, aska aagi ŋkula gəra la, azha dəɓa ta maɗakw pal.
11Mbara ɗiw sa ɗiwzə, ŋtsuꞌun ma dza həji Isərayila aagi, aska aagi andəv ta ya, a ndza kwa vepiy vəw? Aŋghə, tep a ndza ikwas! Ama gwara ara gəy ma ta ci, həji ma ŋkula sən Bizlaf aagi kula a lima reh, aska a garzatana sərah ataa həji Isərayila aagi bəza. 12Azha, andza gəy ma ta ana ma daatana ŋtsəɓ a həji ma ndza a manahayak aagi ci, ndəv ta ana ma daatana ŋtsəɓ a həji ma ŋkula ɗa Yahuda aagi, azha, ndə həji Isərayila aagi kaagas lareh tiwtiw ci, təwah a afəl tə zhana dagala.
13Sa kazlapahuni mbara, huni həji ma ŋkula ɗa Yahuda aagi: sa ɗa ala ta zlən ataa həji ma ŋkula ɗa Yahuda aagi, sa kavəlanə sləf a zlən naka. 14Sa deŋ ikwa aska a garzə sərah ataa shiŋ naka aagi bəza, aska həji ndiɓi aagi aɗa reh. 15Ara ndə a ɗa, ndə Bizlaf a pərehata a bəza ci, aska a Bizlaf a dzəv ma abə manahayak, ndə a kaazhin a lamzata ara, a aɓin a pew avaŋga? Həji ma bazl ta aagi, aagi azhinata a bəza a jiɓ.
16Andza wəda mampər tavəlaya a Bizlaf ci, wəda ma mba ka aagi tiwtiw aagi aɗa aŋtə yəm. Andza dzara mpi tavəlaya a Bizlaf ci, maram mpi aagi aɗa aŋtə aagi yəm. 17Ama andza maram mpi ndiɓi aagi taɗawaya ci, ataa aŋkwa, hwa uliv ma ndza a damə, hwa tanəɓaya a la ta, hwa lima səkən ma ndza a dzara yəm, səkən ma ndza a han uliv, 18hwa ɗiw a sasən dawna maram mpi aagi səku. Andza hwa tasasən, ara hwa ahashashaŋ bəza, dzara ana ma ndza ata hwa səku, hwa ana ma ndza ata dzara. 19Kata hwa azlap ci: Aa bəl ra mpi watsa bəza aska a nəɓaka ka a heɗe, hwiy. 20Ŋter njiwin, aa ɗawata bəza ara ndə aa ŋkula ɗal awa. Hwa ci, aa nəɓahu ka dawna ɗal awa kwa. Hwa ɗiw a ghav səku, aɓa azha ci, ɗal ŋzliŋ. 21Ara ndə a ɗa, andza Bizlaf taɗaw maram mpi ma dəfaɓa ha tə aka ya, Bizlaf a aɗalahu bəza andza sha yəm, hwa mpi ma nəɓanəɓ. 22Taŋzə Bizlaf təwah, zhana yats. A ɗa yats ata həji ma ndəv ta aagi, a ɗa təwah abə hwa, andza hwa ndza dawna təwah tə. Aka səku ci, hwa aɗaw kwa andza maram mpi ana hwa yəm. 23Ataa aŋta ya, andza aa taɗal awa ci, aagi anəɓata ka, ara ndə a ɗa, Bizlaf abə dagal ta nəɓata ka zhana. 24Ara ndə a ɗa, andza hwa ma ɗa maram uliv ma ndza a damə ma dəfaɓa ha tə, ndə Bizlaf a ɗawahu bəza, həji tanəɓahu ka ata uliv ma zləgazləga ya, ma ŋkula zhiva səku, aa ɗa ra ataa uliv ma zləgazləga ma ŋter, aagi anəɓata ka ata ŋter a dzara ta.
Həji Isərayila aagi areh ta tiwtiw
25Zlina mana həji Kərist tə aagi, sa may a ghalahuni ma ma ɓahaɓah watsə, ara huni azlap: ni tasən bəza ana huni, guva Isərayila ndiɓi aagi aka, ma ŋkalzə a zlima ma watsa, a vaŋ ata vah ndə həji ma ŋkula sən Bizlaf aagi kaazhina ta ara Bizlaf. 26Mbara a tsutsa abə Isərayila aagi areh ta tiwtiw, andza ndə a ŋtiraya a Ɗerewal ma ghwaɗeɗe: Ala ma kaarehahəji a andaa a bəza a hayak Siyuna, a ajitana ma ma dadawər ma ndza ata shiŋ Yakubu aagi bəza. 27Tsakwa ana dzəv ma naka ma kaaɓin a ɗal abə təmta, ndə sa kaadaatana mpət ta a bəza. 28Ndə aa ŋkula ji Ma wiyə ma təwah ci, aa tabəw ta a jaga Bizlaf aagi dawna huni, andza ala tagəra dəm ndə Bizlaf a dəmata ci, aa ɗa madaraf aagi dawna jiji ta aagi. 29Ara ndə a ɗa, Bizlaf a kaazhin a ji səkən ma ɓəlaakaka ndə a va a vəlanə ana ala bəza səku, Bizlaf a kabəw ŋkwaɓ abə həji ndə a yaata ambəɗa tə aagi səku. 30Ara ndə a ɗa ambəɗa tə huni tahawanə a Bizlaf aka səku, ama anawatsə, Bizlaf taza hahər ata huni ara ndə Yahuda aagi ŋkula hawanə, 31anawatsə təmta yəm aa tahawanə aska a Bizlaf a za hahər ata huni, azha, təmta yəm ci, aagi alima za hahər Bizlaf. 32Ara ndə a ɗa, Bizlaf tatsata ka a həji ma ŋkula hawanə aagi, aska a ghalatana za hahər tə a həji aagi tiwtiw.
33Ŋtsəɓ Bizlaf gulili ikwa! Sən səkən tə abə wirwir tə bay tə! Ala ma kaasən deŋ tə bəza vaya? Ala ma kaasən səkən ndə a ɗal aagi bəza vaya? 34Ara ndə a ɗa, ala ma kasənə deŋ ataa Bay Madagal vaya? Aka səku, ala ma kaghalanə ma vaya? 35Aka səku ala ma diw a vəlanə səkən mpər aska a Bizlaf a azhinanə a baraf vaya? 36Ara ndə a ɗa, səkən aagi aa ndaha ara tiwtiw, aa ndza gwara ara, aa ɗa ataa aŋtə aagi tiwtiw. Ataa aŋtə ana sləf kwa vepiy! Amen.
اکنون انتخاب شده:
Ruma 11: GOU
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید